មន្ត្រីពន្ធនាគារបានឲ្យដឹងថា ចំនួនអ្នកជាប់ឃុំនៅទូទំាងប្រទេសបានកើនឡើងដល់៧៥% បើធៀបតួលេខឆ្នាំ២០១៦កន្លងមក ដោយថាកំណើនដ៏ខ្ពស់បែបនេះ បានកើតឡើងបន្ទាប់ពីរដ្ឋាភិបាលកម្ពុជា ចាប់ផ្តើមយុទ្ធនាការបង្ក្រាបគ្រឿងញៀន។
លោក បេទា ឡេង អំពាវនាវទៅប្រជាពលរដ្ឋ ជាពិសេសក្មេងៗជំនាន់ក្រោយ ជៀសឲ្យផុតពីគ្រឿញៀន ដោយថាគ្រឿនញៀននាំឲ្យប៉ះពាល់ដល់សុខភាព កិត្តិយសគ្រួសារ និងធ្វើឲ្យមានអសន្តិសុខក្នុងសង្គមជាដើម។
លោកបានឲ្យដឹងថា «ប្រើប្រាស់គ្រឿញៀនវាអាចបង្កើតជាបទល្មើសផ្សេងៗច្រើន… ដូចជាបទល្មើសឃាតកម្មលួច ឆក់ ប្លន់ បទល្មើសរំលោភ គឺវាភាគច្រើនកើតចេញពីបទល្មើសគ្រឿងញៀន»។
មន្ត្រីសម្របសម្រួលគម្រោងកាត់សេចក្តីដោយយុត្តិធម៌ នៅមជ្ឈមណ្ឌលសិទ្ធិមនុស្សកម្ពុជា លោក ហ៊ុន សៀងហាក់ យល់ថា ថ្នាំញៀន ធ្វើអ្នកប្រើប្រាស់ហ៊ានប្រព្រឹត្តបទល្មើសផ្សេងៗ ហើយនាំឲ្យសង្គមជួបភាពវឹកវរ។ ករណីនេះ លោកស្នើទៅរដ្ឋាភិបាលពង្រឹងការអនុវត្តច្បាប់ឲ្យមានស្តង់ដារតែមួយ ដោយមិនប្រកាន់បក្ខពួក ឬអ្នកមានអំណាច។
លោកស្នើថា «ការអនុវត្តច្បាប់ សុំឲ្យអនុវត្តតាមស្តង់ដារតែមួយ អ្នកដែលធ្វើខុសត្រូវតែទទួលទោសទណ្ឌឲ្យស្មើគ្នា មិនថាអ្នកមានអំណាច ឬអ្នកគ្មានអំណាចឲ្យតែធ្វើខុសច្បាប់ ការអនុវត្តបែបហ្នឹង មិនថាទៅលើបទល្មើសគ្រឿងញៀន បទល្មើសអ្វីទេជារួមអនុវត្តច្បាប់ឲ្យបានស្មើភាពគ្នា»។
លើសពីនេះទៀត លោកជំរុញទៅរដ្ឋាភិបាលគិតគូឡើងវិញ លើស្ថានភាពអ្នកជាប់ឃុំនៅក្នុងពន្ធនាគារទូទំាងប្រទេស ខណៈក្នុងពន្ធនាគារតូចចង្អៀត ហើយអ្នកប្រព្រឹត្តបទល្មើសដែលសមត្ថកិច្ចចាប់យកទៅឃុំខ្លួន មានការកើនឡើងជារៀងរាល់ឆ្នាំ ដោយថាកុំឲ្យប៉ះពាល់ដល់សិទ្ធិអ្នកជាប់ឃុំទំាងនោះ។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បានប្រាប់វីអូឌីកាលពីថ្ងៃទី០៩ ខែមករាថា សមត្ថកិច្ចបង្ក្រាបបទល្មើសគ្រឿងញៀនបានជាង ៨ពាន់ករណីនៅទូទាំងប្រទេស ដោយឃាត់ខ្លួនជនសង្ស័យជាង ១ម៉ឺននាក់ និងរឹបអូសបានសារធាតុញៀន ១៧៨គីឡូក្រាមនៅទូទាំងប្រទេស។ លោកបន្ថែមថា ទំហំបទល្មើសពាក់ព័ន្ធនឹងគ្រឿងញៀនកាលពីឆ្នាំ២០១៧ បានកើនឡើងជាង ២ដង បើធៀបនឹងឆ្នាំ២០១៦កន្លងមក។
លោកនាយករដ្ឋមន្ត្រី ហ៊ុន សែន បានប្រកាសយុទ្ធនាការបង្ក្រាបគ្រឿងញៀនកាលពីដើមឆ្នាំ២០១៧កន្លងទៅ បន្ទាប់ពីដំណើរទស្សនកិច្ចរបស់ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ កាលពីពាក់កណ្ដាលខែធ្នូឆ្នាំ២០១៦។
បញ្ហាគ្រឿងញៀន ត្រូវបានរកឃើញក្នុងការស្ទង់មតិមួយកាលពីឆ្នាំ២០១៦ថា ជាចំណុចខ្សោយធំមួយរបស់រដ្ឋាភិបាលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។
ករណីនេះមន្ត្រីសង្គមស៊ីវិលយល់ថា បញ្ហាគ្រឿងញៀន គឺជាដើមចមនាំឲ្យមនុស្សទៅប្រព្រឹត្តបទល្មើសលួច ឆក់ ប្លន់ រួមទំាងបទល្មើសផ្សេងៗទៀតជាដើម។ ករណីពួកគេជំរុញទៅរដ្ឋាភិបាលទប់ស្កាត់ឲ្យមានប្រសិទ្ធភាព និងអនុវត្តច្បាប់មានស្តង់ដាតែមួយ៕
