ប្រជាពលរដ្ឋដែលមានជម្លោះដីធ្លីជិត២០០នាក់មកពីខេត្តចំនួន៤ ប្រមូលផ្តុំគ្នានៅរាជធានីភ្នំពេញនៅព្រឹកនេះ ហើយបានយកញ្ញត្តិទៅដាក់នៅតាមក្រសួងស្ថាប័នរដ្ឋមួយចំនួន ដើម្បីសុំឲ្យពន្លឿនស្វែងរកដំណោះស្រាយឲ្យពួកគេឲ្យបានឆាប់រហ័ស។
ពលរដ្ឋទាំងនោះមកពីខេត្តចំនួន៤រួមមានខេត្តស្វាយរៀង កណ្តាល ត្បូងឃ្មុំ និងខេត្តព្រះសីហនុ។ ពួកគេនាំគ្នាដាក់ញាត្តិនៅទីស្តីការគណៈរដ្ឋមន្ត្រី ក្រសួងដែនដី និង រដ្ឋសភា ដើម្បីសុំឲ្យជួយដោះស្រាយបញ្ហារបស់ពួកគេ ដែលអូសបន្លាយជាយូរឆ្នាំមកហើយ ដែលក្នុងនោះមានករណីខ្លះអូសបន្លាយជាង៣០មកហើយ។
ពលរដ្ឋតវ៉ាម្នាក់ដែលមកពីឃុំចុងក្រវៀន ស្រុកមេមត់ ខេត្តត្បូងឃ្នុំ លោក កង ស្រស់ ថា លោកស្នើសុំឲ្យនាយករដ្ឋមន្ត្រីជួយពន្លឿនការចុះបញ្ជីប្លង់កម្មសិទ្ធិស្របច្បាប់ឲ្យពួកគេឲ្យបានឆាប់ព្រោះពួកគាត់បារម្ភពីទំនាស់ដែលអាចកើតមានដោយសារការពន្យារធ្វើប័ណ្ណរបស់អាជ្ញាធរថ្នាក់ក្រោម។
លោកថា៖ «មានក្រដាសស្នាមហៅពលរដ្ឋមកប្រជុំនៅសាលាឃុំចុងក្រវៀនថា ដីនោះខាងក្រសួងដែនដីគេប្រកាសកាត់ឲ្យហើយ តែដល់ពេលប្រជាពលរដ្ឋទៅបញ្ជាក់អត្តសញ្ញាណកម្មដើម្បីធ្វើប្លង់ ខាងអាជ្ញាធរថាដីនៅពាក់ព័ន្ធជាមួយក្រុមហ៊ុន»។
ពលរដ្ឋមានទំនាស់ដីធ្លីដែលចោទថា មេភូមិលួចលក់ដីទៅឲ្យក្រុមហ៊ុនតាំងពីឆ្នាំ១៩៨៦ នៅឃុំអំពិលព្រៃ ស្រុកកណ្តាលស្ទឹង ខេត្តកណ្តាល អ្នកស្រី ហួរ លាភ បានឲ្យអ្នកសារព័ត៌មានដឹងថា ពួកអ្នកស្រីទាមទារចង់ឲ្យរដ្ឋាភិបាលសាររើឡើងវិញ។
អ្នកស្រីថា៖ «មិនជាលក់ឲ្យក្រុមហ៊ុនណាខ្ញុំអត់ដឹង! ទៅដល់ឃុំ ពេលពួកខ្ញុំផ្អើលគេថាប្រជាពលរដ្ឋដូចខ្ញុំពេលដីឡើងថ្លៃបាននាំគ្នាសើរើ ពេលនៅថោកអត់ទេ គាត់ថាអញ្ចឹង។ ដល់ពេលឥឡូវហ្នឹងប្រជាពលរដ្ឋខ្ញុំគាត់អត់ព្រម! មិចព្រម! គាត់ឲ្យឡើងទៅមេឃុំម្តងទៀត ខ្ញុំថាអត់ទេខ្ញុំឡើងមកសភាហើយ ព្រោះដំណោះស្រាយតាំងពី៨៦ មកដល់ឥឡូវគាត់អត់ដោះស្រាយឲ្យ»។
ពលរដ្ឋដែលមានទំនាស់ដីធ្លីមកពីខេត្តព្រះសីហនុអ្នកស្រី ឡុច ទូច ដែលបានដាក់ញាត្តិនៅថ្ងៃនេះផងដែរនោះថាក្រុមអ្នកស្រីតំណាងឲ្យជាង៦០គ្រួសាររស់នៅភូមិ៤ សង្កាត់អូត្រេះ ស្រុកស្ទឹងហាវដែលមានទំនាស់ដីធ្លីតាំងពីឆ្នាំ២០០៧ ជាមួយអ្នកមានអំណាចក្នុងខេត្ត។ អ្នកស្រីថា ពេលនេះពួកគាត់មិនត្រឹមបាត់បង់ដីធ្លីទេ ហើយរងការគំរាមកំហែងទៀតផង។
ប្រធានខទ្ទុការល័យនាយករដ្ឋមន្ត្រីលោកប៉ាល់ ច័ន្ទតារា ដែលចេញមកទទួលញាត្តិពីពលរដ្ឋថាលោកនឹងពិនិត្យទៅលើពាក្យបណ្តឹងទាំងនោះ នឹងរៀបចំជូនប្រធានអាជ្ញាធរជាតិដោះស្រាយវិវាទដីធ្លីលោក ប៊ិន ឈិន ដើម្បីពិនិត្យដោះស្រាយជួនពលរដ្ឋទាំងនោះ។
មន្ត្រីសម្របសម្រួលសហគមន៍នៃសម្ព័ន្ធកសិករកម្ពុជា លោក ញឹល ភាព មើលឃើញថារដ្ឋាភិបាលបានជួយដោះស្រាយបញ្ហាវិវាទដីធ្លីរបស់ប្រជាពលរដ្ឋបានកម្រិតទាបនៅឡើយ លោកជំរុញឲ្យរដ្ឋាភិបាលពិចារណាជួយដោះស្រាយបញ្ហានេះឲ្យបានច្បាស់លាស់ជាងនេះ។
នៅព្រឹកនេះ ពលរដ្ឋដែលធ្វើដំណើរពីខេត្តស្វាយរឿង និង ខេត្តកណ្តាលចំនួន៣ក្រុមត្រូវបានអាជ្ញាធររារាំង និង ឃាត់សាកសួរ មុនអនុញ្ញាតឲ្យបន្តដំណើរដើម្បីដាក់ញត្តិនៅភ្នំពេញ៕