គណបក្សសំបុកឃ្មុំ បានធ្វើសមាជវិសាមញ្ញកាលពីថ្ងៃទី១១ខែមីនា ហើយសម្រេចឲ្យលោក ម៉ម សូណង់ដូ ធ្វើជាប្រធានគណបក្សនេះវិញក្រោយប្រកាសលាឈប់មួយរយៈ។
នៅលើទំព័រហ្វេសប៊ុករបស់គណបក្សសំបុកឃ្មុំសង្គមប្រជាធិបតេយ្យលើកឡើងថា៖«គណបក្សសំបុកឃ្មុំសង្គមប្រជាធិបតេយ្យ បានធ្វើកម្មវិធីប្រជុំសមាជវិសាមញ្ញ ដើម្បីអញ្ជើញលោក ម៉ម សូណង់ដូ ធ្វើជាប្រធានគណបក្សសំបុកឃ្មុំសង្គមប្រជាធិបតេយ្យឡើងវិញ។ លោក ម៉ម សូណង់ដូ បានត្រឡប់មកធ្វើជាប្រធានគណបក្សសំបុកឃ្មុំសង្គមប្រជាធិបតេយ្យឡើងវិញ»។
លោក ម៉ម សូណង់ដូ បានប្រាប់VOD នៅថ្ងៃនេះថា ក្រោយពីគណបក្សសង្គ្រោះជាតិត្រូវបានតុលាការរំលាយ និងដកសិទ្ធិតំណាងរាស្ត្រ១១៨រូប កាលពីខែវិច្ឆិកា ឆ្នាំមុន មិនឲ្យចូលធ្វើនយោបាយ ជាពិសេសលោក សម រង្ស៊ី និរន្ទេសខ្លួនទៅក្រៅប្រទេស ហើយលោក កឹម សុខា ជាប់ពន្ធនាគារ ធ្វើឲ្យបាត់បង់អ្នកប្រជាធិបតេយ្យ ដើម្បីចូលរួមប្រកួតប្រជែងជាមួយបក្សកាន់អំណាច។
ករណីនេះលោក សូណង់ដូ បញ្ជាក់ថា ធ្វើឲ្យលោកសម្រេចដើរចូលបក្សសំបុកឃ្មុំវិញ ដើម្បីបន្តលើកស្ទួយប្រជាធិបេយ្យនៅកម្ពុជាឡើងវិញ។
លោកប្រាប់ថា «យើងជ្រើសរើសប្រជាធិបតេយ្យសេរីពហុបក្ស មានអ្នកគ្រប់គ្រង មានអ្នកប្រឆាំងកែតម្រូវ ហើយឥឡូវគណបក្សប្រឆាំងរលាយ ហើយពូនឹកឃើញថា នៅក្នុងបេះដូងប្រជាពលរដ្ឋមាន៣គឺលោក សម រង្ស៊ីនៅក្រៅប្រទេសគាត់អត់អាចចូលបាន ហើយលោក កឹម សុខា គាត់នៅក្នុងគុក…ពូត្រូវធ្វើអ្វីមួយ ដើម្បីបន្តសកម្មភាពទៅមុខតទៅទៀត…កាតព្វកិច្ចពូត្រូវតែចូលរួមលើកទង់ជ័យអ្នកប្រជាធិបតេយ្យបន្តទៀត»។
លោក ម៉ម សូណង់ដូ ប្រកាសឈប់ធ្វើនយោបាយ និងលាលែងពីតំណែងប្រធានវិទ្យុសំបុកឃ្មុំកាលពីដើមខែមករា ឆ្នាំ២០១៨ ដោយថា ដើម្បីទុកឱកាសឲ្យមនុស្សជំនាន់ក្រោយជាអ្នកបន្តវេន ខណៈតុលាការបង្គាប់ឲ្យចូលបំភ្លឺនៅខែនេះ ក្នុងសំណុំរឿងចោទប្រកាន់ លោក កឹម សុខា ថា«ក្បតិជាតិ»។
លោក ម៉ម សូណង់ដូ ត្រូវបានគេស្គាល់លោកតាមរយៈការផ្សាយសំឡេងរបស់វិទ្យុសំបុកឃ្មុំ ការធ្វើបទសម្ភាសន៍ទាក់ទិននឹងព្រឹត្តិការណ៍នយោបាយ បញ្ហាទំនាស់ដីធ្លី និងបញ្ហាព្រំដែនជាដើម ជាពិសេស តាមរយៈកំណាព្យរបស់លោកដែលមានចំណងជើងថា “តើខ្ញុំអាចរស់បានដល់ពេលណា?“។
ប៉ុន្តែបុរសដែលមានអាយុជាង ៧០ឆ្នាំរិះគន់រដ្ឋាភិបាលឥតសំចៃមាត់រូបនេះ ត្រូវបានតុលាការចាប់ដាក់ពន្ធនាគារចំនួន ៣ដងរួចមកហើយ ក្នុងសំណុំរឿងកុប្បកម្មប្រឆាំងថៃនៅកម្ពុជាអំឡុងឆ្នាំ២០០៣ សំណុំរឿងសន្ធិសញ្ញាព្រំដែនបំពេញបន្ថែមឆ្នាំ២០០៥ និងចុងក្រោយ គឺសំណុំរឿងតំបន់អប្បគមន៍នៅឃុំប្រម៉ាក្នុងខេត្តក្រចេះ៕