អ្នករាយការណ៍ពិសេសអង្គការសហប្រជាជាតិ លោកស្រី រ៉ូណាស្មីត ចោទសួររដ្ឋមន្ត្រីក្រសួងមហាផ្ទៃ ពីករណីបាញ់ប្រហារនៅខេត្តក្រចេះ។
ប្រធាននាយកដ្ឋានទំនាក់ទំនងអន្តរជាតិរបស់ក្រសួងមហាផ្ទៃ លោក ផាត សុផានិត បានឲ្យអ្នកសារព័ត៌មាន ដឹងបន្ទាប់ពីជំនួបរយៈពេលជិត២ម៉ោង រវាងរដ្ឋមន្ត្រីក្រសួងមហាផ្ទៃ លោក ស ខេង និងលោកស្រី រ៉ូណា ស្មីត នៅរសៀលថ្ងៃទី១២ មីនា នេះថា លោកស្រី រ៉ូណា ស្មីត បានសួរកិច្ចការអនុវត្តន៍ច្បាប់របស់អាជ្ញាធរកម្ពុជាមួយចំនួន ក្នុងនោះរួមទាំងការវិវត្តន៍ថ្មីនៃករណីបាញ់ប្រហារនៅខេត្តក្រចេះ។
បើតាមលោក ផាត សុផានិតគឺ លោកស ខេង បានឆ្លើយតបថា លោកបានទទួលរបាយការណ៍បឋម និងបានចាត់មន្ត្រីទៅពិនិត្យបន្ថែមចំពោះករណីនេះហើយ។
លោកថា៖ «គាត់បានជម្រាបសួរសម្តេចថា សម្តេចបានទទួលបានរឿងអីបន្ថែម ចំពោះករណីនៅខេត្តក្រចេះទេ? សម្តេចថា នៅពេលនេះសម្តេច បានទទួលព័ត៌មានបឋមមួយចំនួនដែរ។ តែសម្តេច បានចាត់ក្រុមពីក្រសួងមហាផ្ទៃមានទាំងខាងនគរបាល មានទាំងអធិការកិច្ច ទៅធ្វើការស្រាវជ្រាវបន្ថែម ទៅលើករណីដែលកើតឡើងនៅក្រចេះនេះ។ ហើយរហួតមកទល់ពេលនេះ សម្តេច ក៏ពុំទាន់បានរបាយការណ៍អ្វីបន្ថែម ពីក្រុមការងារនេះដែរ។ ពេលដែលបានទទួលយ៉ាងណាៗ នោះសម្តេចនឹងធ្វើការបន្តទៀតនៅពេលដែលទទួលបានលទ្ធផល» ។
កាលពីថ្ងៃទី៨ខែមីនា មានហេតុការណ៍សមត្ថកិច្ចបាញ់ប្រហារលើប្រជាពលរដ្ឋដែលតវ៉ាករណីដីធ្លី។ ក្រោយកើតហេតុប្រជាពលរដ្ឋនិងសមត្ថកិច្ចបកស្រាយខុសគ្នា។
ពលរដ្ឋថា សមត្ថកិច្ចចូលទៅដុតផ្ទះរបស់អ្នកភូមិ ដើម្បីយកដីឲ្យក្រុមហ៊ុនដាំកៅស៊ូរបស់វៀតណាម ក្រោយមកពលរដ្ឋផ្ទុះការតវ៉ា ទើបសមត្ថកិច្ចបាញ់បង្ក្រាបបណ្តាលឲ្យស្លាប់៨នាក់ និង របួសជាង៤០នាក់ ខណៈអាជ្ញាធរខេត្តក្រចេះបានប្រកាសថា ពលរដ្ឋតវ៉ាបិទផ្លូវ ហើយប្រើប្រាស់កាំបិត ពូថៅ និងដំបងជាដើម វាយប្រហារលើសមត្ថកិច្ចទើបមានការបាញ់បង្ក្រាបកើតឡើង។
អាជ្ញាធរអះអាងថា ក្នុងហេតុការណ៍ផ្ទុះអាវុធនេះ មិនមានអ្នកស្លាប់ទេគឺ មានអ្នករងរបួសចំនួន៩នាក់ ហើយក្នុងនោះមានពលរដ្ឋ២នាក់និងសមត្ថកិច្ច៧នាក់។
កាលពីថ្ងៃទី១០ មីនា មន្ត្រីការិយាល័យឧត្តមស្នងការអង្គការសហប្រជាជាតិ អះអាងថា ពួកគេមិនអាច ចូលទៅកាន់ទីតាំងដែលមានការបាញ់ប្រហារពីសមត្ថកិច្ចលើពលរដ្ឋតវ៉ារឿងដីធ្លី នៅស្រុកស្នួលខេត្តក្រចេះបានទេ។
អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត បានចាប់ផ្ដើមទស្សនកិច្ចនៅកម្ពុជា ចាប់ពីថ្ងៃទី៥ រហូតដល់ថ្ងៃទី១៤ខែមីនា ក្នុងគោលបំណងធ្វើរបាយការណ៍សិទ្ធិមនុស្សប្រចាំឆ្នាំ ដាក់ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ នាខែកញ្ញាឆ្នាំ២០១៨៕
