អាជ្ញាធររាជធានីភ្នំពេញ នៅថ្ងៃនេះ បានរារាំងស្ត្រីអ្នកតវ៉ានៅតំបន់បឹងកក់ មិនឲ្យចូលទៅដាក់ញត្តិនៅធនាគារពិភពលោកតាមការគ្រោងទុក ខណៈពួកគេធ្វើយុទ្ធនាការថ្មីទៀត ស្វែងរកការដោះលែងតំណាងពួកគេ គឺអ្នកស្រី ទេព វន្នី ដែលកំពុងឃុំខ្លួននៅពន្ធនាគារព្រៃស។
តំណាងអ្នកតវ៉ា អ្នកស្រី បូវ សោភា ឲ្យដឹងថា នៅថ្ងៃនេះពួកគេនឹងដាក់ញត្តិទៅស្ថានទូតអាមេរិក ធនាគារពិភពលោក និងស្ថានទូតបារាំងបន្ថែមទៀត ក្រោយពីបានដាក់នៅ UN ស្ថានទូតជប៉ុន និងសហភាពអឺរុបកាលពីសប្តាហ៍មុន។
ប៉ុន្តែអ្នកស្ត្រីថា គម្រោងដាក់ញត្តិនៅធនាគារពិលោកបានបរាជ័យ ដោយថាអាជ្ញាធរខណ្ឌដូនពេញ បានរារាំង និងគំរាមចាប់ខ្លួន បើពួកគេនៅតែបន្តរុលទៅមុខតាមការគ្រោងទុក ប្រឆាំងនឹងបំរាមរបស់អាជ្ញាធរ។
អ្នកស្រី បូវ សោភា យល់ថា ការរារាំងរបស់អាជ្ញាធរនេះ ហាក់បង្ហាញថា សេរីភាពបញ្ចេញមតិដោយសន្តិវិធី ដែលការពារដោយច្បាប់ ត្រូវបានរំលោភបំបានយ៉ាងធ្ងន់ធ្ងរ។
ប៉ុន្តែសម្រាប់អាជ្ញាធរ ដែលចុះរារាំងវិញអះអាងថា ការទប់ស្តាត់បែបនេះ ដើម្បីរក្សាសណ្តាប់ធ្លាប់សាធារណៈ។
តំណាងអ្នកភូមិបឹងកក់ដ៏លេចធ្លោ អ្នកស្រី ទេព វន្នី ត្រូវបានអាជ្ញាធរចាប់ខ្លួន ជាថ្មីទៀត អំឡុងឆ្នាំ២០១៦ ក្រោយពីស្តីរូបនោះ នៅតែបន្តដឹកនាំតវ៉ា ជំរុញឲ្យមានយុត្តិធម៌ក្នុងសង្គម។
មកដល់ពេលនេះ តុលាការបានសម្រេចឲ្យឃុំខ្លួន អ្នកស្រី ទេព វន្នី ជិតមួយឆ្នាំហើយ ចោទពីបទ ប្រើហិង្សា លើមន្ត្រីសាធារណៈ ខណស្ត្រីរូបនោះនៅបន្តដឹកនាំធ្វើយុទ្ធនាការ ជំរុញឲ្យរដ្ឋាភិបាល វែកមុខអ្នកនៅពីក្រោយការបាញ់សម្លាប់លោក កែម ឡី នឹងអំពាវនាវឲ្យដោះលែងមន្ត្រីអាដហុក មន្ត្រី គជប ទាំង៥រូបដែលកំពុងជាប់ឃុំ៕
