គ.ជ.ប បានលើកឡើងថារហូតមកដល់ពេលនេះទើបតែមានបក្សនយោបាយ ៣ ប៉ុនណោះដែលត្រូវបានទទួលស្គាល់ក្នុងបញ្ជីឈ្មោះបោះឆ្នោតផ្លូវការ ខណៈបក្ស ២០ ទៀតបានដាក់ពាក្យ និងកំពុងបំពេញបែបបទដើម្បីចូលរួមប្រកួតប្រជែង។
គណកម្មាធិការជាតិរៀបចំការបោះឆ្នោតបានលើកឡើងបែបនេះ ក្នុងសេចក្ដីប្រកាសព័ត៌មានមួយចុះថ្ងៃទី ១១ ខែ ឧសភា ខណៈការកំណត់បិទការចុះបញ្ជីបក្សនយោបាយឈរឈ្មោះបោះឆ្នោតសល់តែ ៣ ថ្ងៃទៀតប៉ុនណោះ។
គ.ជ.ប បានបង្ហាញថាគណបក្សចំនួន ៣ ដែលត្រូវបានសម្រេចប្រកាសទទួលស្គាល់ការចុះបញ្ជីផ្លូវការ មានបក្សប្រជាជនកម្ពុជាឈរឈ្មោះទាំង ២៥ រាជធានីខេត្ត បក្សសញ្ញាតិកម្ពុជាឈរឈ្មោះ ១៧ រាជធានីខេត្ត និងបក្សយុវជនកម្ពុជា ឈរឈ្មោះនៅ ២៥ រាជធានីខេត្ត។
គ.ជ.ប បន្តថារហូតមកដល់ថ្ងៃនេះដែរមានបក្សចំនួន ៦ ទៀតបានដាក់ពាក្យរួចរាល់មានដូចជាបក្សខ្មែររួបរួមជាតិ បក្សហ៊្វុនស៊ិនប៉ិច បក្សខ្មែរតែមួយ បក្សប្រជាធិបតេយ្យមូលដ្ឋាន បក្សសំបុកឃ្មុំ និងបក្សពន្លឺថ្មី។
គ.ជ.ប បន្ថែមដែរថាបក្សនយោបាយចំនួន៨ទៀតបានកំពុងបំពេញលក្ខខណ្ឌកម្ដល់លុយ ១៥ លានរៀននៅរតនាគាជាតិ មានដូចជាបក្សប្រជាធិបតេយ្យថ្មី បក្សខ្មែរអភិវឌ្ឍសេដ្ឋកិច្ច បក្សខ្មែរឈប់ក្រ បក្សធម្មាធិបតេយ្យ បក្សសម្ព័ន្ធដើម្បីប្រជាធិបតេយ្យ បក្សខ្មែរក្រោក បក្សសាធារណរដ្ឋខ្មែរប្រជាធិបតេយ្យ និងបក្សមាតុភូមិយើង។
បន្ថែមលើនោះទៀតមានបក្សចំនួន ៦ ទៀតបានទទួលទម្រង់១០០៨ ពាក្យសុំចុះបញ្ជីពី គ.ជ.ប មានគណបក្សកសិករ បក្សខ្មែរសាធារណរដ្ឋ បក្សជនជាតិដើមប្រជាធិបតេយ្យកម្ពុជា បក្សរស្មីខេមរា បក្សឆន្ទៈខ្មែរ និង បក្សចលនាប្រជាធិបតេយ្យ៕