លោក ហ៊ុន សែន៖ កុំគិតតែអភិរក្ស មិនគិតអភិវឌ្ឍ ហើយគិតតែអភិវឌ្ឍ មិនគិតអភិរក្ស

ប្រភពរូបភាពពីហ្វេសប៊ុកលោកនាយករដ្ឋមន្រ្តី ហ៊ុន សែន

លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានជំរុញឲ្យអ្នកជំនាញវប្បធម៌ សិក្សាឲ្យបានច្បាស់លាស់ថាតើតំបន់ណាដែលត្រូវអភិរក្ស និងតំបន់ណាដែលត្រូវឲ្យមានការអភិវឌ្ឍ។

លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានជំរុញឲ្យអ្នកជំនាញវប្បធម៌ សិក្សាឲ្យបានច្បាស់លាស់ថាតើតំបន់ណាដែលត្រូវអភិរក្ស និងតំបន់ណាដែលត្រូវឲ្យមានការអភិវឌ្ឍ។

ការលើកឡើងដូចនេះ របស់ លោក ហ៊ុន សែន គឺនៅក្នុងសន្និសីទអន្តរជាតិស្តីពី ទេសចរណ៍ ក្រោមប្រធានបទ «ការអភិរក្ស និងការការពារទីក្រុងបេតិកភណ្ឌ» ដែលធ្វើឡើងនៅខេត្តសៀមរាប។

លោក ហ៊ុន សែន ថ្លែងថា នៅទីក្រុងមានអគារចាស់ទ្រុឌទ្រោមជាច្រើនដែលអង្គការយូណេស្កូលើកពីគម្រោងឲ្យអភិរក្សប៉ុន្តែលោកថាតំបន់នោះចាំបាច់ត្រូវតែអភិវឌ្ឍ។ លោកថា «យើងទុកផ្ទះរាប់រយដើម្បី​អភិរក្ស។ ពេលនោះប្រជាជនមានការស្រែកខ្លាំងណាស់! ខ្ញុំបានទៅមើលដល់ទីកន្លែងវាស្ទើរតែបាក់ទៅហើយ។ ​ហើយអ្នក​ដែល​ត្រូវការដីធ្លីកន្លែងនោះ គឺត្រូវការធ្វើ​ផ្ទះ​ស្អាត គេមិនមែនត្រូវការនៅក្នុង​កន្លែងនោះទេ។ ​ប៉ុន្តែបែរជាយើង​លើក​បញ្ជីយ៉ាងច្រើនដើម្បីធ្វើការអភិរក្ស។ អីចឹងមានពេលមួយខ្ញុំនិយាយត្រង់ហ្មង! ជាមួយអភិបាលក្រុងភ្នំពេញ ខ្ញុំថាឲ្យយូណេស្កូយកលុយមកទិញផ្ទះហ្នឹងទាំងអស់ទៅ! បើមិនអីចឹងទេ អ្នកមានផ្ទះមានដី ទុកអាហ្នឹងស្ទើរតែបាក់ហើយ ចេះតែទុកទៅ?»

ទោះជាយ៉ាងណា លោកនាយករដ្ឋមន្រ្តី លើកឡើងថា អគារចាស់ៗរបស់រដ្ឋគួរតែថែរក្សាទុក ប៉ុន្តែមិនអាចរក្សាទុកអាគារពេញមួយទីក្រុងទាំងអស់នោះទេ។

​អគារ​ប៊ូឌីង ជាអគារចំណាស់មួយតាំងពីទស្សវត្ស៦០ ត្រូវ​បានរដ្ឋាភិបាលប្រគល់ឲ្យ​ក្រុមហ៊ុនជប៉ុនវិនិយោគទឹក​ប្រាក់​គម្រោង​ប្រមាណ ៨០​លាន​ដុល្លារ​សហរដ្ឋ​អាមេរិក ហើយពលរដ្ឋនៅ​ទីនោះ​បានយល់ព្រមទទួលសំណងជាថ្នូរចាកចេញ។

បើតាមអង្គការយូណេស្កូ ទីក្រុងចំនួន៣ នឹងត្រូវដាក់ជាទីក្រុងបេតិកភណ្ឌពិភពលោក រួមមាន ទីក្រុងសបាត់ដំបង ទីក្រុងស្ទឹងសែន ខេត្តកំពង់ធំ និងទីក្រុងកំពត ៕

CCIM/VOD

រក្សាសិទ្វិគ្រប់យ៉ាង។ គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។