ប្រធានគណបក្សសង្គ្រោះជាតិបានថ្លែងថា ក្នុងការបោះឆ្នោតថ្នាក់ជាតិឆ្នាំ២០១៨ ខាងមុខ លោកចង់ឲ្យមានការប្រកួតប្រជែងមួយដោយគ្មានការគំរាមកំហែងពីបក្សណាមួយ និងថាគួរតែប្រកួតគ្នាពីគោលនយោបាយវិញម្តង។
ប្រធានគណបក្សសង្គ្រោះជាតិលោក កឹម សុខា នៅព្រឹកថ្ងៃទី១២ មិថុនានេះបានថ្លែងមិនចំឈ្មោះតែហាក់ដូចជាសំដៅទៅលើបក្សប្រជាជនកម្ពុជាថាបើបក្សនេះចង់រក្សាសំឡេងឆ្នោតរបស់ខ្លួននោះ សុំកុំឲ្យលោក ហ៊ុន សែន ប្រើភាសាគំរាមក្នុងពេលឃោសនាបោះឆ្នោតឆ្នាំ២០១៨ខាងមុខ ដូចការឃោសនាឆ្នាំ២០១៧នេះ។ ក្នុងពេលចុះអរគុណដល់អ្នកគាំទ្រ នៅខេត្តកំពង់ លោកបន្ថែមថាគួរតែប្រកួតដោយប្រើពីគោលនយោបាយវិញ ព្រោះថាការឃោសនាដោយការគំរាមពេលបច្ចុប្បន្ននេះវាហាក់ដូចជាលែងមានប្រសិទ្ធភាពទៅហើយ។
លោកថា៖ «យើងចង់បង្កើតនូវវប្បធម៌មួយពីថ្ងៃនេះទៅយើងសុំប្រកួតគ្នា ប្រកួតពីគោលនយោបាយដើម្បីគិតពីអនាគតប្រទេសជាតិ និងប្រជាពលរដ្ឋកម្ពុជាដាក់ជូនប្រជាពលរដ្ឋជាអ្នកសម្រេចបោះឆ្នោតឲ្យទៅចុះ។…ដូចតំបន់ខ្លះដែលគណបក្សសង្គ្រោះជាតិឡើងខ្លាំងនេះ ហើយគំរាមៗ មានគំរាមបានតើកំពង់ធំ សៀមរាបអ្នកណាដែលក្រជាងអ្នកជនបទនៅសៀមរាប មានអង្គរវត្តមួយហើយនៅតែក្រទៀតនៅសៀមរាប។ អ្នកណាដែលជម្លៀសចេញកូនចៅចេញទៅក្រៅបាត់អស់ច្រើនជាងអ្នកបាត់ដំបង អ្នកបន្ទាយមានជ័យ កសិផលរកទីផ្សារមិនបានអញ្ចឹងហើយអ្នកទាំងអស់នោះគេអត់ខ្លាចការគម្រាមទេ។ គេត្រូវការការផ្លាស់ប្តូរ ដើម្បីកុំឲ្យគំរាម បើចង់បានសន្លឹកឆ្នោតវិញ គឺកុំគំរាមទៅនឹងប្រហែលជាបានសំឡេងឆ្នោតខ្លះហើយ»។
លោកបានបញ្ជាក់ថា គណបក្សសង្គ្រោះជាតិ បានឈ្នះមេឃុំ និងចៅសង្កាត់ជិត៥០០ និងចំនួនក្រុមប្រឹក្សាជិត៥០០០នាក់ ក្នុងការបោះឆ្នោតឆ្នាំ២០១៧នេះ ដែលស្នើនឹងជិតពាក់កណ្តាលនៃសមាជិកក្រុមប្រឹក្សាឃុំសង្កាត់ទូទាំងប្រទេស ដែលចំនួននេះគឺកើនឡើងយ៉ាងច្រើនបើធៀបទៅនឹងឆ្នាំ២០១២។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា មានប្រសាសន៍ថាការថ្លែងរបស់លោក កឹម សុខា នេះជាការថ្លែងឲ្យរួចពីមាត់ខ្លួនប៉ុណ្ណោះ និងថាជាការបិទបាំងភាពអៀនខ្មាសរបស់ខ្លួនចំពោះការបោះឆ្នោតឆ្នាំ២០១៧។ លោកបន្ថែមថាការថ្លែងពីសង្គ្រាមរបស់លោកនាយករដ្ឋមន្ត្រីគឺមិនមែនជាការគំរាមនោះទេគឺគ្រាន់តែរំលឹកពីប្រវត្តិសាស្ត្រដើម្បីឲ្យប្រជាពលរដ្ឋដឹងប៉ុណ្ណោះ។
លោកថា៖ «គាត់និយាយយកតែរួចខ្លួនរាល់តែពេល កឹម សុខា ជាមនុស្សដែលនិយាយមិនទទួលខុសត្រូវ គាតនិយាយឲ្យតែបាននិយាយ។ ដូចជាការបោះឆ្នោតលើកនេះមានអ្នកណាទៅគំរាមកំហែង លទ្ធផលដែលគាត់ទស្សទាយថាបាន៧០% គាត់ទទួលបាន៧០%ពីពេលណាមកអត់មានទេ! អញ្ចឹងឆ្នាំក្រោយនេះគាត់និយាយដើម្បីបិទបាំងភាពអៀនខ្មាសរបស់គាត់ទេ។ … ដូចខ្ញុំនិយាយអញ្ចឹង សង្គ្រាមឬមិនសង្គ្រាមវាមិនមែនជាការឃោសនារបស់បក្សប្រជាជនកម្ពុជាទេ! គណបក្សប្រជាជនកម្ពុជាពឹងលើគោលការ ពឹងលើផែនការធ្វើមិចឲ្យប្រជាជនរស់នៅបានល្អ ប្រជាជនកាន់តែប្រសើទទួលបានសេវាសាធារណៈកាន់តែល្អតែប៉ុនហ្នឹង»។
ក្នុងអំឡុងពេលយុទ្ធនាការបោះឆ្នោតឃុំ សង្កាត់ ឆ្នាំ២០១៧នេះ ប្រធានបក្សប្រជាជនកម្ពុជាលោក ហ៊ុន សែន ជាញឹកញយតែងតែថ្លែងពីលទ្ធភាពនៃសង្គ្រាមលើកម្ពុជាប្រសិនជាបក្សប្រជាជនមិនបានដឹកនាំប្រទេសបន្តទៀត។
សាស្ត្រាចារ្យវិទ្យាសាស្ត្រនយោបាយលោក សូ ចន្ថា មានប្រសាសន៍ថាឆ្លងតាមរយៈបោះឆ្នោតឆ្នាំ២០១៧ រួចមក អាចបញ្ជាក់បានថាការលើកឡើងពីសង្គ្រាមដោយលោកហ៊ុន សែននេះវាមានប្រសិទ្ធិភាពតែបន្តិចបន្តួចប៉ុណ្ណោះទៅលើលទ្ធផលឆ្នោត។ លោកបន្ថែមថា ក្នុងការបោះឆ្នោតខាងមុខគ្រប់គណបក្សនយោបាយគួរតែលើកយកពីគោលនយោបាយរបស់ខ្លួនមកប្រកួតប្រជែងវិញទើបជាការប្រកួតមួយដែលស្មោះត្រង់ ផ្តល់ផលចំណេញដល់ពលរដ្ឋ និងប្រទេសជាតិ។
លោកថា៖ «ខ្ញុំមើលជាទូទៅការគំរាមកំហែងនៅមានប្រសិទ្ធិភាពចំនួនភាគរយតិច ជាពិសេសពលរដ្ឋដែលមានវ័យចំណាស់ដែលឆ្លងកាត់នៅសង្គ្រាមឆ្លងកាត់នូវទុកសោកអីពីអតីតកាលនោះ។ ក៏ប៉ុន្តែសម្រាប់មនុស្សវ័យកណ្តាលជាមួយយុវជន ការគំរាមបែបនេះគឺមិនមានឥទ្ធិពលថែមទៀតនោះទេ។ ជាបទពិសោធន៍នាឆ្នាំ២០១៣ យើងឃើញមានការគំរាមកំហែងដែរ ឃើញថាបក្សកាន់អំណាចថយអាសនៈចំនួនប្រហែលជា២២ ហើយឆ្នាំ២០១៧នេះលទ្ធផលឆ្នោតបើទោះបីមិនទាន់ចេញជាផ្លូវការខ្ញុំមើលទៅបក្សកាន់អំណាចដូចជាថយអាសនៈថយចុះច្រើន»។
បើតាមលោក សូ ចន្ថា ជាជាងការថ្លែងគំរាមពីសង្គ្រាមនោះគណបក្សប្រជាជនគួរតែលើកយកបញ្ហាដែលកម្ពុជាកំពុងជួបប្រទះចំនួន៣ធំៗមកឃោសនាវិញ។ គោលនយោបាយចំនួន៣នោះ មានដូចជាការការកែទម្រង់ប្រព័ន្ធយុត្តិធម៌សង្គម ការកែទម្រង់វិស័យសុខាភិបាល និងការលើកកម្ពស់ផលិតកម្ម និងទីផ្សារកសិកកម្ម នោះលោកថាវាពិតជាអាចទាក់ទាញការគាំទ្រពីប្រជាជនបាន៕