គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃនេះ បានសម្រេចរាប់សន្លឹកឆ្នោតឡើងវិញចំនួន ២៣ ការិយាល័យនៅក្នុងឃុំដូង ស្រុករមាសហែក ខេត្តស្វាយរៀង បន្ទាប់ពីគណបក្សសង្គ្រោះជាតិនិងគណបក្សប្រជាជនកម្ពុជា មិនសុខចិត្តចំពោះការរាប់សន្លឹកឆ្នោតនៅថ្នាក់ខេត្ត។
ការរាប់សន្លឹកឆ្នោតព្រឹកមិញនេះ ក៏មានការតវ៉ាពីខាងគណសង្គ្រោះជាតិ ខណៈដែលក្រុមបច្ចេកទេសសម្រេចយកសន្លឹកឆ្នោត១សន្លឹកដែលមានគូសសញ្ញានៅខាងមុខចំគណបក្សប្រជាជនកម្ពុជា ហើយខាងក្រោយខ្នងសន្លឹកគូសឆ្នូត៥ចំណុច និងមានគូសលើត្រាសម្ងាត់ ប៉ុន្តែក្រុមអ្នករាប់សន្លឹកឆ្នោតបានសម្រេចផ្ដល់ឲ្យគណបក្សប្រជាជកម្ពុជា។ សម្រាប់ករណីនេះ គណបក្សសង្គ្រោះជាតិចាត់ទុកសន្លឹកឆ្នោតនោះថាមិនបានការ ហើយគណបក្សប្រជាជនកម្ពុជាក៏តវ៉ាដែរ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា ចំពោះលទ្ធផលនៃការរាប់សន្លឹក គ.ជ.ប មិនច្បាស់ថានឹងប្រកាសថ្ងៃនេះឬនៅស្អែកនោះទេ ដោយថាអាស្រ័យទៅលើគណបក្សទាំងពីរទទួលយកឬអត់។
បើតាមលទ្ធផលបោះឆ្នោតបឋមនៅក្នុងឃុំដូង ស្រុករមាសហែក ខេត្តស្វាយរៀង ដែល គ.ជ.ប បានចុះផ្សាយក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ កាលពីថ្ងៃទី៤ មិថុនា កន្លងទៅ ឲ្យដឹងថា គណបក្សសង្គ្រោះជាតិ ទទួលបានសំឡេងឆ្នោតចំនួន ២.៥៩៩សំឡេង ដោយនាំមុខគណបក្សប្រជាជនកម្ពុជា ចំនួន ៣សំឡេង ហើយគណបក្សប្រជាជនកម្ពុជាទទួលបានសំឡេងឆ្នោត ចំនួន ២.៥៩៦សំឡេង៕
