ក្រសួងកសិកម្ម រុក្ខាប្រមាញ់ និងនេសាទ ប្រកាសអនុញ្ញាតឲ្យក្រុមហ៊ុនធ្វើពាណិជ្ជកម្មថ្នាំកសិកម្មនាំចូល និងចែកចាយថ្នាំកសិកម្មឡើងវិញ ក្រោយក្រសួងនេះបានផ្អាកការនាំចូលនិងចែកចាយមួយរយៈបន្ទាប់ពីមានពលរដ្ឋពុលស្លាប់នៅខេត្តក្រចេះ។
សេចក្ដីប្រកាសព័ត៌មានរបស់ក្រសួងកសិកម្មរុក្ខាប្រមាញ់ និងនេសាទ ចេញផ្សាយនៅថ្ងៃទី១២ ខែមិថុនា នេះឲ្យដឹងថា ក្រុមហ៊ុនធ្វើពាណិជ្ជកម្មថ្នាំកសិកម្មទាំងអស់អាចនាំចូល និងចែកចាយថ្នាំកសិកម្មឡើងវិញ ដោយធ្វើឡើងឲ្យស្របទៅតាមច្បាប់ស្ដីពីគ្រប់គ្រងថ្នាំកសិកម្មនិងជីកសិកម្ម។
ក្រសួងថា ក៏បានណែនាំឲ្យអាជ្ញាធរ និងមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត ត្រូវជំរុញពង្រឹងការផ្សព្វផ្សាយបច្ចេកទេស និងលើកកម្ពស់ការយល់ដឹងដល់ពាណិជ្ជករ និងអ្នកប្រើប្រាស់ថ្នាំកសិកម្មឲ្យបានយល់ដឹងពីហានិភ័យដែលបង្កឡើងដោយថ្នាំកសិកម្មនេះផងដែរ។
កាលថ្ងៃទី២៥ ខែឧសភាកន្លងមក ក្រសួងកសិកម្ម រុក្ខាប្រមាញ់ និងនេសាទដាក់បំរាមឲ្យម្ចាស់អាជីវម្មនិងដេប៉ូចែកចាយថ្នាំកសិកម្មទាំងអស់ត្រូវផ្អាកការនាំចូលនិងចែកចាយថ្នាំកសិកម្មគ្រប់ប្រភេទបណ្ដោះអាសន្ន ដើម្បីរង់ចាំការត្រួតពិនិត្យពីមន្ទីរកសិកម្មរាជធានី-ខេត្ត។