ក្រសួងសុខាភិបាល បានឲ្យដឹងថា ករណីពុលចំណីអាហារនៅកម្ពុជានៅក្នុងឆ្នាំ២០១៧នេះ បានធ្លាក់ចុះជិត ២០ភាគរយ បើធៀបទៅនឹងឆ្នាំមុន។
របាយការណ៍ក្រសួងសុខាភិបាលដែលបង្ហាញនៅក្នុងសន្និសីទសារព័ត៌មាននៅព្រឹកថ្ងៃនេះ បានបង្ហាញថា មនុស្សដល់ទៅ ៩៤៧នាក់ ត្រូវបានរាយការណ៍ថា បានពុលចំណីអាហារនៅឆ្នាំ២០១៧នេះ ក្នុងនោះ មនុស្ស ៤នាក់បានស្លាប់ដោយសារពុលស្រាមានសារធាតុមេតាណុលខ្ពស់។
ក្រសួងនេះបានឲ្យដឹងទៀតថា ករណីពុលចំណីអាហារនៅកម្ពុជា បានធ្លាក់ចុះពីចំនួន ១១៦៤នាក់នៅឆ្នាំ២០១៦ មកនៅត្រឹម ៩៤៧នាក់ប៉ុណ្ណោះនៅក្នុងរយៈពេល ៨ខែឆ្នាំ២០១៧នេះ។
បើយោងតាមរបាយការណ៍ក្រសួងសុខាភិបាល មនុស្សដល់ទៅ ៣៨២៤នាក់ បានពុលចំណីអាហាររយៈពេល ៣ឆ្នាំចុងក្រោយនេះ គិតចាប់ពីឆ្នាំ២០១៥មក ក្នុងនោះ មនុស្ស ៤៧នាក់បានស្លាប់ ដោយសារពុលស្រាមានផ្ទុកសារធាតុមេតាណុលខ្ពស់៕