គណបក្សប្រឆំាងអះអាងថា មិនធ្វើបាតុកម្មប្រឆំាងនិងការចាប់ខ្លួនលោក កឹម សុខា នោះទេ ដោយថាគណបក្សនេះ ទុកពេលរៀបចំពង្រឹងផ្ទៃក្នុងបក្ស ដើម្បីប្រកួតប្រជែងការបោះឆ្នោតនៅឆ្នាំ២០១៨ខាងមុខនេះ។
លោក កឹម សុខា ត្រូវបានសាលាដំបូងរាជធានីភ្នំពេញ សម្រេចចោទប្រកាន់ថា បានឃុបឃិតជាសម្ងាត់ជាមួយបរទេសក្បត់ជាតិ ខណៈលោក កឹម សុខា កំពុងជាប់ឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ ជាប់ព្រំដែនវៀតណាម។
ក្នុងសន្និសីទសារព័ត៌មាននៅទីស្នាក់ការបក្សនាថ្ងៃទី១២ខែកញ្ញានេះ តំណាងរាស្ត្រគណបក្សប្រឆំាង លោក សុន ឆ័យ បានថ្លែងថា តំណាងរាស្ត្រគណបក្សសង្គ្រោះជាតិ មិនមានតក់ស្លុតក្នុងការចាប់ខ្លួនប្រធានគណបក្សសង្គ្រោះជាតិលោក កឹម សុខា នោះទេ ដោយលោកប្រាប់ប្រជាពលរដ្ឋ មិនទាន់ចុះឈ្មោះបោះឆ្នោត ត្រូវទៅចុះឈ្មោះទំាងអស់គ្នា ដើម្បីបោះឆ្នោតជ្រើសរើសថ្នាក់ដឹកនាំដែលខ្លួនពេញចិត្តនាឆ្នាំ២០១៨។
លោក សុន ឆ័យ ថ្លែងថា គណបក្សសង្គ្រោះជាតិ បានត្រៀមចូលរួមការប្រកួតប្រជែងការបោះឆ្នោតជាមួយគណបក្សនយោបាយផ្សេងទៀត ដោយលោកមានជំនឿថា សំណុំរឿងលោក កឹម សុខា និងត្រូវត្រឡប់ទៅរកភាពល្អប្រសើរឡើងវិញ ដូចករណីអតីតមេដឹកនាំគណបក្សសង្គ្រោះជាតិលោក សម រង្ស៊ី កាលពីឆ្នាំ២០១៣។
លោកថ្លែងថា៖ «យើងធ្លាប់ឃើញហើយ ឯកឧត្តម សម រង្ស៊ី ក៏ធ្លាប់រងទុក្ខទោស មិនអាចចូលស្រុកបាន ក៏ប៉ុន្តែក៏មានស្ថានភាពមួយ ក៏បង្កលក្ខណៈឲ្យគាត់ចូលរួមមកបោះឆ្នោតបាននៅឆ្នាំ២០១៣ជាដើម ដូច្នេះការតស៊ូមតិ ការសម្តែងនៃការតទល់សភាពការណ៍ខ្មែរសព្វថ្ងៃ ពីសំណាក់សហគមន៍អន្តរជាតិ និងប្រជាពលរដ្ឋយើង ហាក់ដូចជាមានភាពខ្លំាងខ្លាជាងពេលមុនៗទៅទៀត យើងជឿជាក់ថា យើងអាចរកវិធីដើម្បីសម្រួល បង្កបរិយាកាសឲ្យខ្មែរចេះរួបរួមគ្នាឲ្យការបោះឆ្នោតឆ្នាំ២០១៨ ឲ្យសេរី និងយុត្តិធម៌»។
ថ្លែងក្នុងសន្នីសីទសារព័ត៌មានមួយកាលពីថ្ងៃទី១១កញ្ញានេះ នៅមុខពន្ធនាគារត្រពាំងផ្លុង ខេត្តត្បូងឃ្មុំ ដោយមានការដាក់ពង្រាយសមត្ថកិច្ចជាច្រើនរយនាក់នៅក្បែរនោះ អនុប្រធានគណបក្សសង្គ្រោះជាតិលោកស្រី មួរ សុខហួរ បានថ្កោលទោសការចាប់ខ្លួនលោក កឹម សុខា និងប្រកាសថា គណបក្សនេះមិនចូលរួមក្នុងការបោះឆ្នោតឆ្នាំ២០១៨នោះទេ ប្រសិនជាគ្មានវត្តមានប្រធានគណបក្ស។
នៅពេលអ្នកសារព័ត៌មានសួរទៅលោក សុន ឆ័យ លោកថ្លែងថា នេះជាការសម្តែងមតិដោយសមាជិកមិនមែន កើតចេញពីគណបក្សនោះទេ។ លោកបន្តថា រាល់ការសម្តែងមតិចេញពីបុគ្គលយកជាការបាន លុះត្រាតែមានការសម្រេចយល់ព្រមពីគណៈកម្មាធិការអចិន្ត្រៃយ៍របស់បក្ស សេចក្តីសម្រេចរបស់គណៈកម្មាធិការនាយក និងសេចក្តីសម្រេចសមាជរបស់គណបក្សសង្គ្រោះជាតិ។
លោក កឹម សុខា ត្រូវបានចាប់ខ្លួន ទាំងកណ្តាលយប់ដោយគ្មានដីកា កាលពីយប់ថ្ងៃទី០២ ចូលដល់ថ្ងៃទី០៣ ខែកញ្ញានេះ ខណៈអ្នកវិភាគ អ្នកច្បាប់ និងគណបក្សប្រឆំាង អះអាងប្រហាក់ប្រហែលគ្នាថា ករណីចាប់ខ្លួន កឹម សុខា រំលោភអភ័យឯកសិទ្ធិសភា និងរដ្ឋធម្មនុញ្ញ។ ប៉ុន្តែ តំណាងរាស្ត្របក្សកាន់អំណាចចំនួន៦៧រូប អះអាងប្រហាក់ប្រហែលគ្នាថា ករណីលោក កឹម សុខា ធ្វើស្របតាមរដ្ឋធម្មនុញ្ញ៕