អាមេរិកបន្តជួយវិស័យឯកជនផ្គត់ផ្គង់ទឹកស្អាតនិងអនាម័យនៅកម្ពុជា

ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) បាន​ប្រកាស​​​​នូវ​គំនិតផ្តួចផ្តើមថ្មីមួយដែលមានទឹកប្រាក់ចំនួន ៣លានដុល្លារសហរដ្ឋអាមេរិក ដើម្បីជួយ​លុប​​បំបាត់គម្លាតហិរញ្ញប្បទានសម្រាប់ការផ្តល់សេវាអានាម័យ និងការផ្គត់ផ្គង់ទឹកស្អាតនៅក្នុង​ប្រទេស​​កម្ពុជា។

គម្រោងហិរញ្ញវត្ថុសម្រាប់ទឹកស្អាតនិងអនាម័យ (WASH-FIN) នឹងជួយដល់​វិស័យ​​​ឯកជន​​​អាច​ផ្គត់ផ្គង់ទឹកស្អាត ដល់អ្នកដែលមានតម្រូវការប្រើប្រាស់។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិក នៅថ្ងៃទី១២ខែតុលានេះ។

បើតាមសេចក្តីប្រកាសដដែល ស្ថានទូតអាមេរិកឲ្យដឹងថា គោលបំណងចំបងនៃគម្រោងទឹកស្អាត និងអនាម័យ ក្នុងប្រទេសកម្ពុជា គឺផ្តល់ការគាំទ្រដល់ប្រតិបត្តិករ​ឯកជន​ ដែលផ្គត់ផ្គង់ទឹកស្អាត អាចទទួលបាននូវប្រាក់ ដែលពួកគេត្រូវការដើម្បីពង្រីក និងធ្វើឲ្យ​ប្រសើរ​ឡើងនូវសេវាទឹកស្អាត និងអនាម័យ។

ទូតអាមេរិក ឲ្យដឹងទៀតថា គម្រោងនេះ កំពុងចាប់ដៃគូជាមួយអាជ្ញាធរផ្គត់ផ្គង់ទឹកស្អាតកម្ពុជា (CWA) ដើម្បី​ទាញ​យកប្រយោជន៍ពីប្រព័ន្ធ និងចំណេះដឹងក្នុងស្រុកដែលមានស្រាប់។ ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ រំពឹង​ទៀតថា​ កម្ចីធនាគារក្នុងស្រុក ដែលកើតចេញពីលទ្ធផលនៃគម្រោងនេះ នឹងជួយពង្រីកការវិនិយោគលើវិស័យ​ទឹកស្អាត និងអនាម័យ ព្រមទាំងរួមចំណែកដល់កំណើនសេដ្ឋកិច្ច បង្កើតការងារ និងប្រជាជន​មាន​សុខភាពកាន់តែប្រសើរឡើង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ