មន្ត្រីផ្នែកគយគ្រប់គ្រងការនាំទំនិញចេញចូលរបស់ចិនបានហៅថា គំនិតអភិរក្សនិយមរបស់ ត្រាំ ប្រធានាធិបតីជាប់ឆ្នោតរបស់អាមេរិកថា នឹងធ្វើឲ្យប៉ះពាល់ដល់កម្រិតនៃការនាំចេញរបស់ខ្លួន ចំពោះវិធានការតឹងរឹងទាំងនេះ។
អ្នកនាំពាក្យស្ថាប័នគយរបស់ចិនលោក Huang Songping ថ្លែងប្រាប់អ្នកសារព័ត៌មានថា ចិននឹងក្លាយជាអ្នកបាត់បង់ខ្លាំងជាងគេ ចំពោះបរិបទនយោបាយសេដ្ឋកិច្ចតឹងរឹងរបស់អាមេរិក។ លោកថា អាចនឹងបង្កការលំបាកដល់ការអភិវឌ្ឍន៍ពាណិជ្ជកម្មអន្តរជាតិរបស់ចិននៅឆ្នាំ២០១៧ ខណៈថ្លៃដើមនៃការផលិតកើនឡើងខ្ពស់។នេះបើតាមទីភ្នាក់សារព័ត៌មានរ៉យទ័រ។
អ្នកនាំពាក្យរូបនេះ បញ្ជាក់ថា បញ្ហាប្រឈមមុខនៃសេដ្ឋកិច្ចរបស់ចិននឹងកើតមានរយៈពេលវែង ប៉ុន្តែលោកថា ចិនអាចដោះស្រាយបាន។ ទោះយ៉ាងណាលោកបង្ហាញក្តីសង្ឃឹមថា កិច្ចសហប្រតិបត្តិការរវាងចិន និង អាមេរិកនិងនៅតែល្អ។
ចិនគឺជាប្រទេសធំនៅលើពិភពលោកក្នុងការនាំចេញ ហើយអាមេរិកជាដៃគូរសេដ្ឋកិច្ចដ៏សំខាន់របស់ចិន។ នៅក្នុងយុទ្ធនាការឃោសនារបស់លោកត្រាំ គឺលោកបានបញ្ជាក់ថា នឹងតម្លើងពន្ធនាំចូលពីចិន ហើយលោកត្រាំក៏បានជ្រើសរើសយកអ្នកសេដ្ឋកិច្ចដែលមាននិន្នការប្រឆាំងចិនធ្វើជាអ្នកដឹកនាំក្រុមប្រឹក្សាសេដ្ឋកិច្ចនៅសេតវិមានទៀតផង៕