គណៈកម្មាធិការជាតិរៀបចំការបោះឆ្នោតនៅថ្ងៃអង្គារនេះប្រកាសបិទផ្លូវតវ៉ា ករណីការរាប់សន្លឹកឆ្នោតនៅឃុំដូង ខេត្តស្វាយរៀង ដោយគណបក្សប្រជាជនកម្ពុជាឈ្នះគណបក្សសង្គ្រោះជាតិចំនួនតែ២សំឡេង។
គណៈកម្មាធិការជាតិរៀបចំកាបោះឆ្នោត បានរាប់សន្លឹកឆ្នោតឡើងវិញចំនួន ២៣ ការិយាល័យ នៅក្នុងឃុំដូង ស្រុករមាសហែក បន្ទាប់ពីគណបក្សប្រជាជនកម្ពុជា និងគណបក្សសង្គ្រោះជាតិបានដាក់ពាក្យបណ្តឹងដោយមិនសុខចិត្តចំពោះការរាប់សន្លឹកឆ្នោតនៅថ្នាក់ខេត្ត។
អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប)លោក ហង្ស ពុទ្ធា មានប្រសាសន៍ថា ការរាប់សន្លឹកឆ្នោតម្សិលមិញ មានចំនួន៦៦សន្លឹក ដែលគណបក្សទាំងពីរមិនសុខចិត្ត ចំពោះការសម្រេចរបស់ក្រុមបច្ចេកទេស ហើយបក្សទាំងពីរបានដាក់ពាក្យប្ដឹងមកគណៈកម្មាធិការជាតិរៀបចំការបោះឆ្នោតដើម្បីឲ្យពិនិត្យមើលឡើងវិញ។ លោកបន្តថា នៅថ្ងៃនេះ គ.ជ.ប បានប្រជុំដោះស្រាយបណ្ដឹងរបស់គណបក្សទាំងពីរ ហើយសម្រាប់លទ្ធផលចុងក្រោយ គណបក្សប្រជាជនកម្ពុជាគឺទទួលបាន ២,៦១១ សំឡេង ហើយគណបក្សសង្គ្រោះជាតិទទួលបាន២,៦០៩ សំឡេង ដោយគណបក្សប្រជាជនឈ្នះ គណបក្សសង្គ្រោះជាតិចំនួន ២ សំឡេង។
លោកថា «សន្លឹកឆ្នោត៦៦ សំឡេងនេះ គឺជាសន្លឹកឆ្នោតវិវាទរបស់គណបក្សទាំងសងខាង ចឹងហើយបានគ.ជ.ប ធ្វើការសម្រេចចិត្តក្នុងការរាប់សន្លឹកឆ្នោត ៦៦ ឡើងវិញ។ ក្នុងស្មារតីអង្គប្រជុំនេះឯងគឺចង់ឲ្យយកអា ១៤១ ដែលជាសន្លឹកឆ្នោតអត់បានការយកមករាប់ឡើងវិញផងដែរ។ លទ្ធទទួលបានដូចអ្វីដែលបានជម្រាបមិញចឹង គណបក្សប្រជាជនកម្ពុជាទទួលបាន២,៦១១សំឡេង គណបក្សសង្គ្រោះជាតិទទួលបាន ២,៦០៩សំឡេង ជាការបិតផ្លូវតវ៉ាហើយចំដោះស្រាយចុងក្រោយនេះ»។
សមាជិកគណបក្សសង្រ្គោះជាតិខេត្តស្វាយរៀង លោក គង់ ម៉ាស់ ប្រាប់អ្នកសាព័ត៌មានថា ការសម្រេចរបស់គណៈកម្មាធិការជាតិរៀបចំការបោះឆ្នោត នៅថ្ងៃនេះ គណបក្សសង្គ្រោះជាតិទទួលយកទទួលយកបាន ដោយសារលទ្ធផលបានឃើញជាក់ស្ដែងទាំងអស់គ្នា។
លោកថា «ការរាប់នេះវាជាក់ស្ដែង យើងបានពិនិត្យមើលទាំងមន្ត្រីកិច្ចការបោះឆ្នោតរបស់គណបក្សក៏មកដែលមានរូបខ្ញុំនឹងមានទាំងលោកស្រី ម៉េង សុធារី មានទាំងខ្ញុំជាសមាជិកនាយកដ្ឋានកិច្ចការបោះឆ្នោតហើយយើងមើលឃើញថាការរាប់នេះ វាអស់ចិត្តហើយ យើងមើលឃើញ យើងតវ៉ាអីគ្រប់បែបយ៉ាងអស់។ ម្យ៉ាងមិនដឹងត្រូវតវ៉ាទៅណាទៀត បើថ្នាក់ជាតិ NEC សម្រេចយកលទ្ធផលនេះហើយជាផ្លូវការ ចឹងក៏អស់ចិត្តដែរ ដោយសារ យើងឃើញភាពជាក់ស្ដែងនឹងភ្នែក»។
នាយកប្រតិបត្តិនៃអង្គការឃ្លាំមើលការបោះឆ្នោតមួយហៅកាត់ថា និចហ្វិច លោក សំ គន្ធាមី មានប្រសាសន៍ថា បោះឆ្នោតអាណត្តិទី៤នេះ គណបក្សទាំងពីរបានដាក់ពាក្យបណ្តឹងឲ្យគណៈកម្មាធិការរៀបចំការបោះឆ្នោតរាប់សន្លឹកឡើងវិញ ដោយសារ សន្លឹកឆ្នោតរបស់គណបក្សទាំងពីរប្រហាក់ប្រហែលគ្នា។
លោកថា «ភ្នាក់ងារគណបក្សគាត់សង្កេតមើលទាំងអស់គ្នាទៅ ដែលគេកំណត់តាមនីតិវិធីដែលគេកំណត់ថាសន្លឹកឆ្នោតណាវាបានការ វិញឬក៏មិនបានការដដែល វាស្រ័យទៅការកំណត់តាមច្បាប់។ បោះឆ្នោតលើកនេះយើងឃើញមានបណ្ដឹងរាប់សន្លឹកឆ្នោតឡើងវិញមានច្រើន ហើយបណ្ដឹងនឹងភាគច្រើនតែគណបក្សសង្គ្រោះជាតិនិងគណបក្សប្រជាជនកម្ពុជា ដោយសារ សន្លឹកឆ្នោតវាគៀកៗគ្នា ហើយសន្លឹកឆ្នោតអត់បានការវាច្រើន។ មន្ត្រីនៅការិយាល័យកំណត់ថាអាអត់បានការច្រើន បានគណបក្សនយោបាយគេប្ដឹងឡើងមកNEC តែអាស្រ័យទៅលើជាក់ស្ដែងតាមបទបញ្ជា នីតិវិធីទៅគណបក្សណាទទួលបានលទ្ធផលឈ្នះវិញ ជួនកាលវាអត់ទៀងទេជួនអីសង្រ្គោះជាតិឈ្នះវិញទៅក៏អាចថាបាន ជួនគណបក្សប្រជាជនឈ្នះទៅ អាហ្នឹងយើងត្រូវទទួលទាំងអស់គ្នា»។
បើតាមលទ្ធផលបោះឆ្នោតបឋមនៅក្នុងឃុំដូង កាលពីដំបូងឡើយ គណបក្សសង្គ្រោះជាតិ ទទួលបានសំឡេងឆ្នោតចំនួន ២.៥៩៩សំឡេង ដោយនាំមុខគណបក្សប្រជាជនកម្ពុជា ចំនួន ៣សំឡេង ប៉ុន្តែគណបក្សប្រជាជនកម្ពុជាមិនសុខចិត្តក៏ប្តឹងតវ៉ា ហើយរាប់ឡើងគណបក្សនេះឈ្នះវិញតែ២សំឡេងប៉ុណ្ណោះ។
លោក ហង្ស ពុទ្ធា ឲ្យដឹងថា គិតមកដល់ថ្ងៃនេះ គ.ជ.ប ទទួលបានពាក្យបណ្ដឹងចំនួន ៤០ ហើយបណ្ដឹងទាំងនោះភាគច្រើន ប្ដឹងឲ្យរាប់សន្លឹកឡើងវិញ ខណៈបណ្ដឹងទូទៅមាន៩៧បណ្ដឹង៕