រដ្ឋាភិបាលកម្ពុជានឹងរៀបចំការតាំងពិព័រណ៍កិច្ចសហប្រតិបត្តិការយោធាកម្ពុជា ចិន នៅសប្តាហ៍ក្រោយដើម្បីអបអរខួបលើកទី៦០ នៃការបង្កើតទំនាក់ទំនងការទូតប្រទេសទាំងពីរ។
ក្នុងសេចក្តីប្រកាសថ្ងៃទី៨ មិថុនា ក្រសួងការពារជាតិឲ្យដឹងថា ដោយមានកិច្ចសហប្រតិបត្តិការជាមួយក្រសួងការពារជាតិចិន ការតាំងពិព័រណ៍នេះនឹងប្រព្រឹត្តទៅចាប់ពីថ្ងៃទី១៩ ដល់ថ្ងៃទី២៤ មិថុនាខាងមុខ ព្រមទាំងបង្ហាញនូវសមិទ្ធផលកិច្ចសហប្រតិបត្តិការរវាងកងទ័ពទាំងពីររយៈពេល៥ឆ្នាំ ពី២០១៣ ដល់២០១៨ផងដែរ។
អ្នកនាំពាក្យក្រសួងការពារជាតិលោក ឈុំ សុជាតិ មានប្រសាសន៍ថា ការតាំងពិព័រណ៌នោះក៏មានការតាំងបង្ហាញអាវុធយុទ្ធភ័ណ្ឌសង្គ្រាមផងដែរ តែលោកមិនទាន់អាចបញ្ជាក់បាននៅឡើយទេ ដោយថាកំពុងធ្វើការលើរឿងនេះ។
អ្នកនាំពាក្យក្រសួងការពារជាតិលោក ឈុំ សុជាតិ
ទំនាក់ទំនងសម័យទំនើបរវាង កម្ពុជា ចិន បានចាប់ផ្តើមនៅថ្ងៃទី១៩ កក្កដា ឆ្នាំ១៩៥៨ បន្ទាប់ពីកម្ពុជាបានទទួលស្គាល់សាធារណរដ្ឋប្រជាមានិតចិនជាប្រទេសស្របច្បាប់ និងបានបដិសេធឯករាជ្យភាពរបស់តៃវ៉ាន់។
ទំនាក់ទំនងកម្ពុជា ចិន ត្រូវបានអ្នកប្រវត្តិសាស្ត្រសង្កេតឃើញថាមានទាំងល្អទាំងអាក្រក់ ដែលអ្នកនយោបាយកម្ពុជាគួរមានការប្រុងប្រយ័ត្ន៕