គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ប្រកាសជ្រើសរើសមន្ដ្រីជាប់កិច្ចសន្យាជាង១សែននាក់ ដើម្បីបម្រើការងារនៅតាមការិយាល័យបោះឆ្នោត សម្រាប់ការបោះឆ្នោតថ្នាក់ជាតិខែកក្កដាខាងមុខនេះ។
បើតាមសេចក្ដីជូនដំណឹង ចុះថ្ងៃទី៨ខែមិថុនា ដែល VOD ទើបតែទទួលបាននៅថ្ងៃនេះ គ.ជ.ប ប្រកាសជ្រើសរើសសមាសភាពគណៈកម្មការការិយាល័យបោះឆ្នោតចំនួន ១៣ម៉ឺន ៧ពាន់៨រយ២នាក់ (១៣៧ ៨០២នាក់) ដើម្បីបម្រើការងារនៅតាមគណៈកម្មការការិយាល័យបោះឆ្នោតទូទាំងប្រទេស សម្រាប់មុខដំណែងមួយចំនួន ដូចជា ប្រធាន និងអនុប្រធានគណៈកម្មការការិយាល័យបោះឆ្នោត លេខាធិការ និងសមាជិកទី១ ទី២ និងទី៣។
បើតាមសេចក្ដីជូនដំណឹង ការទទួលពាក្យនឹងចាប់ផ្ដើមពីថ្ងៃទី២កក្កដា ហើយឈប់ទទួលពាក្យនៅថ្ងៃទី៨កក្កដាឆ្នាំ២០១៨។
នាយកប្រតិបត្តិអង្គការណិចហ្វិច លោក សំ គន្ធាមី មានប្រសាសន៍ថា គ.ជ.ប ត្រូវពង្រឹង និងបណ្ដុះបណ្ដាលសមត្ថភាពមន្ដ្រី ដែលខ្លួនប្រកាសជ្រើសរើសនេះ។
នាយកប្រតិបត្តិអង្គការណិចហ្វិច លោក សំ គន្ធាមី
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស យល់ថា ការបណ្ដុះបណ្ដាល និងការអនុវត្តជាក់ស្ដែងរបស់មន្ដ្រីទាំងនោះ គឺជារឿងសំខាន់។ ប៉ុន្ដែ លោកថា ការចូលរួមរបស់គណបក្សនយោបាយ និងអង្គការសង្គមស៊ីវិល ក៏ចាំបាច់ផងដែរ ដើម្បីបង្ហាញពីតម្លាភាព និងភាពត្រឹមត្រូវតាមនីតិវិធីនៃច្បាប់បោះឆ្នោត។
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
បើតាមរបាយការណ៍អង្គការខុមហ្វ្រែល សម្រាប់ការបោះឆ្នោតថ្នាក់ជាតិនៅអាណត្ដិទី៥ ឆ្នាំ២០១៣ មានមន្ដ្រីចំនួន ១១៤ ០៥២នាក់ បម្រើការងារនៅការិយាល័យបោះឆ្នោតចំនួន ១៩០ ០០៩ ការិយាល័យ។ ចំណែកការបោះឆ្នោតអាណត្តិទី៦ឆ្នាំ២០១៨នេះ មានការិយាល័យបោះឆ្នោតចំនួន២២ ៩៦៧។