ប្រទេសកម្ពុជាត្រូវបានជ្រើសជាឯកឆ័ន្ទឲ្យធ្វើជាប្រធានគណៈកម្មាធិការនៃអនុសញ្ញាទីក្រុងឡាអេឆ្នាំ១៩៥៤របស់អង្គការយូណេស្កូ ស្តីពីកិច្ចការពារវប្បធម៌ក្នុងគ្រាមានជម្លោះប្រដាប់អាវុធ។ នេះបើតាមសារលិខិតរបស់លោកនាយករដ្ឋមន្រ្តីកម្ពុជា។
ក្នុងសារលិខិតនៅថ្ងៃទី១៣ខែធ្នូនេះ លោក ហ៊ុន សែន បានលើកឡើងថា ភាពជាប្រធាននៃគណៈកម្មាធិការនេះគឺជាជោគជ័យថ្មីមួយទៀតនៃគោលនយោបាយអភិរក្សនិងលើកតម្លៃបេតិកភណ្ឌវប្បធម៌របស់មនុស្សជាតិដែលរដ្ឋាភិបាលកម្ពុជាបានធ្វើយ៉ាងសកម្មនិងឈានមុខលើឆាកអន្តរជាតិ។
ការសម្រេចឲ្យកម្ពុជាធ្វើជាប្រធានគណៈកម្មាធិការការពារវប្បធម៌របស់អង្គការយូណេស្កូនេះធ្វើឡើងក្នុងកិច្ចប្រជុំក្នុងស្នាក់កណ្តាលនៃអង្គការយូណេស្កូនៅទីក្រុងប៉ារីស កាលពីថ្ងៃទី៨ដល់៩ខែធ្នូនេះ៕