ប្រជាពលរដ្ឋដែលរងផលប៉ះពាល់ពីទំនប់វារីអគ្គិសនីរបស់ក្រុមហ៊ុនចិន ហ៊ីណូហាយត្រូ នៅខេត្ដឧត្ដរមានជ័យ ស្នើឲ្យអាជ្ញាធរខេត្ដនេះ ពន្លឿនដោះស្រាយសំណងដល់ពួកគាត់ ដោយអះអាងថាការអូសបន្លាយនេះ ធ្វើឲ្យពួកគាត់ប្រឈមបាត់បងលំនៅឋាននិងដំណាំកសិកម្ម។
តំណាងពលរដ្ឋនៅទំនប់ថ្មីឃុំត្រពាំងតៅ ស្រុកអន្លង់វែង លោក វាន់ ពិសិដ្ឋ ប្រាប់វីអូឌី នៅថ្ងៃនេះថា ក្រុមហ៊ុនចិនហ៊ីណូហាយត្រូ មានគម្រោងបិទទំនប់វារីអគ្គិសនីនៅរដូវវស្សាខាងមុខនេះ ដែលលោកថា លំនៅឋាន និងដំណាំកសិកម្មពលរដ្ឋរាប់រយគ្រួសារ ប្រឈមនឹងលិចលង់និងខូចខាត។ លោកបន្ដថាពលរដ្ឋជាង៩០គ្រួសារ បានដាក់លិខិតទៅអភិបាលខេត្ដឧត្ដរមានជ័យ លោក ស ថាវី និងស្ថាប័នពាក់ព័ន្ធមួយចំនួន ឲ្យជួយពន្លឿនដោះស្រាយសំណងពីផលប៉ះពាល់តាមភាពជាក់ស្ដែង ឲ្យបានមុនរដូវវស្សាដើម្បីពួកគាត់យកថ្នូរនោះទៅដោះដូរដីនៅកន្លែងផ្សេង។ លោកបន្ដថា «ទំនប់ហ្នឹងគេទុករួចហើយគេបិទនៅខែខាងមុខនេះឯង។ ដល់ខែវស្សាវានឹងស្ទះទឹកវាអាចឡើងលិចប៉ះពាល់ដល់ប្រជាជនទាំងអស់ហ្នឹងគេធ្វើរួចហើយ។ វាប៉ះពាល់ដល់ខែវស្សានោះទេ ចឹងប្រជាជនចង់បានឲ្យរដ្ឋាភិបាលសងមុនរដូវវស្សា»។
តំណាងពលរដ្ឋមួយរូបទៀតនៅភូមិចា ឃុំលំទង លោក ប៉េង លីម ឲ្យដឹងថា អាជ្ញាធរបានសន្យាផ្ដល់សំណងតាមភាពជាក់ស្ដែងដល់ពលរដ្ឋ បន្ទាប់ពីវាស់វែងពីផលប៉ះពាល់តាមគ្រួសារនីមួយៗ ។លោកថា ដីកសិកម្មពួកគាត់ទទួលផលយ៉ាងតិច៣ម៉ឺនបាត(ប្រាក់ថៃ)ក្នុងមួយរដូវកាល។ លោកបន្ដថា «បាទ គាត់ឲ្យកន្ទុយសន្លឹកហើយប៉ុន្ដែអត់ទាន់មានដំណឹងអីផងថាចែកខែណាខែណីខែ៤នេះគេរៀបបិទទ្វារទឹកហើយដល់ពេលលិចទឹកហើយមានអីទៀត។ ហើយសូមអោយលោកហ្នឹងឆាប់ជួយជាថវិការឲ្យមកអ្នកប៉ះពាល់ផងព្រោះអត់មានអីទេតែលិចហើយចប់ហើយ»។
នៅពេលទាក់ទងតាមទូរសព្ទ អភិបាលខេត្ដឧត្ដរមាជន័យលោក ស ថាវី មិនធ្វើអត្ថាធិប្បាយទេ ដោយប្រាប់ថាជាប់រវល់។
ទោះជាយ៉ាងណា អ្នកសម្របសម្រួលសមាគមការពារសិទ្ធិមនុស្ស ខេត្ដឧត្ដរមានជ័យលោក ស្រី ណារ៉េន មានប្រសាសន៍ថា តាមរដ្ឋធម្មនុញ្ញនៅក្នុងមាត្រា៤៤ លោកថា រដ្ឋាភិបាលត្រូវសិក្សាពីផលប៉ះពាល់ និងផ្ដល់សំណងសមរម្យនិងយុត្ដិធម៌ដល់ពលរដ្ឋ មុនធ្វើការអភិវឌ្ឍនៅតំបន់ណាមួយ ។ លោកបន្ដថា ពលរដ្ឋដែលរងផលប៉ះពាល់ពីទំនប់វារីអគ្គិសនីនេះ បានកើតឡើងជាច្រើនឆ្នាំមកហើយ ប៉ុន្ដែលោកថា អាជ្ញាធរមិនបានអនុវត្ដតាមគោលច្បាប់នោះឡើយ។ លោកជំរុញ ឲ្យអាជ្ញាធរ មានដំណោះស្រាយឲ្យបានឆាប់រហ័ស ដើម្បីឲ្យពួកគាត់បម្លាស់ទីលំនៅ និងរកដីកសិកម្មបង្កបង្កើនផលនៅកន្លែងផ្សេង៕
