មន្ដ្រីជាន់ខ្ពស់រាជរដ្ឋាភិបាលកម្ពុជានិងថៃ បានព្រមព្រៀងគ្នាបង្កើតគណៈកម្មាធិការមួយ ដើម្បីដោះស្រាយវិវាទពាណិជ្ជកម្មតាមតំបន់ជាប់ព្រំដែន។
ក្នុងកិច្ចប្រជុំមួយ នៅរាជធានីភ្នំពេញ កាលពីថ្ងៃចន្ទម្សិលមិញ ភាគីកម្ពុជាដឹកនាំដោយលោក សុខ សុភ័ក្រ អនុរដ្ឋលេខាធិការក្រសួងពាណិជ្ជកម្ម និងលោក Boonyarit Kalayanamit អគ្គនាយកផ្នែកទំនាក់ទំនងនៃក្រសួងពាណិជ្ជកម្មថៃ បានព្រមព្រៀងបង្កើតឲ្យមាន គណៈកម្មាធិការចម្រុះមួយ ដើម្បីដោះស្រាយវិវាទពាណិជ្ជកម្មតាមបណ្ដាខេត្តជាប់ព្រំដែនប្រទេសទាំងពីរ។ នេះបើតាមសេចក្ដីប្រកាស ដែលចុះផ្សាយបន្ដដោយសារព័ត៌មាន AKP។
បើតាមសារព័ត៌មាន AKP ឲ្យដឹងទៀតថា ក្រៅពីនេះ ភាគីកម្ពុជា និងថៃបានយល់ព្រមគ្នាពង្រីកទំហំពាណិជ្ជកម្មដល់ទឹកប្រាក់ចំនួន១៥ប៊ីលានដុល្លារ ត្រឹមឆ្នាំ២០២០។
កិច្ចពិភាក្សានេះក៏ផ្ដោតជាសំខាន់លើផ្នែកពាណិជ្ជទ្វេភាគី និងការដោះស្រាយវិវាទ ដូចជា ការនាំចេញផលិតផលកសិកម្ម ជម្រុញឲ្យមានពាណិជ្ជកម្មតាមបណ្ដាខេត្តជាប់ព្រំដែន ការវិនិយោគ ហេដ្ឋារចនាសម្ព័ន្ធ និងការសន្យាមិនយកពន្ធពីរដងជាដើម៕
