អគ្គស្នងការនគរបាលជាតិបញ្ជាឲ្យមន្ត្រីនៅក្រោមឱវាទរបស់ខ្លួនយកចិត្តទុកដាក់បង្កើនការបង្ក្រាប លើការផលិតនិងការដាំដុះដំណាំដែលអាចកែច្នៃជាគ្រឿងញៀននៅក្នុងទឹកដីកម្ពុជា។ នេះបើតាមការឲ្យដឹងពីគេហទំព័រអគ្គស្នងការដ្ឋានគរបាលជាតិ។
ក្នុងកិច្ចប្រជុំពិនិត្យលទ្ធផលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ ប្រចាំខែកុម្ភៈ ឆ្នាំ២០១៧ នៅអគ្គស្នងការដ្ឋាននគរបាលជាតិកាលពីម្សិលមិញ លោក នេត សាវឿន បានជំរុញឲ្យមន្ត្រីក្រោមបង្គាប់បង្កើនការបង្ក្រាប ចំពោះការផលិត និងការដាំដុះប្រភេទដំណាំដែលអាចកែច្នៃជាគ្រឿងញៀន។
លោក នេត សាវឿន បន្តថា កម្ពុជាជួបបញ្ហាស្មុគស្មាញចំពោះបញ្ហានេះ ព្រោះមានភូមិសាស្ត្រនៅជិតតំបន់ត្រីកោណមាស ដែលប្រឈមមុខការប្រើប្រាស់ និង ដឹកជញ្ជូនគ្រឿងញៀនឆ្លងកាត់។ តំបន់ត្រីកោណមាស ជាតំបន់ដាំដុះ និង កែច្នៃគ្រឿងញៀនធំមួយនៅអាស៊ីដែលមានទីតាំងចន្លោះប្រទេស៤គឺ មីយ៉ាន់ម៉ា វៀតណាម ថៃ និង ឡាវ។
គេហទំព័រអគ្គស្នងការដ្ឋាននគរបាលជាតិក៏បានឲ្យដឹងដែរថា យុទ្ធនាការបង្ក្រាបគ្រឿងញៀន ប្រចាំខែកុម្ភៈ ឆ្នាំ២០១៧ បង្ក្រាបបាន ៩២១គឺ ថយ២២៣ករណី បើធៀបនឹងខែមករា ឆ្នាំ២០១៧ ហើយឃាត់ខ្លួនអ្នកពាក់ព័ន្ធបាន ២០៥៣នាក់ក្នុងនោះ ស្រី២១៥នាក់៕
