មនុស្សយ៉ាងតិច ១១នាក់ ត្រូវបានសម្លាប់ ហើយ ៤០នាក់ទៀតបានរងរបួស កាលពីថ្ងៃម្សិលមិញនេះ នៅក្នុងហេតុការណ៍បំផ្ទុះគ្រាប់បែកអត្តឃាតមួយនៅខាងក្រៅវិហារនានានៅទីក្រុងស៊ូរ៉ាបាយ៉ា ដែលជាទីក្រុងធំលំដាប់ទីពីររបស់ឥណ្ឌូនេស៊ី។ នេះបើតាមការចុះផ្សាយរបស់សារព័ត៌មាន Channel News Asia ដែលបានដកស្រង់សម្ដីប៉ូលិសឥណ្ឌូនេស៊ី។
អ្នកនាំពាក្យប៉ូលិសឥណ្ឌូនេស៊ី លោ Frans Barung Mangera ត្រូវបានដកស្រង់សម្ដីដែលនិយាយថា ការវាយប្រហារនោះបានកើតឡើង ៣លើក នៅវិហារ ៣កន្លែង ហើយសមត្ថកិច្ចកំពុងតែកំណត់អត្តសញ្ញាណជនរងគ្រោះ។
ការបំផ្ទុះគ្រាប់បែកអត្តឃាតទាំងអស់ បានកើតឡើងខុសគ្នាត្រឹមតែ ១០នាទីប៉ុណ្ណោះ ដោយការបំផ្ទុះលើកទី១កើតឡើងនៅម៉ោង ៧កន្លះព្រឹកម្សិលមិញនេះ។
រូបភាពនៅលើកាមេរ៉ាសុវត្ថិភាព បង្ហាញមនុស្សម្នាក់បើកបរម៉ូតូចូលបរិវេណវិហារមួយ មុននឹងគ្រាប់បែកនោះផ្ទុះនៅត្រឹមតែប៉ុន្មានវិនាទីប៉ុណ្ណោះ។
សាក្សីម្នាក់បាននិយាយតាមទូរទស្សន៍ថា អ្នកដាក់គ្រាប់បែកអត្តឃាតម្នាក់ គឺជាស្ត្រីពាក់ស្បៃមុខម្នាក់រួមជាមួយក្មេងៗផងដែរ។
ទីភ្នាក់ងារព័ត៌មានរបស់ក្រុមបះបោរ បាននិយាយថា ក្រុមភេរវកម្មរដ្ឋអ៊ីស្លាម ក្រោយមកបានប្រកាសទទួលខុសត្រូវចំពោះការវាយប្រហារនេះ ប៉ុន្តែ ពុំបានផ្ដល់ភស្តុតាងលម្អិតនោះឡើយ៕