នាយករដ្ឋមន្ត្រីថ្មីប្រទេសម៉ាឡេស៊ី លោក មហាធៀ មហាម៉េដ បានប្ដេជ្ញាកាលពីថ្ងៃម្សិលមិញថា នឹងសើរើឡើងវិញនូវច្បាប់ដ៏ចម្រូងចម្រាស់ប្រឆាំងនឹង «ព័ត៌មានក្លែងក្លាយ» ដែលត្រូវបានអនុម័តនៅមុនការបោះឆ្នោត និងត្រូវបានគេចាត់ទុកជា សំដៅដល់អ្នករិះគន់នាយករដ្ឋមន្ត្រីមុនដែលរុំព័ទ្ធទៅដោយរឿងអាស្រូវ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP ច្បាប់ព័ត៌មានក្លែងក្លាយនេះ ត្រូវបានរដ្ឋាភិបាលម៉ាឡេស៊ីអនុម័តកាលពីដើមខែមេសាកន្លងមកនេះ ដែលបានកំណត់ការដាក់ទោសឲ្យជាប់គុករហូតដល់ ៦ឆ្នាំ ចំពោះបុគ្គលណាផ្សព្វផ្សាយព័ត៌មានមិនពិត។
ច្បាប់នេះក៏បានជំរុញឲ្យមានការរិះគន់ពីសំណាក់ក្រុមសិទ្ធិមនុស្សផងដែរ ដែលជឿថា ច្បាប់នេះអាចត្រូវបានគេយកទៅប្រើដើម្បីបង្ក្រាបលើអ្នកប្រឆាំង ជាពិសេសអ្នករិះគន់នាយករដ្ឋមន្ត្រី លោក ណាជីប រ៉ាហ្សាក់ នៅមុនការបោះឆ្នោតកាលពីថ្ងៃទី០៩ ឧសភា។
គណបក្សកាន់អំណាច Barisan Nasional របស់លោក ណាជីប ដែលបានគ្រប់គ្រងប្រទេសអស់រយៈពេល ៦១ឆ្នាំចាប់តាំងពីក្រោយឯករាជ្យមកនោះ បានបរាជ័យនៅក្នុងការបោះឆ្នោតប្រកួតប្រជែងជាមួយសម្ព័ន្ធបក្សប្រឆាំងដឹកនាំដោយលោក មហាធៀ។
លោក មហាធៀ ដែលធ្លាប់បានគ្រប់គ្រងប្រទេសម៉ាឡេស៊ីអស់រយៈពេល ២២ឆ្នាំមុនចុះចេញពីតំណែងកាលពីឆ្នាំ២០០៣នោះ បានចេញមកប្រកួតប្រជែងនឹងលោក ណាជីប វិញ។ លោក មហាធៀ និយាយថា លោកនឹងសើរើច្បាប់នេះឡើងវិញ ដើម្បីកំណត់បានច្បាស់នូវពាក្យថា «ព័ត៌មានក្លែងក្លាយ»។
លោកថ្លែងតាមទូរទស្សន៍ថា ច្បាប់ព័ត៌មានក្លែងក្លាយ នឹងត្រូវបានកំណត់និយមន័យមួយដែលច្បាស់លាស់ ដោយថា ប្រជាជន និងក្រុមហ៊ុនសារព័ត៌មាន នឹងយល់នូវអ្វីដែលហៅថា ព័ត៌មានក្លែងក្លាយ និងព័ត៌មានពិត។
