ក្រសួងធនធានទឹកនិងឧតុនិយមបានអំពាវនាវឲ្យប្រជាពលរដ្ឋមានការប្រុងប្រយ័ត្ន ចំពោះគ្រោះថ្នាក់ផ្សេងៗដែលកើតឡើងដោយសារអាកាសធាតុប្រែប្រួលនិងភ្លៀងធ្លាក់ចាប់ពីថ្ងៃទី១៦ដល់១៩ខែកញ្ញា។
សេចក្តីប្រកាសព័ត៌មានចេញផ្សាយកាលពីម្សិលមិញនេះ ក្រសួងបញ្ជាក់ថាសម្ពាធទាបចាប់ផ្តើមចេញពីសមុទ្រចិនខាងត្បូងឆ្លងកាត់ប្រទេសវៀតណាម ហើយបង្កភ្លៀងធ្លាក់នៅកម្ពុជា ចាប់ពីថ្ងៃទី១៦ដល់ថ្ងៃទី១៩ខែកញ្ញា។ សេចក្តីប្រកាសបញ្ជាក់ថា តំបន់វាលទំនាប នឹងមានភ្លៀងធ្លាក់រាយប៉ាយជាបន្តបន្ទាប់ក្នុងកម្រិតមធ្យមទៅច្រើន ក្នុងនោះមានខេត្ត សៀមរាប ពោធិ៍សាត់ កំពង់ឆ្នាំង និងកំពង់ធំ អាចនឹងមានភ្លៀងធ្លាក់ពីបង្គូរទៅច្រើន ចាប់ពីថ្ងៃទី១៥ ដល់ថ្ងៃទី១៩ ខែកញ្ញា។
សម្រាប់តំបន់មាត់សមុទ្រ អាចនឹងមានភ្លៀងធ្លាក់ពីបង្គូរទៅច្រើន ចាប់ពីថ្ងៃទី១៥ ដល់ថ្ងៃទី១៨ ខែកញ្ញា ហើយនៅលើផ្ទៃសមុទ្រ នឹងមានខ្យល់បក់បោកខ្លាំងជាមួយនឹងរលកខ្ពស់ៗ ចាប់ពីថ្ងៃទី១៥ ដល់ថ្ងៃទី១៧ ខែកញ្ញា។ ចំណែកតំបន់ខ្ពស់រាប និងតំបន់ជួរភ្នំដងរែក អាចនឹងមានភ្លៀងធ្លាក់បង្គូរទៅច្រើន ចាប់ពីថ្ងៃទី១៥ ដល់ថ្ងៃទី១៩ ខែកញ្ញា។
ក្រសួងអំពាវនាវឲ្យអាជ្ញាធរដែនដីនិងប្រជាពលរដ្ឋ ជាពិសេសប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្ន ចំពោះគ្រោះថ្នាក់ផ្សេងៗដែលអាចកើតឡើងពីការធ្លាក់ភ្លៀងនេះ៕
