មេដឹកនាំកម្ពុជា បានបន្តស្នើទៅមហាអំណាចអាមេរិក និងរុស្ស៊ី ឲ្យលុបចោលបំណុលដែលកម្ពុជាជំពាក់ប្រទេសទាំងពីរ និងបង្វែរបំណុលនោះទៅជាជំនួយវិញ។
លោកនាយករដ្ឋមន្ត្រី ហ៊ុន សែន បានចូលរួមកិច្ចប្រជុំអាស៊ានរយៈពេល ៣ថ្ងៃនៅទីក្រុងម៉ានីល ប្រទសភីលីពីន ជាទីដែលលោកអះអាងថា លោកបានជួបជជែកផ្ទាល់មាត់ជាមួយប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីរុស្ស៊ី លោក ឌីមេទ្រី ម៉េដវ៉េឌេវ នៅក្រៅកិច្ចប្រជុំនោះ។
លោក ហ៊ុន សែន បានរៀបរាប់លើទំព័រហ្វេសប៊ុកផ្លូវការរបស់លោកកាលពីល្ងាចថ្ងៃម្សិលមិញថា លោកបានស្នើទៅលោក ដូណាល់ ត្រាំ ឲ្យលុបចោលបំណុលដែលកម្ពុជាជំពាក់អាមេរិកកាលពីជំនាន់សាធារណៈរដ្ឋខ្មែរទសវត្សរ៍ ១៩៧០។ លោក ហ៊ុន សែន បានប្រៀបធៀបបំណុលនោះទៅនឹងញញួរដែលអាមេរិកយកមកវាយលើក្បាលកម្ពុជាហើយ ថែមទាំងទារថ្លៃញញួរនោះថែមទៀត។
លោក ហ៊ុន សែន រៀបរាប់លើហ្វេសប៊ុកលោកថា៖ «យើងខ្ញុំបានស្នើសុំថា យើងខ្ញុំសង ប៉ុន្តែសុំស្នើឲ្យអាមេរិកបង្វែរបំណុលនោះ មកជួយដល់កម្ពុជាវិញ។ ចំណុចនេះ គឺជាចំណុចដែលយើងខ្ញុំស្នើសុំឲ្យឯកឧត្តមធ្វើការពិចារណា ព្រោះថា វាប្រៀបដូចជាយកញញួរមកវ៉ៃយើងខ្ញុំហើយ ឲ្យយើងខ្ញុំសងថ្លៃញញួរហ្នឹងទៅទៀត ព្រោះជំនួយនេះ មិនដឹងថា គេយកមកធ្វើអី? ហើយគេទិញអាវុធយកមកធ្វើសង្គ្រាមនៅកម្ពុជាក្នុងពេលដែលខ្ញុំនៅក្មេងៗនៅឡើយ»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន ពុំបានប្រាប់ឲ្យដឹងអំពីអ្វីដែលលោក ដូណាល់ ត្រាំ ឆ្លើយតបទៅរូបលោកនោះទេ ជុំវិញបញ្ហាបំណុលនេះ។
លោក ហ៊ុន សែន ក៏បានលើកយកបញ្ហាបំណុលកម្ពុជាជំពាក់រុស្ស៊ីទៅជជែកជាមួយលោក ឌីមីទ្រី ម៉េដវ៉េដេវ ផងដែរ នៅក្នុងជំនួបទ្វេភាគីជាមួយមេដឹកនាំរុស្ស៊ីរូបនេះ កាលពីថ្ងៃទី១២ ខែវិច្ឆិកាកន្លងមកនេះ។ លោកបន្ថែមថា មេដឹកនាំរុស្ស៊ីបានស្វាគមន៍សំណើរបស់កម្ពុជា និងថា រុស្ស៊ីនឹងបង្កើតក្រុមការងារមួយ ដើម្បីជួយដោះស្រាយបំណុលដែលកម្ពុជាជំពាក់។
ជាច្រើនឆ្នាំមកហើយទាំងនៅក្នុងរដ្ឋការអតីតប្រធានាធិបតី បារ៉ាក់ អូបាម៉ា រដ្ឋាភិបាលកម្ពុជា បានស្នើទៅអាមេរិកឲ្យលុបចោលបំណុលនេះ និងបង្វែរទៅជាជំនួយមនុស្សធម៌វិញ ប៉ុន្តែ អាមេរិកបានច្រានចោលសំណើរបស់កម្ពុជា ដោយលើកឡើងថា ការណ៍ដែលកម្ពុជាមិនសងបំណុលរបស់ខ្លួន នឹងបង្កើតនូវទម្លាប់មិនទទួលខុសត្រូវ ខណៈដែលកម្ពុជាមានលទ្ធភាពសងត្រឡប់ទៅវិញនោះ។
របាយការណ៍ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា កម្ពុជាជំពាក់បំណុលបរទេសជាង ៦ពាន់លានដុល្លារអាមេរិក ក្នុងនោះ ៧០ភាគរយ ជាបំណុលដែលកម្ពុជាជំពាក់ចិន ខណៈដែលបំណុលកម្ពុជាជំពាក់អាមេរិកទាំងដើមទាំងការប្រាក់មានទំហំប្រហែល ៣០០លានដុល្លារ ហើយកម្ពុជាជំពាក់រុស្ស៊ីជាង ៤៥០លានដុល្លារ៕