ទាហានកូរ៉េខាងជើងម្នាក់ដែលរត់ចេញពីប្រទេសឆ្លងដែនតាមតំបន់មិនមានយោធាប្រឈមគ្រោះថ្នាក់ចូលក្នុងទឹកដីកូរ៉េខាងត្បូង ត្រូវទាហានឈាមព្រំដែនកូរ៉េខាងជើងបាញ់គ្រាប់ចូលក្នុងខ្លួនចំនួន៥ ហើយពេលនេះស្ថិតក្នុងស្ថានភាពធ្ងន់ធ្ងរ។
កាលពីថ្ងៃចន្ទម្សិលមិញ ទាហានម្នាក់របស់កូរ៉េខាងជើងបានរត់គេចចេញពីប្រទេសរបស់ខ្លួនចូលក្នុងប្រទេសកូរ៉េខាងត្បូងតាមតំបន់ការពារសុវត្ថិភាពរួមគ្នានៅក្នុងភូមិមួយឈ្មោះ Panmunjom។
តាមមន្ត្រីយោធារបស់កូរ៉េខាងត្បូងបានថ្លែងថា ដំបូងឡើយទាហានកូរ៉េខាងជើងរូបនោះបានធ្វើដំណើរតាមរថយន្តប៉ុន្តែដោយសារមានការបាញ់ប្រហារហើយធ្វើឲ្យរថយន្តនោះបែកកង់ ទើបយោធារូបនេះសម្រេចចុះរត់ដោយជើង ទាំងប្រឈមនិងការបាញ់ប្រហារពីយោធាកូរ៉េខាងជើងប្រមាណ៤០គ្រាប់។
ប៉ុន្តែតាមទីភ្នាក់ងារព័ត៌មានកូរ៉េខាងត្បូងយ៉ុងហាប់បានឲ្យដឹងថា ក្រុមគ្រូពេទ្យសង្គ្រោះបន្ទាន់របស់កូរ៉េខាងត្បូង បានជួយសង្គ្រោះហើយវះកាត់បានគ្រាប់ចំនួន៥ ហើយសង្ស័យថា មានគ្រាប់ចំនួនពីរទៀតនៅក្នុងខ្លួន។ ស្ថានភាពទាហានរូបនេះធ្ងន់ធ្ងរនៅមិនទាន់ដឹងខ្លួននៅឡើយ ហើយការដកដង្ហើមត្រូវការឧបករណ៍ជំនួយ។
រដ្ឋមន្ត្រីក្រសួងការពារជាតិកូរ៉េខាងត្បូងលោក Song Young-moo ថ្លែងនៅក្នុងសភាថា នេះជាករណីទី១ហើយដែលកូរ៉េខាងតាមបាញ់ដល់លើទឹកដីកូរ៉េខាងត្បូង។ សភាកូរ៉េខាងត្បូងកំពុងតែពិភាក្សាករណីកូរ៉េខាងជើងបាញ់ប្រហារដោយបំពានលើកិច្ចព្រមព្រៀងបទឈប់បាញ់គ្នា។
របាយការណ៍របស់រដ្ឋាភិបាលកូរ៉េខាងត្បូងបង្ហាញថា នៅប៉ុន្មានឆ្នាំចុងក្រោយនេះ ពលរដ្ឋកូរ៉េខាងជើងប្រមាណ១០០០នាក់ រត់ឆ្លងដែនចូលក្នុងប្រទេសកូរ៉េខាងត្បូងរាល់ឆ្នាំដោយសារតែបញ្ហាគំនៀបផ្សេងៗ។ អ្នកទាំងនោះរត់ចេញតាមតំបន់ដែលគ្មានយោធាយាមជាកន្លែងដែលពិបាកក្នុងការគ្រប់គ្រង។ គិតចាប់ពីការបែងចែកប្រទេសជាពីរកាលពីឆ្នាំ១៩៥៣មក ប្រជាជនកូរ៉េខាងជើងជាង ៣០ ០០០នាក់រត់ឆ្លងដែនចូលកូរ៉េខាងត្បូងគឺភាគច្រើនពួកគេឆ្លងតាត់តាមព្រំដែននៃប្រទេសចិនហើយចូលទៅកូរ៉េខាងត្បូង។
ចិនតែងតែចាត់ទុកជនជាតិកូរ៉េខាងជើងរត់គេចចេញពីប្រទេសទាំងនេះជា ជនអន្តោប្រវេសខុសច្បាប់ មិនមែនអ្នកស្វែងរកសិទ្ធិជ្រកកោណនោះទេ ហើយតែងតែចាប់បញ្ជូនអ្នកទាំងនោះត្រលប់ទៅកូរ៉េខាងជើងវិញ។
នៅថ្ងៃអង្គារនេះសារព័ត៌មានBBC ចុះផ្សាយថា ប្តីប្រពន្ធជនជាតិកូរ៉េខាងជើងរួមទាំងកូនប្រុសអាយុ៤ឆ្នាំម្នាក់ដែលរត់គេចចេញពីប្រទេសកំពុងជាប់ឃុំនៅក្នុងប្រទេសចិន ហើយត្រៀមបញ្ជូនទៅកាន់កូរ៉េខាងជើងវិញ។
បុរសជាស្វាមីជនជាតិកូរ៉េខាងជើងរូបនោះបានសុំអង្វរកុំឲ្យចិនបញ្ជូនពួកគេត្រលប់ទៅកូរ៉េខាងជើងវិញ បើមិនដូច្នោះទេ ពួកគេប្រឈមនឹងការជាប់ពន្ធនាគារនៅកន្លែងអ្នកទោសនយោបាយ ឬ ត្រូវអាជ្ញាធរកូរ៉េខាងជើងសម្លាប់។ ពួកគេស្នើសុំឲ្យអាជ្ញាធរចិនបញ្ជូនទៅកូរ៉េខាងត្បូង ប៉ុន្តែមិនទាន់មានការសម្រេចពីយ៉ាងណានៅឡើយ។