ថៃបានសម្រេចបើកឲ្យអាជីវករកម្ពុជាបន្តប្រើប្រាស់ប្រទេសខ្លួនដឹកទំនិញឆ្លងកាត់ទៅមកប្រទេសទី៣បានឡើងវិញ រហូតដល់មានអនុស្សារណៈយោគយល់គ្នារវាងកម្ពុជា និងថៃ ត្រូវបានបង្កើតឡើង។ នេះដោយយោងតាមសេចក្ដីជូនដំណឹងរបស់អគ្គនាយកដ្ឋានគយកម្ពុជាកាលពីថ្ងៃម្សិលមិញនេះ។
ក្នុងសេចក្តីជូនដំណឹងដដែលនោះ អគ្គនាយកដ្ឋានគយកម្ពុជាបានឲ្យដឹងថា រដ្ឋបាលគយថៃបានយល់ព្រមជាមួយគយកម្ពុជាក្នុងការអនុញ្ញាតឲ្យអាជីវករកម្ពុជាអាចបន្តប្រើប្រាស់ប្រទេសថៃ សម្រាប់ដឹកជញ្ជូនទំនិញពីប្រទេសទី៣ ឆ្លងកាត់ និងនាំចូលមកកម្ពុជា រហូតដល់អនុស្សារណៈនៃការយោគយល់គ្នាត្រូវបានចុះហត្ថលេខាជាផ្លូវការរវាងភាគីទាំងពីរ។
កាលពីថ្ងៃទី៣១ ខែតុលា ឆ្នាំ២០១៧ គយកម្ពុជា បានឲ្យដឹងថា អាជ្ញាធរគយរបស់ប្រទេសថៃ បានសម្រេចហាមឃាត់ការដឹកជញ្ជូនទំនិញឆ្លងកាត់ប្រទេសថៃចូលទៅប្រទេសទីបី ចាប់ពីថ្ងៃទី១៣ ខែវិច្ឆិកានេះ ប្រសិនបើពុំមានអនុស្សារណៈយោគយល់ថ្មីរវាងប្រទេសទាំងពីរទេនោះ៕