គណបក្សប្រជាជនកម្ពុជាប្រកាសផ្តល់ថវិកាដល់សមាជិករបស់ខ្លួននៅឃុំ-សង្កាត់ សម្រាប់ការចំណាយក្នុងពេលបោះឆ្នោតថ្នាក់ក្រោមជាតិ នៅខែមិថុនាខាងមុខនេះ។
លិខិតខុទ្ទកាល័យគណៈកម្មាធិការកណ្តាលគណបក្សប្រជាជនកម្ពុជា ចុះថ្ងៃទី១១ មីនា ២០១៧ ឲ្យដឹងថា ថ្នាក់កណ្តាលគណបក្សបានសម្រេចផ្តល់ថវិកា បីលានរៀល បន្ថែមទៀតក្នុង ១ឃុំ-សង្កាត់ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ឲ្យដឹងទៀតថា ពីមុនគណបក្សនេះបានផ្តល់ថវិកាចំនួន ១០លានរៀលម្តងហើយក្នុងមួយឃុំ ឬសង្កាត់ តែដោយសារមានតម្រូវការជាក់ស្តែងគណបក្សក៏ទម្លាក់លុយបន្ថែម៣លានរៀលទៀត។
បើមួយឃុំឬមួយសង្កាត់ត្រូវចាយលុយចំនួន១៣លានរៀល មានន័យថា សរុបទាំងជាង១៦០០ឃុំនិងសង្កាត់ទូទាំងប្រទេស គណបក្សប្រជាជនកម្ពុជាត្រូវបានចំណាយជាង៥លានដុល្លារក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំនេះ។
លោក សន ជ័យ នាយកប្រតិបត្តិ នៃអង្គការសម្ព័ន្ធគណនេយ្យភាពសង្គមកម្ពុជា មានប្រសាសន៍ថា អត់មានច្បាប់ណាចែងពីការចាយលុយរបស់បក្សនយោបាយទេ គឺអាស្រ័យលើធនធានរៀងខ្លួន។ លោកបន្ថែមថា មិនមានការពាក់ព័ន្ធនឹងគណនេយ្យភាពក្នុងការប្រើប្រាស់ថវិកាជាតិទេ។
កាលពីការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីឆ្នាំ២០១២ គណបក្សប្រជាជនកម្ពុជាដណ្តើមបានមេឃុំនិងចៅសង្កាត់ចំនួន ១៥៩២មេឃុំ និងមានក្រុមប្រឹក្សា៨២៩២នាក់ ខណៈ គណបក្ស សម រង្ស៊ី និងគណបក្សសិទ្ធិមនុស្ស បានកាន់កាប់ឃុំសង្កាត់ចំនួន៤០ និងក្រុមប្រឹក្សាចំនួន២៩៥៥នាក់៕