បុរសម្នាក់ទៀតត្រូវបានសមត្ថកិច្ចចាប់ខ្លួននៅថ្ងៃនេះនៅឯខេត្តកំពង់ធំ ដែលនាំឲ្យមានមនុស្ស ៣នាក់ហើយ ត្រូវបានសមត្ថកិច្ចចាប់ខ្លួន ពាក់ព័ន្ធទៅនឹងការប្រើអំពើហិង្សាទៅលើសាស្ត្រាចារ្យមហាវិទ្យាល័យម្នាក់កាលពីចុងសប្ដាហ៍កន្លងមកនេះ។ នេះបើតាមការចុះផ្សាយរបស់គេហទំព័រនគរបាលជាតិ។
នាយិការិយាល័យព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ លោក ប៊ុន សត្យា ត្រូវបានដកស្រង់សម្ដីចុះផ្សាយលើគេហទំព័រនគរបាលជាតិថា ជនសង្ស័យឈ្មោះ អាន ផល្លី ត្រូវបានសមត្ថកិច្ចចាប់ខ្លួននៅឯឃុំចើងដើង ស្រុកបារាយណ៍ បន្ទាប់ពីរត់គេចខ្លួន ក្រោយពាក់ព័ន្ធនឹងការប្រើអំពើហិង្សាលើលោក ស៊ុយ សារ៉េត សាស្ត្រាចារ្យបង្រៀននៅមហាវិទ្យាល័យ។
បើតាមគេហទំព័រនគរបាលជាតិ បុរសឈ្មោះ យាត ទិត្យា និង អាន វិនទី ដែលត្រូវបានគេដឹងថា សុទ្ធតែជាសន្តិសុខនៅខណ្ឌដូនពេញនោះ ត្រូវបានសមត្ថកិច្ចចាប់ខ្លួនកាលពីថ្ងៃម្សិលមិញនេះ នៅក្នុងករណីអំពើហិង្សាលើលោក ស៊ុយ សារ៉េត នៅលើដផ្លូវសាធារណៈ ក្រោមការចោទថា បានបើកបរបុករះ និងបើករត់គេចខ្លួន កាលពីថ្ងៃទី១១ ខែមីនានេះ។
ការបើកបរបុករះ និងបើកគេចខ្លួន បានកើតឡើងជាច្រើនករណីនៅក្នុងប្រទេសកម្ពុជា ប៉ុន្តែករណីខ្លះមិនត្រូវបាននាំយកទៅអនុវត្តទោសទៅតាមច្បាប់នោះឡើយ។
ទោះជាយ៉ាងណា កាលពីខែមីនា ឆ្នាំ២០១៣ និស្សិតស្រីម្នាក់វ័យ២៣ឆ្នាំ ដែលត្រូវជាកូនស្រីរបស់អនុប្រធានមន្ទីរពេទ្យបង្អែកខេត្តកណ្តាលផងនោះ បានបើករថយន្តបុករះ និងបណ្ដាលឲ្យមនុស្ស ៣០នាក់រងរបួស ដោយជំរុញឲ្យមហាជនផ្ទុះកំហឹង ប៉ុន្តែ សមត្ថកិច្ច បានទប់ស្កាត់ទាន់ពេល។
កាលពីចុងខែធ្នូឆ្នាំ២០១៧កន្លង បុរសជាអ្នកបើកបរម្នាក់ ត្រូវបានក្រុមមហាជនព្រួតគ្នាវាយបណ្ដាលឲ្យរងរបួសក្បាលធ្ងន់ធ្ងរ បន្ទាប់ពីបើកររថយន្តបុករះបណ្ដាលឲ្យមនុស្ស ៣នាក់ស្លាប់ និង ៨នាក់ទៀតរងរបួស នៅលើមហាវិថីព្រះមុនីវង្ស។
របាយការណ៍ប្រចាំឆ្នាំរបស់នគរបាលជាតិ បានឲ្យដឹងថា មនុស្សជិត ១៨០០នាក់ បានស្លាប់ និងជាង ៥៥០០នាក់ទៀត បានរងរបួស នៅក្នុងគ្រោះថ្នាក់ចរាចរណ៍នៅទូទាំងប្រទេសកាលពីឆ្នាំកន្លងមកនេះ៕
