តំណាងពិសេសអង្គការសហប្រជាជាតិ លោកស្រី រ៉ូណា ស្មីត បានអំពាវនាវឲ្យមានការស៊ើបអង្កេតដោយឯករាជ្យមួយ ទៅលើការបាញ់ប្រហារនៅខេត្តក្រចេះ ខណៈលោកស្រីសោកស្តាយដែលអ្នកសង្កេតការណ៍ការិយាល័យឧត្ដមស្នងការសិទ្ធិមនុស្សអង្គការសហប្រជាជាតិ ហៅកាត់ថា OHCHR និងសង្គមស៊ីវិល មិនត្រូវបានអនុញ្ញាត្តិឲ្យចូលតំបន់នោះ។
ក្នុងការថ្លែងបិទបញ្ចប់ទស្សនៈកិច្ចរបស់គាត់កាលពីថ្ងៃម្សិលមិញនេះ លោកស្រី រ៉ូណា ស្មីត បានលើកឡើងថា ក្នុងដំណើរទស្សនកិច្ចកន្លងមកនេះ លោកស្រីបានទទួលបានរបាយការណ៍ថ្មីបំផុត ទាក់ទងនឹងបញ្ហាសិទ្ធិមនុស្សនៅកម្ពុជា គឺការបាញ់ប្រហារនៅថ្ងៃទី៨ មីនា ដោយកងកម្លាំងប្រដាប់អាវុធទៅលើអ្នកតវ៉ាដីធ្លីជាមួយក្រុមហ៊ុនចំការកៅស៊ូក្នុងស្រុកស្នួល ខេត្តក្រចេះ។
លោកស្រីបន្ថែមថា លោកស្រីបានតាមដានករណីនេះ និងបានលើកឡើងចំពោះមុខមន្ត្រីរដ្ឋាភិបាលផងដែរ ខណៈលោកស្រីសោកស្តាយដែលអ្នកសង្កេតការណ៍អង្គការសង្គមស៊ីវិល មិនត្រូវបានអនុញ្ញាតឲ្យចូលទៅកាន់តំបន់នោះ។
លោកស្រីថា៖ «ខ្ញុំមានសេចក្តីព្រួយបារម្ភចំពោះព័ត៌មានដែលខ្ញុំទទួលបានដែរថា ផ្ទះ និងទ្រព្យសម្បត្តិនៃសហគមន៍ដែលតវ៉ានេះ ត្រូវបានដុតបំផ្លាញ និងថា មានប្រជាពលរដ្ឋយ៉ាងតិចបីនាក់បានរងរបួសដោយសារការបាញ់គ្រាប់កាំភ្លើង និងការវាយដំ ដែលត្រូវបានអះអាងថា ត្រូវបានប្រព្រឹត្តដោយកម្លាំងចម្រុះ។ […] ដើម្បីជាប្រយោជន៍នៃការលើកកម្ពស់ជំនឿចិត្ត និងតម្លាភាព ខ្ញុំជឿជាក់ថា ការអនុញ្ញាតិឲ្យអ្នកសង្កេតការណ៍ឯករាជ្យចូលទៅកាន់តំបន់នោះ ជាការសំខាន់ណាស់។ ខ្ញុំអំពាវនាវឲ្យមានការស៊ើបអង្កេតដោយឯករាជ្យ»។
ក្នុងជំនួបជាមួយរដ្ឋមន្ត្រីក្រសួងមហាផ្ទៃកាលពីថ្ងៃទី១២ មីនា លោកស្រី ស្មីត បានលើកយកករណីនេះចោទសួរលោក ស ខេង ផងដែរ ចំណែកលោក ស ខេង បានឆ្លើយតបថា លោកបានទទួលរបាយការណ៍បឋម និងបានចាត់មន្ត្រីទៅពិនិត្យបន្ថែមចំពោះករណីនេះ។
អ្នកនាំពាក្យក្រសួងមហាផ្ទៃលោក ខៀវ សុភ័គ បានឲ្យដឹងថា ច្បាប់កម្ពុជាពុំបានអនុញ្ញាតឲ្យមានការចូលរួមស៊ើបអង្កេតពីភាគីណាក្រៅពីតួអង្គរដ្ឋាភិបាលនោះទេ។
លោកថា៖ «មិនមែនអាច ឬមិនអាចទេ ប៉ុន្តែ ច្បាប់គេមិនកំណត់ថា ត្រូវតែមានសង្គមស៊ីវិល ត្រូវតែមានអង្គការសហប្រជាជាតិអីទេ។ បើកមើលច្បាប់មើល៍ មានកន្លែងណាគេចែងអញ្ចឹង ហើយកម្ពុជាជារដ្ឋឯករាជ្យអធិបតេយ្យភាព។ ការងារនេះ [រដ្ឋ]ជាអ្នកទទយលខុសត្រូវជាមួយពលរដ្ឋ មានស្ថាប័នទាំងអស់ហ្នឹង តាំងពីនីតិប្រតិបត្តិ តុលាការ នីតិប្បញ្ញត្តិ គេមានអស់ហើយតើ។ គេអត់មានចែងថា ត្រូវតែស៊ើបអង្កេតមានសង្គមស៊ីវិល សង្គមទាហាន សង្គមប៉ូលីសអីណា អត់មានបែងចែកអញ្ចឹងផង»។
ប្រធានផ្នែកស៊ើបអង្កេតនៃអង្គការលីកាដូ លោក អំ សំអាត យល់ថា ការស៊ើបអង្កេតរបស់រដ្ឋាភិបាលមិនទាន់អាចធ្វើឲ្យសង្គមស៊ីវិល និងសាធារណៈអាចទទួលយកបានទាំងស្រុងនៅឡើយទេ ខណៈដែលអ្នកបង្ករនៃរឿងនេះមិនទាន់ចាប់ខ្លួននៅឡើយនោះ។
លោកបន្ថែមថា៖ «ទោះបីរដ្ឋាភិបាលបានបង្ហាញរបាយការណ៍យ៉ាងណាក៏ដោយ ក៏នៅតែមានមន្ទិលសង្ស័យមួយចំនួន ហើយជាពិសេស បើសិនជារកឃើញអ្នករបួស ហេតុអីបានជាមិនចាត់វិធានការថា អ្នកណាជាអ្នកបង្កឲ្យមានរបួសស្នាមហ្នឹង ហើយចេញមុខទទួលខុសត្រូវរកអ្នកដែលទទួលខុសត្រូវ»។
ក្រុមអ្នកភូមិមានជម្លោះដីធ្លីជាមួយក្រុមហ៊ុនចំការកៅស៊ូមួយនៅក្នុងស្រុកស្នួល និងក្រុមសមត្ថកិច្ចចម្រុះប្រដាប់ដោយកាំភ្លើង បានប្រឈមមុខដាក់គ្នាដោយហិង្សាកាលពីថ្ងៃទី៨ ខែមីនា។
សេចក្ដីរាយការណ៍បឋមនានា បានឲ្យដឹងថា ពលរដ្ឋ ៨នាក់ បានស្លាប់ ហើយ ៤០នាក់ទៀត បានរងរបួស ប៉ុន្តែ អាជ្ញាធរខេត្តក្រចេះ បានបដិសេធរបាយការណ៍នេះ ដោយថា គ្មានមនុស្សស្លាប់ទេ គ្រាន់តែមានអ្នករបួស ៩នាក់ប៉ុណ្ណោះ៕
