លោកនាយករដ្ឋមន្ត្រី ហ៊ុន សែន នៅព្រឹកនេះ បានប្រតិកម្មតបទៅនឹងសេចក្តីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ដែលថាការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧នៅកម្ពុជាមិនល្អ ខណៈលោកថ្លែងកោតសរសើរដល់គណៈកម្មាធិការជាតិរៀបចំការបោះឆ្នោត។
ក្នុងពិធីចែកសញ្ញាបត្រដល់និស្សិតសាកលវិទ្យាល័យបញ្ញាសាស្ត្រកម្ពុជា នៅវិទ្យាស្ថានជាតិអប់រំ ថ្ងៃទី១៥ មិថុនា ២០១៧ លោក ហ៊ុន សែន ថ្លែងថាការបោះឆ្នោតគ្មានហិង្សា និងប្រជាជនចេញមកបោះឆ្នោតច្រើន ហើយអង្គការជាច្រើនបានទទួលស្គាល់ការបោះឆ្នោតនេះថាល្អប៉ុន្តែលោកថាខុសគេតែ ប្រេដ អាដាម ម្នាក់ឯង។ លោកថា «តែខ្ញុំអត់យល់ទេ! បណ្តារស្ថានទូតនានារាប់ទាំងទូតអាមេរិកនៅទីក្រុងភ្នំពេញចេញសេចក្តីថ្លែងការណ៍ថាការបោះឆ្នោតហ្នឹងល្អ! ដល់មានអង្គការក្រៅរដ្ឋាភិបាលមួយរបស់ ប្រេដអាដាម Human Rights Watch ស្អីគេនោះ? វាថាអាហ្នឹងអត់ល្អ! បើចឹងស្តាប់អ្នកណាឥឡូវហ្នឹង? អាហ្នុងស្អីក៏មិនល្អដែរ ជាពិសេសឲ្យតែគណបក្សប្រជាជនឈ្នះ គឺថាអាហ្នឹងមិនល្អម៉ង ស្តាប់តែប៉ុណ្ណឹងទៅដឹងហើយ ទាល់តែថា គណបក្សប្រជាជនរលាយបានអាហ្នឹងថាល្អ!»។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្តីថ្លែងការណ៍របស់ខ្លួននៅថ្ងៃទី១២ មិថុនា នៅទីក្រុងញ៉ូវយ៉កសហរដ្ឋអាមេរិក ថាការបោះឆ្នោតឃុំសង្កាត់ឆ្នាំ២០១៧នៅកម្ពុជា មិនពេញលក្ខណៈនៃការបោះឆ្នោតប្រជាធិបេតេយ្យនោះទេ ដោយសារអង្គការនេះលើកឡើងពីការគំរាមរបស់លោក ហ៊ុន សែន ទៅលើអ្នកគាំទ្រ និងសមាជិកបក្សប្រឆាំង ការគំរាមរបស់ក្រសួងមហាផ្ទៃទៅលើអង្គការសង្គមស៊ីវិលនៅមុនការបោះឆ្នោត ការប្រើប្រាស់ប្រព័ន្ធផ្សព្វផ្សាយមិនស្មើភាពគ្នារវាងបក្សកាន់អំណាចនិងបក្សប្រឆាំង ការចេញមកបោះឆ្នោតដោយទាហានដែលស្ថិតក្នុងឯកសណ្ឋាន ភាពមិនប្រក្រតីនៃការបោះពុម្ភសន្លឹកឆ្នោតច្រើនលើសពីចំនួនអ្នកបោះ និងការបាត់បង់សំឡេងរបស់កម្មករចំណាកស្រុក ក៏ដូចជាកម្មកររោងចក្រនៅក្នុងស្រុកជាដើម។
លោក សួន ប៊ុនស័ក្តិ អ្នកប្រឹក្សាយោបល់ផ្នែក សិទ្ធិមនុស្សនិងអភិបាលកិច្ច យល់ថា ការលើកឡើងរបស់ Human Rights Watch គ្រាន់តែជាការបញ្ចេញមតិស្របទៅតាមអ្វីដែលគេរកឃើញប៉ុណ្ណោះ។ លោកថា «ខ្ញុំគិតថាអាហ្នឹងគ្រាន់តែជាសេរីភាពក្នុងការបញ្ចេញមតិរបស់អង្គការអន្តរជាតិទៅលើកិច្ចការរដ្ឋមួយតែប៉ុណ្ណឹងទេ។ មែនទែនទៅ! អ្វីៗឋិតក្នុងឯករាជ្យភាពរបស់រដ្ឋមួយៗក្នុងការដឹកនាំចាត់ចែងរដ្ឋរបស់គេ» ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ បានប្រព្រឹត្តទៅកាលពីថ្ងៃទី៤ ខែមិថុនា ឆ្នាំ២០១៧។ លទ្ធផលបឋម ដែលគណបក្សធំពីរទទួលបានគឺប្រកៀកគ្នា ដោយគណបក្សប្រជាជនកម្ពុជាឈ្នះឃុំសង្កាត់ដល់ទៅ ១,១៥៨ឃុំ-សង្កាត់ ខណៈដែលគណបក្សសង្គ្រោះជាតិឈ្នះបានឃុំ-សង្កាត់ដល់ទៅ ៤៨៧ឃុំ-សង្កាត់ នៅទូទាំងប្រទេស។
ប៉ុន្តែ បច្ចុប្បន្ន គ.ជ.ប កំពុងរាប់សន្លឹកឆ្នោតឡើងវិញនៅតាមឃុំ សង្កាត់ ដែលមានបញ្ហាមួយចំនួន ហើយគ្រោងនឹងប្រកាសលទ្ធផលផ្លូវការនៅថ្ងៃទី២៥ មិថុនា ខាងមុខ៕
