លោកនាយករដ្ឋមន្ត្រីហ៊ុន សែន លើកឡើងថា ជាសំណាងរបស់កម្ពុជា ដែលមានសន្តិភាព ទើបមានការរៀបចំពិធីប្រណាំងទូក តាមប្រពៃណីវប្បធម៌ជាតិ និង ផ្តល់ឱកាសឲ្យពលរដ្ឋមានការសប្បាយរីករាយទៅបាន។
លោកនាយករដ្ឋមន្ត្រីសរសេរនៅលើហ្វេសប៊ុករបស់លោកនៅព្រឹកនេះថា គិតត្រឹមថ្ងៃទី២នៃពិធីបុណ្យអុំទូក កាលពីម្សិលមិញគឺបានផ្តល់ឱកាសឲ្យពលរដ្ឋសប្បាយរីករាយ ហើយក៏ជាឱកាសនៃការបង្ហាញប្រពៃណីវប្បធម៌ជាតិឲ្យបរទេសបានដឹងផង។
លោកនាយករដ្ឋមន្ត្រីបញ្ជាក់ថា ការប្រារព្ធពិធីនេះ ទៅបានដោយសារតែប្រទេសមានសន្តិភាព«៖កម្ពុជាពិតសំណាងខ្លាំងណាស់ដែលមានសុខសន្តិភាពពេញលេញ ដែលផ្តល់ឱកាសអោយប្រទេសយើងបានប្រារព្ឋធ្វីពិធីបុណ្យដ៏អធិកអធមនេះ។»
ទោះជាការលើកឡើងរបស់នាយករដ្ឋមន្ត្រីបែបនេះ ក៏ដោយតែសម្រាប់ សកម្មជនដីធ្លី និង មន្ត្រីសិទ្ធិមនុស្សមួយចំនួនលើកឡើងថា កម្ពុជាមិនទាន់មានសន្តិភាពទាំងស្រុងទេ ដោយសារ ការរំលោភបំពាន ឈូសឆាយដីធ្លី ផ្ទះពលរដ្ឋ ការបំផ្លាញធនធានធម្មជាតិ ការបាញ់សម្លាប់ និង ចាប់ដាក់ពន្ធនាគារ អ្នកចេញមុខរិះគន់ការដឹកនាំរបស់រដ្ឋាភិបាល។