នគរបាល និង យោធាជាច្រើនពាន់នាក់ត្រូវបាន គេដាក់ពង្រាយនៅជុំវិញវត្តដែលមានភាពចម្រូងចម្រាស់មួយនៅជាយក្រុងបាងកកនៅព្រឹកថ្ងៃព្រហស្បតិ៍នេះបង្ហាញថា ពួកគេត្រៀមក្នុងការវាយឆ្មក់ចូល ដើម្បីចាប់មេដឹកនាំសាសនាដែលកំពុងមានវត្តមាននៅទីនោះ។
ការឡោមព័ទ្ធនេះធ្វើឡើងបន្ទាប់ពី មេដឹកនាំយោធាថៃ លោកប្រាយុទ្ធចាន់អូចា ចេញបញ្ជា ដោយប្រើអំណាចពិសេសដាក់តំបន់នោះស្ថិតនៅក្រោមការត្រួតពិនិត្យរបស់ពួកយោធា។
ល្បែងឆ្មា ចាប់កណ្តុររបស់ ក្រុមអ្នកស៊ើបអង្កេតពួកយោធា និង អំណាចឥទ្ធិពលវត្ត Dhammakaya ឬ ហៅវត្តធម្មកាយនៅក្រុងបាងកកនោះ គឺបានចាប់ផ្តើមជាច្រើនខែមកហើយ បន្ទាប់ចោទថា ចៅអធិការវត្តនោះទទួលយកមូលនិធិដែលគេចូលបុណ្យជាលុយកខ្វក់ឬ ជាការលាងលុយ។
ទោះយ៉ាងណាអាជ្ញាធរហាក់មានការស្ទាក់ស្ទើរ ក្នុងការវាយលុកវត្តដែលមានសម្ភារទំនើប មានពុទ្ធបរិស័ទច្រើនទាំងថៃ ទាំងប្រទេសផ្សេងៗទៅគោរពប្រតិបត្តិ។ វត្តនេះមានទំហំជាង៤០០ហិកតា មានផ្លូវច្រើននៅក្នុងនោះ។
ផ្លូវមួយចំនួននៅជុំវិញវត្តនោះត្រូវបានបិទ មិនឲ្យមានអ្នកធ្វើដំណើរចេញ និង ចូលក្នុងវត្តបានទេ ហើយសមត្ថកិច្ចត្រៀមចូលទៅចាប់ព្រះកាយចៅអធិការវត្តដែលមានព្រះជន្មជាង៧០ព្រះវស្សាគឺព្រះតេជគុណ Dhammachayo។នេះបើតាមទីភ្នាក់ងារព័ត៌មានAFP។
ព្រះតេជគុណ Dhammachayo រងការចោទថា ទទួលលុយកខ្វក់ ប្រមាណ១,២ ពាន់លានបាត ស្មើនឹងប្រមាណ ៣៣លានដុល្លារអាមេរិក ពីម្ចាស់ភាគហ៊ុននៃធនាគារមួយដែលបច្ចុប្បន្នជាប់ពន្ធនាគារ។
នៅព្រឹកថ្ងៃព្រហស្បតិ៍នេះ ទាហាន និង នគរបាលរាប់រយនាក់ ព្យាយាមចូលក្នុងវត្ត បិទផ្លូវសំខាន់ៗចូលវត្ត ដែលធ្វើតាមបញ្ជាភ្លាមៗដែលដាក់ចេញពីនាយករដ្ឋមន្ត្រីប្រាយុទ្ធ ចាន់អូចា។
បើតាមសារអ៊ីម៉ែលពីអ្នកនៅខាងក្នុងវត្តបានប្រាប់ ទីភ្នាក់ងារព័ត៌មានAFPថា នគរបាល និង យោធា នៅទីនោះមានប្រមាណ៤០០០នាក់ បិទមិនឲ្យមានការផ្តល់ជំនួយ និង មិនឲ្យមានអ្នកចេញចូលវត្តទេ៕