របាយការណ៍របស់អគ្គស្នងការដ្ឋាននគរបាលជាតិឲ្យដឹងថា គិតត្រឹមថ្ងៃទី១ នៃពិធីបុណ្យចូលឆ្នាំចិន អគ្គីភ័យបានកើតឡើងទូទាំងប្រទេស៣ករណី ដែលបានបំផ្លាញផ្ទះពលរដ្ឋអស់៤ខ្នង ខណៈថ្ងៃទី២នៃអគ្គីភ័យបានបំផ្លាញសាលាឆាន់មួយទាំងព្រឹកផងដែរ។
យោងតាមហ្វេកបុករបស់នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះនៃ អគ្គស្នងការដ្ឋាននគរបាលជាតិ ដែលបានផ្សព្វផ្សាយនៅព្រឹកនេះបានឲ្យដឹងថា អគ្គីភ័យដែលកើតឡើងចំថ្ងៃសែនចិនទី១ បានកើតឡើងសរុបចំនួន៣ករណីគឺ នៅភ្នំពេញ២ករណី និងបន្ទាយមានជ័យ១ករណី បំផ្លាញផ្ទះពលរដ្ឋសរុប៤ខ្នង និងខូចខាតសម្ភារមួយចំនួន។ អគ្គីភ័យទាំងនោះបង្កឡើងដោយឆ្លងចរន្តអគ្គីសនី និងដុតធូបចោល តែពុំបានបណ្តាលឲ្យមានមនុស្សរងគ្រោះនោះទេ។
នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ ក៏បានឲ្យដឹងផងដែរថានៅព្រឹកថ្ងៃសុក្រ ចំថ្ងៃសែនចិនទី២នេះ អគ្គីភ័យក៏បានបំផ្លាញសាលាឆាន់មួយទាំងស្រុងផងដែរ នៅក្នុងវត្តតាំងក្រសៅ ក្នុងឃុំតាំងក្រសៅ ស្រុកប្រាសាទសំបូរ ខេត្តកំពង់ធំ តែពុំមានមនុស្សគ្រោះថ្នាក់ទេ មូលហេតុដុតភ្លើងឆ្អើអន្សម។
ប្រធាននាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ លោក នេត វន្ថា មានប្រសាសន៍ប្រាប់វីអូឌីបន្ថែមថា ករណីអគ្គីភ័យដែលកើតឡើងចំថ្ងៃចូលឆ្នាំចិននេះគឺមានការកើនឡើងជាងថ្ងៃធម្មតា ដោយលោកសំនូមពរដល់ពលរដ្ឋឲ្យចូលរួមបង្ការអគ្គីភ័យនេះទាំងអស់គ្នាតាមរយៈការទុកដាក់របស់ដែលងាយឆាបឆេះឲ្យឆ្ងាយពីភ្លើង និងត្រូវមានបំពង់ពន្លត់អគ្គីភ័យបឋមតាមផ្ទះរៀងខ្លួនផងដែរ។
លោកថា៖ «ចង់និយាយថាបើសិនជាយើងធ្វើមធ្យោបាយផែនការ និងមធ្យោបាយគ្រប់គ្រាន់ តែប្រសិនជាប្រជាពលរដ្ឋមិនចូលរួមជាមួយយើងវានៅតែមានអគ្គីភ័យច្រើនដដែលអញ្ចឹង។ ខ្ញុំគិតថាកិច្ចការសំខាន់គឺត្រូវមានការចូលរួមពីប្រជាពលរដ្ឋ ប្រជាពលរដ្ឋចូលរួមមិច? គឺការចូលរួមទប់ស្កាត់អគ្គីភ័យដោយខ្លួនឯង ឧបករណ៍សម្ភារដែលងាយឆេះហ្នឹងទុកឲ្យនៅឆ្ងាយពីភ្លើង ហើយនឹងមានឧបករណ៍ពន្លត់អគ្គីភ័យបឋម ពេលដែលមានអគ្គីភ័យកើតឡើង គាត់អាចពន្លត់បាន។ ហើយបើមិនបានគាត់អាចរាយការណ៍មកអង្គភាពពន្លត់អគ្គីភ័យបន្ថែម»។
លោកបានឲ្យដឹងថាករណីអគ្គីភ័យឆាបឆេះក្នុងថ្ងៃសែនចិនទាំង៣ថ្ងៃកាលពីឆ្នាំ២០១៥មាន១៣ករណី ឆ្នាំ២០១៦ មាន១៤ករណី និងឆ្នាំ២០១៧មាន១០ករណី៕
