គេហទំព័រអគ្គស្នងការដ្ឋាននគរបាលជាតិបានចុះផ្សាយថា ឈ្មួញកំពុងដឹកឈើដែលខ្លួនមានបែបអណាធិបតេយ្យយកទៅដាក់នៅតាមដេប៉ូលក់នានានៅក្នុងខេត្តបន្ទាយមានជ័យ ក្រោយពីរដ្ឋាភិបាលចេញវិធានការបង្ក្រាបបទល្មើសព្រៃឈើនៅទូទាំងប្រទេស។
អគ្គស្នងការដ្ឋាននគរបាលជាតិចុះផ្សាយកាលពីម្សិលមិញថា ឈើទាំងនោះដឹកចេញពីខេត្តស្ទឹងត្រែងនិងខេត្តឧត្តរមានជ័យ។ តាមការចុះផ្សាយរបស់គេហទំព័រដដែលឲ្យដឹងទៀតថា ឈ្មួញដែលកំពុងដឹកនាំឈើប្រណិតទាំងយប់ទាំងថ្ងៃយកទៅដាក់តាមដេប៉ូនោះមានឈ្មោះដូចជា ប៊ុន ចិន, ចែ ចន្ទ្រា, និងឈ្មោះ ហេង ជាដើម។
គេហទំព័រអគ្គស្នងការដ្ឋាននគរបាលជាតិចុះផ្សាយទៀតថា រថយន្តដឹកឈើទាំងនោះដឹកនាំឈើចូលខេត្តបន្ទាយមានជ័យដោយមិនមានការរារាំងនោះ ដោយសារឈ្មួញបានបង់ប្រាក់គិតជាក្បាលឡាន ឬ បង់គិតជាខែឲ្យសមត្ថកិច្ចពាក់ព័ន្ធ ចំណែកឈ្មួញខ្លះទៀតយកឈ្មោះថ្នាក់ដឹកនាំទៅប្រើ ដើម្បីការពារសកម្មភាពពួកគេ។
ទោះយ៉ាងណា គេហទំព័រនេះ មិនទាន់បានចុះផ្សាយថា តើសមត្ថកិច្ចថ្នាក់លើត្រូវចាត់វិធានការយ៉ាងណា ចំពោះបទល្មើសដឹកជញ្ជូនឈើខុសច្បាប់នេះនៅឡើយ៕