អង្គការបណ្ដាញអាស៊ាន ដើម្បីការបោះឆ្នោតដោយសេរី ឬ ហៅ ANFRELបានចេញសេចក្ដីថ្លែងការណ៍មួយវាយតម្លៃ មុនការបោះឆ្នោតជាតិខាងមុខថា មានភាពមិនល្អប្រសើរសម្រាប់ការប្រកួតប្រជែង។
កាលពីថ្ងៃទី១៥ ខែ មិថុនាម្សិលមិញអង្គការ ANFREL បានចេញរបាយការណ៍លទ្ធផលវាយតម្លៃមុនការបោះឆ្នោតមួយ ដែលមានកម្រាស់ ១៥ ទំព័រ ដោយបានរៀបរាប់ព្រឹត្តិការណ៍ មុនការបោះឆ្នោតជាតិមកដល់នាចុង កក្កដា ខាងមុខ។
ការវាយតម្លៃនោះផ្តោតលើ៤ចំណុចដែលថា បក្សនយោបាយនិងសង្គមស៊ីវិលមិនមានសិទ្ធិពេញលេញឃ្លាំមើល, ប្រព័ន្ធផ្សព្វផ្សាយឯករាជ្យរងការដាក់សម្ពាធ, មានការដាក់សម្ពាធប៉ះពាល់ដល់អារម្មណ៍អ្នកបោះឆ្នោត និង ថាតួអង្គប្រកួតប្រជែងគណបក្សមានឥទ្ធិពលមានតែមួយក្រោយពេលរំលាយគណបក្សសង្គ្រោះជាតិ។
ទោះយ៉ាងណាអ្នកនាំពាក្យគ.ជ.ប លោក ហង្ស ពុទ្ធា ហៅរបាយការណ៍នោះថា មិនឆ្លុះបញ្ជាំងពីស្ថានភាពពិតរបស់សង្គមខ្មែរនោះទេ។
លោក មានប្រសាសន៍ថា៖ «ខ្ញុំគត់សម្គាល់ថា របាយការណ៍នេះ មិនឆ្លុះបញ្ជាំងទិដ្ឋភាពច្បាប់និងសង្គមទេ ដែលទិដ្ឋភាពច្បាប់មានការផ្តល់សិទ្ធិដល់ប្រជាពលរដ្ឋ។»
កាលពីម្សិលមិញស្ថានបេសកកម្មរបស់កម្ពុជាប្រចាំនៅអង្គការសហប្រជាជាតិនិងអង្គការអន្តរជាតិនានានៅទីក្រុងហ្សឺណែវ ក៏បានថ្លែងការពារគ. ជ. ប ដោយបញ្ជាក់ប្រាប់ទៅមន្ត្រីអង្គការសហប្រជាជាតិថា អ្វីដែលកំពុងកើតឡើងនេះមិនមែនជាការរឹតត្បិតនោះទេគ្រាន់តែជាការពង្រឹងដើម្បីឲ្យមានសុវត្ថិភាព និងធានាដំណើរការល្អក្នុងពេលបោះឆ្នោតតែប៉ុណ្ណោះ។ ស្ថានបេសកកម្មនេះបញ្ជាក់ថា សកម្មភាពពេលនេះក៏ដូចដំណើរការបោះឆ្នោតកាលពី២០១៧ ដែលទទួលបានការកោតសរសើរពីសហគមន៍ជាតិនិងអន្តរជាតិដែរ។
ការបោះឆ្នោតជាតិជ្រើសរើសតំណាងរាស្រ្តសភានឹងប្រព្រឹត្តទៅនាថ្ងៃទី ២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០ បក្ស។ ប៉ុន្ដែ ប្រទេសលោកសេរីមួយចំនួនបានចាត់ទុកការបោះឆ្នោតនេះ ថា មិនមានភាពសេរី ត្រឹមត្រូវ និងយុត្ដិធម៌ទេ បន្ទាប់ពីគណបក្សប្រឆាំងដ៏ធំមួយត្រូវបានរំលាយចោល ហើយអាសនៈរបស់អតីតបក្សប្រឆាំង ត្រូវបានបែងចែកឲ្យទៅគណបក្សផ្សេង៕