គណ:កម្មាធិការជាតិរៀបចំការបោះឆ្នោត បានបង្ហាញលទ្ធផលនៃការចុះឈោ្មះបោះឆោ្នតថាចំនួនពលរដ្ឋចុះឈ្មោះបោះឆ្នោតប្រចាំថ្ងៃ បានធ្លាក់ចុះជាបន្តបន្ទាប់ នៅក្នុងរយៈពេលប៉ុន្មានថ្ងៃចុងក្រោយនេះខណៈកាលបរិច្ឆេទផុតកំណត់ចុះឈ្មោះបោះឆ្នោត កាន់តែខិតជិតចូលមកដល់។
លទ្ធផលបណ្ដោះអាសន្ននៃការចុះឈ្មោះបោះឆ្នោតបង្ហាញថា ចំនួនពលរដ្ឋចុះឈ្មោះបោះឆ្នោតប្រចាំថ្ងៃ បានធ្លាក់ចុះពីចំនួនជាង ១០ម៉ឺននាក់កាលពីដើមខែតុលានេះ មកនៅក្នុងរង្វង់ជាង ៤ ទៅ ៥ម៉ឺននាក់ ។
លោក ហង្ស ពុទ្ធា អ្នកនាំពាក្យគជប ធ្លាប់ប្រាប់វីអូឌីថា លោកមិនរំពឹងថា ប្រជាពលរដ្ឋគ្រប់អាយុបោះឆ្នោត នឹងទៅចុះឈ្មោះបោះឆ្នោតមួយរយភាគរយនោះឡើយ ដោយលោកថា ដោយសារតែប្រជាពលរដ្ឋខ្មែរនៅឯក្រៅប្រទេស មិនបានទៅចុះឈ្មោះបោះឆ្នោត។
អ្នកឃ្លាំមើលការបោះឆ្នោត និយាយថា ការចុះផ្សព្វផ្សាយព័ត៌មានស្តីពីការបោះឆ្នោតកន្លែងខ្លះត្រូវបានអាជ្ញាធររារាំង និងថាគ្មានការលើកទឹកចិត្តពី គជប នឹងមានការបង្កការលំបាកដល់ព្រះសង្ឃ ដែលបានទៅចុះឈ្មោះបោះឆ្នោត។