ជនជាតិភាគតិចគួយជាច្រើនគ្រួសារ នៅស្រុករវៀង ខេត្ដព្រះវិហារ ចោទក្រុមហ៊ុនចិនមួយឈ្មោះ ដតខម ថា ឈូសឆាយដំណាំពួកគេ ដោយគ្មានផ្ដល់សំណង ខណៈដែលដីធ្លីពួកគាត់បង្កបង្កើនផលជាង១០ឆ្នាំមកហើយនោះ។
ជនជាតិភាគតិចគួយនៅភូមិត្រពាំងទឹម ឃុំរមទម ស្រុករវៀង អ្នកស្រី យឹម សុផាត និងអ្នកស្រី ញឹក ហឿត ប្រាប់ VOD ស្រដៀងគ្នានៅថ្ងៃនេះថា ដំណាំកសិកម្មពលរដ្ឋជាងមួយរយគ្រួសារនៅតំបន់នោះ ត្រូវបានក្រុមហ៊ុនចិនឈ្មោះ ដតខម១ ឈូសឆាយរំលោភ ដោយមិនផ្ដល់សំណងសមរម្យនោះទេ ដែលធ្វើឲ្យប៉ះពាល់ដល់ជីវភាពពួកគាត់ ខណៈដែលពួកគេបង្កបង្កើនផលលើដីធ្លីនោះជាង១០ឆ្នាំមកហើយ។
អ្នកស្រីបន្ដថា ដីចំការទាំងនោះ ពួកគេមានប័ណ្ណកាន់កាប់ពីអាជ្ញាធរមូលដ្ឋានិងទទួលពីអតីតក្រុមនិស្សិតដែលចុះវាស់វែងឲ្យពួកគាត់កន្លងមក។ ពួកគាត់បន្ដថា ពួកគាត់មិនជំទាស់នឹងការអភិវឌ្ឍនោះទេ ប៉ុន្ដែក្រុមហ៊ុនដែលទទួលបានដីសម្បទានសេដ្ឋកិច្ចពីរដ្ឋាភិបាលនោះ ត្រូវផ្ដល់សំណងដល់ពួកគេ ដើម្បីយកថវិកាទៅដោះដូរដីនៅកន្លែងផ្សេង។ ពួកគេបន្ថែមថា ពលរដ្ឋបានរកដំណោះស្រាយពីអាជ្ញាធរមូលដ្ឋាននិងអាជ្ញាធរស្រុក ប៉ុន្ដែគ្មានប្រសិទ្ធភាព។ ពួកគាត់បន្ដថា៖ “នៅតែឈូសបន្ដ ទោះបីខ្ញុំបិទរបង គេយកគ្រឿងចក្រមកកកាយ មកតាមរករឿងខ្ញុំទៀត ខ្ញុំមិនឲ្យ បរកាត់ដំឡូង ខូចដំឡូងខ្ញុំអស់រាប់រយគុម្ព បើគេចុះមកមើលឃើញជាក់ស្ដែង ខេត្ដអីគេចុះមកថត។ ខ្ញុំមិនដឹងជាទៅណា ខ្ញុំវាក្រខ្លាំងពេករកលុយទិញអង្ករចក្រគ្មានទេ“។
VOD មិនអាចទាក់ទងអ្នកគ្រប់គ្រងក្រុមហ៊ុនដែលរងការចោទប្រកាន់បាននៅឡើយទេ។
ប៉ុន្ដែករណីនេះ មេឃុំរម្យទម លោក ប្រាក់ ថន មានប្រសាសន៍ទទួលស្គាល់ថា ពិតជាមានក្រុមហ៊ុនចិនឈ្មោះ ដតខម១ ឈូសឆាយលើដីដំណាំពលរដ្ឋមែន ប៉ុន្ដែលោកមិនដឹងពីចំនួនគ្រួសារដែលរងប៉ះពាល់ពិតប្រាកដនោះទេ។ លោកបន្ដថា លោកគ្មានលទ្ធភាពដោះស្រាយ ទុកឲ្យពលរដ្ឋនៅតាមគ្រួសារនីមួយ រារាំងគ្រឿងចក្ររបស់ក្រុមហ៊ុនចិននោះ ដោយលោកថាជម្លោះនោះកើតឡើងមុនលោកកាន់តំណែងទៅទៀត។ លោកបន្ដថា៖ “ឲ្យប្រជាពលរដ្ឋហ្នឹងទៅទប់ស្កាត់សិន បើផ្ទុះទ្បើងវិញ ខ្ញុំដោះស្រាយ ព្រោះយើងទាមទារឲ្យគាត់ដោះស្រាយញឹកញាប់ គាត់អត់ដោះស្រាយ ចឹងប្រជាពលរដ្ឋគាត់ខឹងសម្បា គាត់ប្ដឹងមកខ្ញុំ។ ខ្ញុំប្រាប់ឲ្យពលរដ្ឋ បើក្រុមហ៊ុនឈូសចំចន្លោះណាមួយ ឲ្យពលរដ្ឋបោះបង្គោលកន្លែងហ្នឹង“។
ដោយឡែក អភិបាលខេត្ដព្រះវិហារ លោក អ៊ុន ចិន្ដា មានប្រសាសន៍ថា ពលរដ្ឋដែលរងគ្រោះអាចដាក់ពាក្យប្ដឹងទៅសាលាខេត្ដ។ លោកថា៖ “ឲ្យគាត់មកដាក់ពាក្យមកខេត្ដ“។
ទោះជាយ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុក ខេត្ដព្រះវិហារ លោក ឡោ ចាន់ មានប្រសាសន៍ថា លោកនឹងទៅស៊ើបអង្កេតលើបញ្ហានេះ បន្ទាប់ពីទទួលដំណឹងពីពលរដ្ឋ ដែលលោកថាក្រុមហ៊ុននោះជាក្រុមហ៊ុនចិន ដែលទទួលបានសិទ្ធិរុករ៉ែមាសនៅតំបន់នោះ។ លោកបន្ដថា តាមច្បាប់ការផ្ដល់ដីសម្បទានសេដ្ឋកិច្ចដល់ក្រុមហ៊ុនណាមួយ រដ្ឋាភិបាលត្រូវសិក្សាពីផលប៉ះពាល់និងផ្ដល់សំណងដល់ពួកគាត់ឲ្យបានសមរម្យ៕
