យ៉ាងហោចណាស់រថយន្តធុនធ្ងន់ចំនួន ១៨៦គ្រឿង ត្រូវបានសមត្ថកិច្ចរកឃើញថា បានផ្ទុកលើសទម្ងន់កំណត់ និងផាកពិន័យ កាលពីខែធ្នូឆ្នាំមុន ដោយបានកើនឡើងជិត ៣០ភាគរយ បើធៀបទៅនឹងតួលេខខែវិច្ឆិកាកន្លងមក។
របាយការណ៍របស់ក្រសួងសាធារណការ និងដឹកជញ្ជូន បានបង្ហាញថា រថយន្តផ្ទុកលើសទម្ងន់ចំនួន ១៨៦គ្រឿង ត្រូវបានផាកពិន័យនៅតាមស្ថានីយត្រួតពិនិត្យចំនួន ២៥កន្លែង នៅទូទៅប្រទេស កាលពីខែធ្នូកន្លងមក ដោយបានកើនឡើងពីចំនួន ១៤៤គ្រឿង កាលពីខែវិច្ឆិកា។
របាយការណ៍ដដែលនេះ បានបង្ហាញថា សមត្ថកិច្ចបានផាកពិន័យលើរថយន្តទាំងនោះ ដោយប្រមូលបានថវិកាដល់ទៅជាង ៣៦៧លានរៀល ដោយបានកើនឡើងជាង ៤៦ភាគរយ បើធៀបនឹងខែវិច្ឆិកាឆ្នាំ២០១៦កន្លងមក។
របាយការណ៍ក៏បានបង្ហាញផងដែរថា ស្ថានីយប្រាសាទក្នុងខេត្តកំពង់ធំ ស្ថានីយលង្វែកក្នុងខេត្តកំពង់ឆ្នាំង ស្ថានីយថ្នល់កែងខេត្តកំពង់ចាម ស្ថានីយឃ្លាំងមឿងខេត្តពោធិ៍សាត់ និងស្ថានីយស្ទឹងច្រាលខេត្តព្រះសីហនុ នៅតែនាំមុខគេ ជាស្ថានីយដែលមានរថយន្តផ្ទុកលើសទម្ងន់ឆ្លងកាត់ច្រើនជាងគេ៕