កម្មករមួយក្រុមបានតវ៉ាជំរុញឲ្យរដ្ឋាភិបាលចាត់វិធានការក្រុមហ៊ុនតម្បាញមួយនៅខេត្តកំពង់ស្ពឺដែលពួកគេចោទថាក្រុមហ៊ុននោះបានបញ្ឈប់កម្មករ ប្រមាណជា៥០០នាក់ រំលោភច្បាបការងារ។
ក្នុងសន្និសីទសារព័ត៌មានមួយ មុខក្រសួងការងារ ក្នុងរាជធានីភ្នំពេញ នាព្រឹកថ្ងៃទី១៧ខែកុម្ភៈនេះ ប្រធានចលនាកម្មករកម្ពុជា លោក ប៉ាវ ស៊ីណា អះអាងថាប្រធានរោងចក្រអ៊ែដ្យាយល៍ ស្វេតថើ ខេមបូឌែ (Agil Sweater Cambodia.)បានប្រើជើងកាង វាយតប់ក្រុមអ្នកទាមទារលក្ខណ្ឌការងារនិងបញ្ឈប់កម្មករនិយោជិតប្រមាណជា៥០០នាក់ មិនបានទូទាត់អត្ថប្រយោជន៍ផ្សេងៗជូនពួកគេតាមច្បាប់ស្តីពីការងារ។
ករណីនេះ លោក ប៉ាវ ស៊ីណា ជំរុញឲ្យក្រសួងាការងារ ចាត់វិធានទៅលើភាគីក្រុមហ៊ុនឲ្យមានប្រសិទ្ធភាព ដែលលោកថា ដើម្បីរកយុត្តិធម៌ជូនកម្មករដែលបានបណ្តេញចេញពីការងារ។ លោកថា៖ “និយោជកនៃរោងចក្រ អ៊ែដ្យាយល៍ស្វេតថឺនេះ មិនបានគោរពសិទ្ធិកម្មករ រើសអើងសេរីភាពសហជីព ប្រើប្រាស់កម្លាំងជនពាលមកវ៉ៃដំ មកលើកម្មករ គំរាមកំហែងផ្នែកស្មារតី ការកេងប្រវ័ញ្ញប្រាក់ឈ្នួលជាដើម។ ទាំងអស់នេះ ដែលយើងមើលឃើញថាក្រសួងមិនត្រូវអនុញ្ញាតឲ្យនិយោជកបែបនេះ នាំចេញសម្លៀកបំពាក់ ដែលពោរពេញទៅដោយការកេងប្រវ័ញ ពោរពេញទៅដោយការរំលោភសិទ្ធិមនុស្សនាំចេញពីប្រទេសខ្មែរយើងទេបាទ!”។
លោកប៉ាវ ស៊ីណា អះអាងទៀតថាវិវាទអូសបន្កាយជាង៥០ថ្ងៃមកនេះ លោកថាស្ថាប័នពាក់ព័ន្ធហាក់ឃុបឃិតគ្នាលើកទឹកចិត្តឲ្យក្រុមហ៊ុនតម្បាញមួយនេះ រំលោភសិទ្ធិក្រុមអ្នកតវ៉ាជាបន្តបន្ទាប់។
អ្នកតវ៉ាម្នាក់ទៀត ឈ្មោះ ហង់ សាវឿន អះអាងដែថា ក្រៅពីបណ្តេញពួកគេចេញពីងារ ស្ត្រីរូបនោះថាក្រុមហ៊ុនបានកិបកេងប្រាក់ឈ្នួលពួកគេទៀតផង។ លោកសាវឿន អះអាងថាការកិបកេងនោះ ដោយពួកគេពិនិត្យឃើញថាមុនបើកលុយតារាងបញ្ជាក់ប្រាក់ឈ្នួលដែលពួកគេបានផ្តិតមេដៃយល់ព្រមខុសគ្នានឹងចំនួនទឹកប្រាក់ដែលពួកគេបានទទួលនៅថ្ងៃបើកលុយ។
ហង់ សាវឿន បញ្ជាក់ថាពេលពួកគេទៅតវ៉ាមន្ត្រីអះអាងថាជាកំហុសបច្ចេកទេស ហើយមិនបានសងលុយដែលបាត់នោះមកកម្មករនិយោជិតវិញទេ។ ពួកគេទទូចឲ្យរដ្ឋាភិបាលជួយធ្វើអន្តរាគមន៍លើការរំលោភបំពាននិងកេងប្រវ័ញ្ចនេះ។ ស្ត្រីរូបនោះថា៖ “ចេញមុនបាន៣០៦ដុល្លារ ដល់ពេលផ្តិតមេដៃយកហើយ ស្អែកឡើង កម្មករចូលធ្វើការវិញពេលបើកលុយ ក្រដាសលុយ បើកបានតែ១៧៣ដុល្លារ។ សួរប្រធានទៅ ប្រធានថាឲ្យទៅ ប្រធានថាឲ្យយើងទៅសួរខាងoffice(ការិយាល័យ) ។ ខាងofficeគេថាខាងកុំព្យូទ័រគេនឹងមានបញ្ហា”។
VODមិនអាចរកការឆ្លើយតបពីភាគីរោងចក្រអែដ្យាយល៍ ស្វេតថើ ជុំវិញការលើកឡើងរបស់កម្មករនេះបានទេនៅថ្ងៃពុធនេះ។ ប៉ុន្តែប្រធានមន្ទីរការងារប្រចាំខេត្តកំពង់ស្ពឺលោក ចឹក បូរិន អះអាងថាវិវាទអូសបន្លាយនៅក្រុមហ៊ុននេះ លោកបានបញ្ជូនទៅក្រុមប្រឹក្សាអាជ្ញាកណ្តាលហើយ។
លោក ចឹក បូរិន អះអាងទៀតថាចំណែកការបញ្ឈប់អ្នកតវ៉ានោះ លោកថាជាសេចក្តីសម្រេចរបស់តុលាការមិនជាប់ពាក់ព័ន្ធនឹងការរំលោភច្បាប់ការងារទេ។ លោកថា៖ “ព្រោះអីតុលាការសម្រេចឲ្យគាត់ចូលធ្វើការ រយៈពេល៣៨ម៉ោង ក្រោយពីការចេញដីកា បើគាត់អត់ចូល មានន័យថា គាត់បោះបង់ការងារចោលខ្លួនឯង។ អញ្ចឹងដល់ពេលគាត់អត់ចូល អាហ្នឹងក្រុមហ៊ុនគេអនុវត្តតាមតុលាការ។ គាត់បានផ្តល់ជូន៣ចំណុចទី១ប្រាក់ខែចុងក្រោយ ប្រាក់បំណាច់ឆ្នាំនិងប្រាក់៥% ពីព្រោះអានេះ ក្រុមហ៊ុនយល់ថាកម្មករបោះបង់ការងារចោលមិនមែនក្រុមហ៊ុនបញ្ឈប់ទេ”។
ការផ្ទុះវិវាការនៅរោងចក្រអ៊ែដ្យាយល៍ស្វេថើ នៅខេត្តកំពង់ស្ពឺនេះ បានកើតឡើងតាំងពីថ្ងៃទី២៥ ខែធ្នូឆ្នាំ២០១៥ រហូតមកដល់ពេលនេះ សកម្មជនសហជី៦នាក់រួមទាំងលោក ប៉ាវ ស៊ីណា ផង ដែលចេញមុខជួយរកដំណោះស្រាយជូនកម្មករនិយោជិតកំពុងជាប់បណ្តឹងនៅតុលាការ។
ក្រៅពីរកកិច្ចអន្តរាគមន៍នៅមុខក្រសួងការងារ ក្រុមអ្នកតវ៉ាបានដាក់ញត្តិនៅក្រសួងពាណិជ្ជកទាមទារឲ្យ ក្រសួងជំនាញមួយនោះ បិទការនាំចេញសំលៀកបំពាក់រោងចក្រតម្បាញមួយនេះដែលក្រុមអ្នកតវ៉ាថាដើម្បីដាក់សម្ពាធឲ្យក្រុមហ៊ុននោះងាកមកគោរពច្បាប់ការងារ យកកម្មករនិយោជិតចូលធ្វើការវិញនិងដកពាក្យបណ្តឹងប្តឹងសហជីពនិងកម្មករជាដើម៕
