សមត្ថកិច្ចបានដឹកលោក គឹម សុខ អ្នកឃ្លាំមើលនិងអត្ថាធិប្បាយបញ្ហាសង្គមយកទៅឃុំខ្លួននៅម៉ោងជាង៣រសៀល ហើយពលរដ្ឋដែលតាមដានករណីនេះនាំគ្នាស្រែកតវ៉ានិងរិះគន់តុលាការថា ធ្វើការមិនបម្រើផលប្រយោជន៍ពលរដ្ឋ។
រថយន្តស៊ឺរ៉ែន បិទកញ្ជក់ពណ៌ខ្មៅ បានបើកចេញពីសាលាដំបូងយ៉ាងលឿន កាត់ហ្វូងប្រជាពលរដ្ឋដែលនៅតាមដានជុំវិញនោះ។
ដោយឡែក ព្រះតេជគុណ ប៊ុត ប៊ុនតិញ ដែលអមដំណើរលោក គឹម សុខ ទៅសាលាដំបូងរាជធានីភ្នំពេញ បានឲ្យដឹងថា ចាប់ពីម៉ោង១១ព្រឹកថ្ងៃនេះ ដល់ម៉ោងជាង៣រសៀល ព្រះរាជអាជ្ញា សៀង សុខ បានសួរព្រះអង្គ ដោយផ្តោតលើមូលនិធី គឹម សុខ ថានណាជាអ្នកបង្កើត។ ព្រះអង្គបន្តថា៖ «ព្រះរាជអាជ្ញាបានសួររកអ្នកណាជាអ្នកចូលរួមក្នុងសមាសភាពបង្កើតគណៈកម្មការមូលនិធិ គឹម សុខ ហើយបានសុំច្បាប់ស្របច្បាប់ហើយឬនូវ ?អាត្មាបានឆ្លើយជាមួយនឹងលោកព្រះរាជអាជ្ញា សៀង សុខ ថា ជំរើសដែលបានផ្តិតមេដៃនៅក្នុងហត្ថលេខាប្រគល់ព្រះរាជអាជ្ញាគឺថាមានតែភិក្ខុប៊ុត ប៊ុនទិញមួយទេដែលឈរជាជំហក្នុងការបង្កើតមូលនិធិនោះ។ អ្នកផ្សេងទៀតមិនទាន់មានចម្លើយ មានឈ្មោះប្រាកដថាគេនឹងចូលរួមឬអត់ទេ»។
បើតាមសហគមន៍បឹងកក់ ដែលតាមពីក្រោយរថយន្តដឹក លោក គឹម សុខ បានឲ្យដឹងថា លោក គឹម សុខ ត្រូវបានតុលាការបញ្ជូនទៅឃុំខ្លួននៅពន្ធនាគារព្រៃស។
កាលពីពេលថ្មីៗនេះ លោក គី តិច មេធាវីការពារក្តីឲ្យលោកនាយករដ្ឋមន្ត្រី ហ៊ុន សែន បានប្តឹងលោក គឹម សុខ ពីរសំណុំរឿង។ សំណុំរឿងទីមួយ ប្តឹងលោក គឹម សុខ ថា បានអត្ថាធិប្បាយចោទប្រកាន់គណបក្សប្រជាជនកម្ពុជាថា ជាអ្នកសម្លាប់លោកបណ្ឌិត កែម ឡី ដោយមិនមានមូលដ្ឋាន និងទាមទារសំណងជំងឺចិត្ត៥០ម៉ឺនដុល្លារ។ បណ្តឹងមួយករណីទៀតថា លោក គឹម សុខ បាន ចោទ រដ្ឋាភិបាលកម្ពុជា ថា ជាអ្នករៀបចំប្រព័ន្ធមួយ ដើម្បីសម្លាប់មនុស្ស ហើយរកមុខឃាតកមិនឃើញ និងទារប្រាក់សំណង១០លានរៀលផងដែរ។
បើតាម ព្រះសង្ឃ ប៊ុត ប៊ុនតិញ តុលាការបានចោទប្រកាន់លោក គឹម សុខ ចំនួនពីរបទល្មើស រួមមាន បទ «ញុះញង់ឱ្យប្រព្រឹត្តិបទឧក្រិដ្ឋជាអាទិ៍ និងបរិហាកេរ្តិ៍ ជាសាធារណៈ» ដោយបញ្ជូនទៅឃុំខ្លួនបណ្តោះអាសន្ននៅពន្ធនាគារ៕
