មានទាំងអ្នកស្លៀកសំលៀកបំពាក់ធម្មតា មានទាំងអ្នកស្លៀកឯកសណ្ឋាននគរបាល និងសន្តិសុខ កំពុងតែកាន់ឧបករណ៍សំណង់ដូចជា ញញួរ រណា ដែកស្បែង តែមិនមែនសាងសង់ទេ គឺនាំគ្នារុះយកឈើ ស័ង្កសី ក្តារបន្ទះ ពីបន្ទប់តូចៗ នៅលើត្រពាំងដែលគោកទឹកអស់។ ដើរពីលើស្ពានឈើទទឹងប្រហែលមួយម៉ែត្រ ដែលគេសង់ខ្វាត់ខ្វែងមើលទៅបន្ទប់ផ្ទះ ខ្លះនៅពេលគេរុះអស់ ឃើញមានតែសំរាមពាសពេញ ច្រើនជាងគេគឺដបទឹកសុទ្ធ។ ទីនេះ គេស្គាល់ថា ជាតំបន់ត្រពាំងឈូក ស្ថិតនៅសង្កាត់ទឹកថ្លា ខណ្ឌសែនសុខ នៅចំហៀងម្ខាងផ្លូវ២៧១ ទល់មុខពេទ្យលោកសង្ឃចន្លោះទៅផ្សារ ហេង លី ដែលល្បីថាបញ្ហាគ្រឿងញៀនកន្លងមកមិនអាចបង្ក្រាបបាន ដោយសារត្រពាំងឈូកជាតំបន់ដែលមានភាពស្មុគស្មាញ ហើយនៅខែកុម្ភៈ ឆ្នាំ២០១៧នេះ មានការចុះបង្ក្រាបទ្រង់ទ្រាយធំជាងមុន។
អង្គុយក្នុងផ្ទះលក់អីវ៉ាន់ចាប់ហួយជាប់បន្ទាប់ដែលគេកំពុងរុះ អ៊ំស្រីម្នាក់ថា អ៊ំបានមកនៅទីនេះតាំងពីយូរហើយ ដោយទិញតពីជនពិការដែលគេចែកដីនេះពីមុនឲ្យ «ពើកលើ ខាងក្រោមសុទ្ធទឹក។ ខ្ញុំចូលដំបូងតាំងពីខាងក្រោមអត់មានពើកអី ទឹកល្ហេវល្ហរ។ អ្នករើផ្ទះហ្នឹងជាប់ពាក់ព័ន្ធនឹងគ្រឿងញៀន…»។
ស្ត្រីចំណាស់ម្នាក់ទៀត កំពុងអង្គុយរង់ចាំគេមកបាញ់ថ្នាំសំគាល់ដីរបស់គាត់ បន្ទាប់ពីបានរុះផ្ទះខ្លួនឯងយកឈើរួចហើយ អ៊ំស្រីថាផ្ទះគាត់មិនពាក់ព័ន្ធគ្រឿងញៀនទេ គ្រាន់តែជួលឲ្យគេបើកហ្គេម ហើយខ្លាចចង់លក់ផ្ទះចេញ «លក់បានផ្ទះមួយហើយ នៅសល់ផ្ទះពីរទៀត។ មិនហ៊ានទុកផ្ទះច្រើនខ្លាចឆេះ លើកមុនគេបញ្ឆេះមួយសារហើយ»។
ងាកមកជួបយុវជនម្នាក់រាងស្គម ឈ្មោះ បូរមី កំពុងអង្គុយមើលគេរុះផ្ទះ ប្រាប់ថាមានអារម្មណ៍ខ្មាសគេ ដែលរស់នៅតំបន់គ្រឿងញៀនជួនកាលប៉ូលិសចាប់ដោយផង ពេលចុះ បង្ក្រាបកន្លងមក «ពេលទៅរៀនមិត្តភក្តិសួរថានៅទឹកថ្លា អត់ហ៊ានថានៅហ្នឹងទេ។ គេចាប់ច្រឡំដែរ អ្នកភូមិជួយប្រាប់ គេព្រលែងវិញ…»។
មាឌក្រអាញដុះក្បាលពោះធំ មានឯកសណ្ឋានពណ៌សមួយឈុត កំពុងនាំកម្លាំងចុះពិនិត្យមើលគេរុះផ្ទះ លោក កែវ គួយ ជាគណៈបញ្ជាការឯកភាពសាលាខណ្ឌសែនសុខ ប្រាប់ថា អ្នកប្រើគ្រឿងញៀនច្រើនមកពីចំងាយ ហើយទិញមកប្រើនៅផ្ទះជួលនៅតំបន់ត្រពាំងឈូកនេះ។ ដោយពិបាកបង្ក្រាបព្រោះផ្ទះជួលនៅពីលើ អ្នកប្រើគ្រឿងញៀនខ្លះនៅពីក្រោម មធ្យោបាយល្អត្រូវរើផ្ទះដើម្បីងាយស្រួលមើល ហើយដីនៅជាកម្មសិទ្ធិរបស់ម្ចាស់ផ្ទះដដែល «កាលណាគាត់រើមានទៅបាត់បង់អី ផ្ទះបងប្អូនណាគាត់មករុះរើទៅ បើមិនរុះរើទេកម្លាំងគណៈបញ្ជាការឯកភាពនឹងរុះរើ។ មិនទាន់ធ្វើផ្ទះវិញបានឥឡូវទេប្រហែលនៅយូរទៀត…»។
លោក មុត សុវណ្ណ ជានាយករដ្ឋបាលខណ្ឌសែនសុខក៏មានវត្តមាននៅពេលនេះដែរ លោកបបួលក្រុមការងារលោកជួយទិញចំណីរបស់ប្រជាពលរដ្ឋដែលមានដាក់លក់តាមផ្ទះផង និងផ្តល់បទសំភាសន៍ផងពីការបង្ក្រាប និងចំនួនតួលេខបន្ទប់ថា «គិតពីដើមខែមករារហូតដល់ថ្ងៃ១២កុម្ភៈ ឃាត់ខ្លួនមនុស្ស៣៥៤នាក់ ស្ត្រី៤៦នាក់ ៧០ករណី រឹបអូសបានថ្នាំញៀន១៥៩ថង់តូច។ ជាវិធានការរដ្ឋបាលត្រូវធ្វើរុះរើបន្ទប់ជួលទាំងអស់៧៣បន្ទប់ ដែលជាកន្លែងចាប់បានជនល្មើសឬអ្នកប្រើប្រាស់ជាក់ស្តែងនៅកន្លែងហ្នឹង!»។
ក្រុមអជ្ញាធរហាក់ដូចជាមកអន្តរាគមន៍ ច្រើនឡើងៗ នៅពេលមានវត្តមានអ្នកសារព័ត៌មាននៅពេលនេះ។ លោក សាង សុភ័គ្រវិចិត្រ អភិបាលរងខណ្ឌសែនសុខ ប្រាប់បន្ថែមថា មុននឹងរុះរើគឺបានបិទប្រកាសមុនរាប់អាទិត្យទើបប្រើវិធានការរដ្ឋបាល ដើម្បីស្រង់ស្ថិតិមុននឹងឲ្យសាងសង់វិញមិនមែនជាលេសដេញប្រជាជនចេញទេ «សូមបញ្ជាក់ថា អ្នកដែលយកលេសហ្នឹងគឺគិតខុសហើយ។ យើងចង់ឲ្យប្រជាជនសប្បាយចិត្ត។ ខ្ញុំតួនាទីជាអភិបាលរងធានាបញ្ហាហ្នឹង ខ្ញុំឈរជើងហ្នឹង អត់មានលេសករណីរើចេញទេ មករករឿងខ្ញុំបាន!»។
រួសរាយ និយាយ ឮៗ ច្បាស់ៗ មានទំនុកចិត្ត លោក ឈុន ចាន់លី គឺជាមេភូមិបុរីកម្ម ក្នុងតំបន់ត្រពាំងឈូកនេះ រំលឹកថានៅតំបន់នេះមិនមែនពាក់ព័ន្ធនឹងគ្រឿងញៀនទាំងអស់ទេ។ កន្លែងដែលពាក់ព័ន្ធគ្រឿងញៀនគឺឋិតក្នុងក្រុម១០ និងក្រុម១១ តែនៅតែមិនមែនមានន័យថាអ្នកនៅទីនោះទាំងអស់ដែរ។ លោកបញ្ជាក់ថា កុំហៅតំបន់អណាធិបតេយ្យ «ក្នុងតំបន់ស្មុគ្រស្មាញ តំបន់មិនទាន់រៀបរយ សូមស្នើកុំឲ្យដាក់ថាតំបន់អណាធិបតេយ្យ… គឺតំបន់មិនទាន់រៀបរយដោយសារបញ្ហាគ្រឿងញៀន…»។
យ៉ាងណាក៏ដោយ អ្នកនៅក្នុងតំបន់នេះនៅតែមានការព្រួយបារម្ភទោះបីជាបានរស់នៅមកយូរជាច្រើនឆ្នាំក៏ដោយ។ អ្នកបារម្ភព្រោះឃើញគេរុះរើផ្ទះ ព្រោះកន្លងមកឃើញមានការបណ្តេញចេញនៅតំបន់ផ្សេង។ អកុសលទើបតែក្លាយជាស្ត្រីមេម៉ាយថ្មីៗ ដែលរស់នៅតំបន់ត្រពាំងឈូកជិត២០ឆ្នាំហើយ អ្នកស្រី គឹម ឡេង នៅតែមិនទុកចិត្ត ព្រោះធ្លាប់បានទៅសួរអជ្ញាធរធ្វើប្លឹងរឹងមិនបាន «ឃើញគេរុះគេរើចេះតែបារម្ភ ព្រោះកន្លែងហ្នឹងយើងវាភិតភ័យ សុទ្ធមានគ្រឿងញៀនមករញ៉េរញ៉ៃយើងបារម្ភ។ ឃើញគេដើរវាស់វែង ចរចាមអារាមអញ្ចេះអញ្ចុះ ខ្ញុំគេងមិនលក់។ ខំប្រឹងចង់ងាប់ចង់រស់បើគេបណ្តេញចេញទៅបានលុយណាទៅទិញផ្ទះនៅ។ សំណូមពរឲ្យមានប្លង់រឹង…»៕