សមត្ថកិច្ចម៉ាឡេស៊ីបានឆ្មក់ចូលឆែកឆេរផ្ទះអតីតនាយករដ្ឋមន្ត្រី លោកណាជីប រ៉ាហ្សាក់ ក្រោយពេលដែលលោកចាញ់ការបោះឆ្នោតកាលពីសប្តាហ៍មុន ដើម្បីរកភស្តុតាង មួយចំនួនជុំវិញការចោទថា ពាក់ព័ន្ធអំពើពុករលួយ។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័របានឲ្យដឹងថា មនុស្សប្រមាណ១០០នាក់ រួមទាំងកម្លាំងនគរបាលនិង អ្នកសារព័ត៌មានបានប្រមូលផ្តុំនៅក្នុងបរិវេណផ្ទះរបស់លោកណាជីបកាលពីម្សិលមិញ។ ទោះយ៉ាងណាសមត្ថកិច្ចបញ្ជាក់ថាពួកគេរកមិនឃើញភស្តុតាងនោះទេ។
ការឆ្មក់ចូលនេះ ធ្វើឡើងក្រោយពេលដែលលោកណាជីប រ៉ាហ្សាក់និងភរិយា ត្រឡប់ពីព្រះវិហារវិញ នៅក្នុងពិធីបន់ស្រន់មួយ។
នាយករដ្ឋមន្ត្រីថ្មីរបស់ម៉ាឡេស៊ីលោកមហាធាមហាមេដបានប្រកាសកាលពីមុនថា លោកនឹងបើកការស៊ើបអង្កេតវិញលើអតីតសហការីរបស់លោកគឺលោកណាជីបរ៉ាហ្សាក់។
កាលពីឆ្នាំ២០១៥លោកណាជីបរ៉ាហ្សាក់រងការចោទថា បានបង្វែរលុយជាតិប្រមាណ៧០០លានដុល្លារទៅជាទ្រព្យផ្ទាល់ខ្លួន។
ប៉ុន្តែលោកណាជីបច្រានចោលការចោទប្រកាន់ទាំងនេះហើយថា លោកបានស្រាយបំភ្លឺបញ្ហាទាំងអស់នេះដល់អាជ្ញាធរជំនាញអស់ហើយ។
