ប្រធានាធិបតីសហរដ្ឋអាមេរិកបញ្ជាក់ថា លោកត្រៀមខ្លួនស្រេចក្នុងការជួបជាមួយលោក គីមជុងអ៊ុន មេដឹកនាំកូរ៉េខាងជើងនៅពេលខាងមុខនេះ ដើម្បីពិភាក្សាពីបញ្ហាកម្មវិធីអាវុធនុយក្លេអ៊ែនៅឧបទ្វីបកូរ៉េ។
អ្នកនាំពាក្យសេតវិមានលោកស្រី Sarah Sanders ថ្លែងកាលពីម្សិលមិញថា ប្រធានាធិបតីសហរដ្ឋអាមេរិកបានត្រៀមខ្លួនស្រេចហើយសម្រាប់ការជួបគ្នានេះ។
ការថ្លែងរបស់អ្នកនាំពាក្យសេតវិមាននេះធ្វើឡើងបន្ទាប់ពីប្រតិកម្មរបស់កូរ៉េខាងជើងតែប៉ុន្មានម៉ោង ដែលថា នឹងអាចលុបចោលគម្រោងគ្នានៅថ្ងៃទី១២ខែមុថុនានៅក្នុងប្រទេសសិង្ហបុរី ដោយសារខឹងសម្បារអាមេរិកនិងកូរ៉េខាងត្បូងធ្វើសមយុទ្ធរួមគ្នា ដែលថា ជាការគំរាមកំហែងដល់សុវត្ថិភាពរបស់កូរ៉េខាងជើង។
ចំណុចដែលនឹងជជែកគ្នារវាងលោកគីម ជុងអ៊ុន និងលោកដូណលត្រាំនោះ គឺការរំលាយចោលកម្មវិធីអាវុធនុយក្លេអ៊ែរបស់កូរ៉េខាងជើងដើម្បីធានាសន្តិសុខនិងសន្តិភាពនៅក្នុងតំបន់ ហើយអាមរិកធានាពីការការពារសន្តិសុខនិងការអភិវឌ្ឍន៍សេដ្ឋកិច្ចរបស់កូរ៉េខាងជើង។
ខណៈមេដឹកនាំអាមេរិកនិងកូរ៉េខាងជើងកំពុងតែមានភាពចម្រូងចម្រាស់គ្នានេះ សិង្ហបុរីនៅតែបន្តរៀបចំ ខ្លួនក្នុងការទទួលមេដឹកនាំទាំងពីរដែលមានការជួបគ្នាជាប្រវត្តិសាស្ត្រនៅក្នុងប្រទេសរបស់ខ្លួននេះ។