គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានច្រានចោលការលើកឡើងរបស់អ្នកជំនាញអង្គការសហប្រជាជាតិ ជុំវិញក្ដីព្រួយបារម្ភទៅលើការរឹតត្បិតប្រព័ន្ធផ្សព្វផ្សាយ មុនការបោះឆ្នោតជាតិមកដល់នាចុងខែកក្ដដាខាងមុខ។
កាលពីថ្ងៃទី១៤ ខែមិថុនា អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សកម្ពុជា អ្នកស្រី រ៉ូណា ស្មីត បានបង្ហាញក្ដីបារម្ភនៅក្នុងសេចក្ដីថ្លែងការណ៍មួយថា ដំណើរការបោះឆ្នោតនៅកម្ពុជា បានរឹតត្បិតទៅលើសេរីភាពប្រព័ន្ធផ្សព្វផ្សាយ។
ជាប្រតិកម្មតបទៅវិញនៅក្នុងសេចក្ដីថ្លែងការណ៍កាលពីថ្ងៃម្សិលមិញនេះ គ.ជ.ប. បានច្រានចោលនូវការលើកឡើងពីសំណាក់អ្នកជំនាញសិទ្ធិមនុស្សអង្គការសហប្រជាជាតិ ដោយថា គ្មានមូលដ្ឋាន និងមិនបានសិក្សាឲ្យស៊ីជម្រៅពីស្ថាប័នរៀបចំការបោះឆ្នោតមួយនេះ។
អ្នកនាំពាក្យ គ.ជ.ប. បានលើកឡើងថា ស្ថាប័នមួយនេះ បាន«ហាមប្រាមអ្នកសារព័ត៌មាន មិនឲ្យចុះផ្សាយព័ត៌មានដែលអាចនាំឲ្យមានការភាន់ច្រឡំ និងបាត់បង់ទំនុកចិត្តក្នុងការបោះឆ្នោត»។
ក្នុងសេចក្ដីថ្លែងការណ៍ដដែលនោះ គ.ជ.ប. បន្តថា ក្រមសីលធម៌អ្នកសារព័ត៌មានត្រូវបានតាក់តែង និងអនុវត្តតាំងពីឆ្នាំ១៩៩៨រហូតមក ហើយនៅឆ្នាំ២០១៦ ខ្លឹមសារទាំងអស់នៃក្រមសីលធម៌នេះ ត្រូវបានរៀបចំ និងដាក់ជូនភាគីពាក់ព័ន្ធជាច្រើនរួមមាន សហភាពអ៊ឺរ៉ុប ប្រទេសជប៉ុន និង ស្ថាប័ននីតិប្បញ្ញត្តិ នីតិប្រតិបត្តិ រួមទាំងអង្គការខុមហ្រ្វែល និង និចហ្វិច ផងដែរ។
បន្ថែមលើនោះ គ.ជ.ប. ក៏លើកឡើងដែរថា ក្រមសីលធម៌អ្នកសារព័ត៌មានរបស់ គ.ជ.ប. នេះ មិនបានហាមឃាត់ប្រព័ន្ធផ្សព្វផ្សាយមិនឲ្យបំពេញកិច្ចការរបស់ខ្លួនស្របតាមច្បាប់ជាធរមាន។ គ.ជ.ប. អះអាងថា ផ្ទុយទៅវិញ វាជាផ្នែក មួយសំខាន់នៃការរាយការណ៍ព័ត៌មានដែលមានតម្លាភាព និងមានទំនួលខុសត្រូវក្នុងកំឡុងពេលបោះឆ្នោត។
គ.ជ.ប. បន្ថែមថា ក្រមសីលធម៌អ្នកសារព័ត៌មានរបស់ គ.ជ.ប. ធ្វើឡើងស្របតាមបទដ្ឋានជាតិ និងអន្តរជាតិព្រមទាំងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយក្នុងមាត្រា១៩ ដែលចែងថា «ការប្រើប្រាស់សេរីភាពនៃការបញ្ចេញមតិ តម្រូវឲ្យមានករណីកិច្ច និង ការទទួលខុសត្រូវដោយពិចារណាទៅលើសិទ្ធិអ្នកដទៃ សន្តិសុខជាតិ និងសណ្ដាប់ធ្នាប់សាធារណៈ»។
ទោះបីជាយ៉ាងណា ក្នុងរបាយការណ៍របស់អង្គការអ្នករាយការណ៍គ្មានព្រំដែន (Reporters without Borders) ចេញផ្សាយកាលពីខែមេសាកន្លងមកនេះ បង្ហាញថា រដ្ឋាភិបាលរបស់លោក ហ៊ុន សែន បានធ្វើទុក្ខបុកម្នេញលើបណ្ដាញផ្សព្វផ្សាយឯករាជ្យនៅមុនការបោះឆ្នោត ដូចជា ការដាក់សម្ពាធ និងមិនចេញប័ណ្ណឲ្យអ្នកសារព័ត៌មាន ការបិទកាសែតភាសាអង់គ្លេស ខេមបូឌា ដេលី ការផ្អាកដំណើរការវិទ្យុអាស៊ីសេរី និងការបិទស្ថានីយ៍វិទ្យុចំនួន ៣២ កាលពីខែសីហាឆ្នាំមុន៕