នៅទីបំផុត ការប្រកួតដែលដ៏ស្វិតស្វាញដែលបានធ្វើឡើងនៅប៉ុស្ដិ៍លេខ៥ក្នុងព្រឹត្តិការណ៍ប្រកួតជម្រុះជើងឯកកាលពីថ្ងៃទី១៦ កញ្ញា កីឡាកររិទ្ធ មុន្នី និងកីឡាករសំអាង ឌុន បានក្លាយជាអ្នកទម្លាក់ជើងខ្លាំង និងល្បីឈ្មោះនៅក្នុងពិភពប្រដាល់២រូបទៀត។ ក្នុងនោះការទម្លាក់គូប្រកួតរបស់កីឡាករ រិទ្ធ មុន្នី ទទួលបានការចាប់អារម្មណ៍ខ្លាំងក្លាជាងគេ ដោយសារតែកីឡាករ ឯម វិចិត្រ ដែលគូប្រកួតរបស់គេគឺជាកីឡាករល្បីឈ្មោះជើងចាស់ ហើយបើនិយាយពីសមត្ថភាពនៅលើសង្វៀនក៏មិនធម្មតានោះដែរទម្រាំរកឃើញចាញ់ឈ្នះ។
លោក សេង កដិកា អ្នករៀបចំកម្មវិធីបានហៅការប្រកួតរបស់គូទាំង២ថាប្រឹងអស់ពីសមត្ថភាពរៀងខ្លួន ប៉ុន្តែបណ្ដាលមកពីការប្រកួតមួយនេះមិនអាចអោយមានពិន្ទុស្មើគ្នា ទើបកំណត់យកតែកីឡាករម្ខាងក្នុងចំណោមទាំង២ដែលបានប្រកួតគ្នា ដើម្បីយកតែម្នាក់ឡើងទៅប្រកួតបន្តក្នុងវគ្គ១៦នាក់ ហើយកីឡាករម្នាក់ទៀតត្រូវធ្លាក់ហាលអាវគួរអោយស្ដាយបើទោះជាគេជើងខ្លាំង។
ជាក់ស្ដែងការប្រកួតរវាង កីឡាករ រិទ្ធិ មុន្នី មកពីក្លិបម្កុដរាជសីហ៍ និងកីឡាករ ឯម វិចិត្រ មកពីក្លិបឫទ្ធពោធិសែនជ័យ បានបង្ហាញនូវការប្រឹងប្រែងនៅលើសង្វៀនដែលស្ថិតនៅព្រែកកំពិសយ៉ាងខ្លាំង ទើបកីឡាករទាំងពីរត្រូវអ្នកគាំទ្រស្រឡាញ់ពេញចិត្តប្រហែលគ្នា មានន័យថាអ្នកណាឈ្នះក៏បាន ហើយអ្នកចាញ់ក៏ធ្វើអោយអ្នកគាំទ្រខកចិត្ត។
លោកថាការប្រកួតមួយគូរនេះ លោកមានការពេញចិត្តជាងគេ ជាពិសេសក្នុងទឹកទី១ បើទោះជាកីឡាកររិទ្ធ មុន្នី បង្គោលខៀវ បានបង្ហាញការឈ្នះប្រៀបធ្វើអោយម្នាក់ៗមើលឃើញពីការធ្លាក់ចេញរបស់ឯម វិចិត្រ ក៏ក្នុងទឹកទី២ កីឡាករបង្គោលក្រហម ឯម វិចិត្រ បានសម្រុកវាយលុកបានល្អជាច្រើនមកវិញក្នុងទឹកទី២ និងទី៣ ធ្វើអោយគណកម្មការពិបាកកាត់ក្ដី។ យ៉ាងណាមិញឆ្លងកាត់ការប្រកួតទាំង៣ទឹក កីឡាកររិទ្ធ មុន្នី នៅតែមានបានសង្កត់ពិន្ទុនាំមុខ លទ្ធផលចុងក្រោយកីឡាករឯម វិចិត្រ ដែលជាជើងខ្លាំងត្រូវធ្លាក់ហាលអាវហើយបាត់បង់ឱកាសឡើងទៅប្រកួតបន្ត ក្នុងពេលដែលការប្រកួតជម្រុះមួយនេះ គឺអ្វីដែលកីឡាករមិនចង់ធ្លាក់។ លោកថានេះជាការប្រកួតជ្រើសរើសជើងឯកក្នុងប្រភេទទម្ងន់៦៥គីឡូក្រាម ដោយបានជម្រើសយកកីឡាករមកពីក្លិបផ្សេងៗរហូតដល់៣២រូបអោយឡើងប្រកួតជម្រុះគ្នា។
ចំពោះរូបមន្តលោកថាគឺតម្រូវអោយសមាសភាពទាំងអស់ចាប់គូគ្នាហើយឡើងប្រកួតចាញ់ធ្លាក់ៗ ដោយអ្នកឡើងបន្តអង្គុយចាំប្រកួតជាមួយអ្នកឈ្នះបន្តទៀត ចំណែកអ្នកចាញ់គឺធ្លាក់តែម្ដង ដោយអត់មានតម្រូវអោយប្រកួតសន្សំពិន្ទុទៀតទេ។
លោកថានេះមិនមែនជាលើកទី១របស់ប៉ុស្ដិ៍លេខ៥នោះទេ ប៉ុន្តែសម្រាបប់ការប្រកួតដែលបានធ្វើឡើងនៅសង្វៀនព្រែកកំពិស គឺជាការចាប់ផ្ដើមលើកទី១សម្រាប់ការប្រកួតជ្រើសជើងឯកក្នុងប្រភេទទម្ងន់៦៥គីឡក្រាម ដែលមានកីឡាករល្អៗទាំងចាស់ទាំងក្មេង និងល្បីៗឈ្មោះច្រើនរូបក្នុងពិភពប្រដាល់ប៉ះគ្នាបែបនេះ។ លោកថាបើធៀបនឹងសមត្ថភាព និងប្រវត្តិប្រកួត កីឡាករឯម វិចិត្រ មានកម្រិតល្អជាង អ៊ីចឹងហើយទើបលោកសម្ដែងការភ្ញាក់ផ្អើលក្នុងពេលដែលកីឡាករទាំងពីរប៉ះគ្នា ហើយស្រាប់តែកីឡាកររិទ្ធ មុន្នី ដណ្ដើមបានជោគជ័យ ខណៈដែលលោកក៏មើលឃើញពីសមត្ថភាពដ៏ខ្លាំងរបស់កីឡាករម្ខាងទៀត ដែលអ្នកណាក៏មើលឃើញថានោះជាការប្រកួតដ៍ស្វិតស្វាញ។
កីឡាករ ឯម វិចិត្រ បានអះអាងថា លោកបានចំណាយហ្វឹកហាត់រហូតដល់ជាង១០ថ្ងៃ ហើយលោកក៏មិនទទួលប្រកួតនៅតាមប៉ុស្ដិ៍ផ្សេងតម្រូវតាមការចង់បានរបស់គណកម្មការរបស់ប៉ុស្ដិ៍លេខ៥ផងដែរ ប៉ុន្តែចុងក្រោយលោកនៅតែធ្វើមិនបានតាមការគ្រោងទុក។ លោកសម្ដែងការសោកស្ដាយដែលឆ្លងមិនផុតក្នុងវគ្គ៣២នាក់ជម្រុះយក១៦នាក់ ដែលធ្វើអោយលោកបាត់បង់ឱកាសបន្តទៅកាន់វគ្គបន្ត និងធ្វើអោយក្ដីសង្ឃឹមរបស់លោកត្រូវបាត់បង់។ លោកទទួលស្គាល់ថានោះជារឿងអាម៉ាស់មួយដែលលោកធ្លាក់ហាលអាវនៅក្នុងវគ្គនេះ តែលោកគូប្រកួតរបស់លោកក៏មិនមែនជាកីឡាករជើងថ្មី និងខ្វះសមត្ថភាពងផងដែរ ទើបលោកយល់ថាអ្វីដែលលោកបរាជ័យគឺជារឿងស័ក្ដសម និងចាត់ទុកជាបទពិសោធន៍អាក្រក់មួយដែលលោកត្រូវតែប្រឹងប្រែងបន្តទៀត។
លោកថាការប្រកួតដណ្ដើមជើងឯកមួយនេះ មានភាពស្វិតស្វាញ ហើយលោកក៏នឹងសរសើរចំពោះកីឡាករដែលមានឱកាសបានឡើងទៅកាន់វគ្គ៤នាក់ចុងក្រោយផងដែរ ក្នុងពេលដែលលោកប្រកាសថានេះជាជំនួបរវាងកីឡាករខ្លាំងយ៉ាងកម្រនៅក្នុងពិភពប្រដាល់ ដែលសូម្បីតែអ្នកបានឡើងពីវគ្គ៣២នាក់ទៅវគ្គ១៦ ដែលជាជុំដំបូង គឺតានតឹងស្រាប់ទៅហើយ។
កីឡាករ រិទ្ធ មុន្នី បានបង្ហាញអារម្មណ៍សប្បាយចិត្តយ៉ាងខ្លាំងបន្ទាប់ពីបានឆ្លងផុតជុំទី១ហើយបានឡើងទៅកាន់វគ្គ១៦នាក់ដែលជុំទី២។ យ៉ាងណាមិញ លោកថាក្រោយការទម្លាក់កីឡាករជើងចាស់ ឯម វិចិត្រ លោកមិនសូវសង្ឃឹមសម្រាប់ការប្រកួតជម្រុះក្នុងវគ្គ១៦នាក់យក៨នាក់នៅពេលខាងមុខនោះទេ ក្នុងពេលដែលទទួលស្គាល់ថាការប្រកួតមួយនេះសុទ្ធតែមានវត្តមានកីឡាករល្អៗ និងមានប្រវត្តិប្រកួតខ្លាំងៗក្នុងប្រភេទទម្ងន់៦៥គីឡូក្រាម។ លោកថាការប្រកួតមួយនេះ បានតម្រូវអោយប៉ះជាមួយកីឡាករ ឯម វិចិត្រ ទើបលោកចំណាយពេលយ៉ាងហោច២អាទិត្យឯណោះក្នុងការហ្វឹកហាត់ជាប់លាប់ ក្នុងពេលដែលលោកមិនទាន់រាប់បញ្ចូលការចំណាយពេលហាត់រត់បង្កើនកម្លាំងស៊ុហ្វអស់រយៈពេលច្រើនអាទិត្យនោះផង។
បើធៀបនឹងការប្រកួតមួយនេះ លោកថាសំខាន់ជាងគេការប្រកួតដណ្ដើមជើងឯកដែលលោកចូលរួមប្រកួតមុនៗ ដោយសារតែការប្រកួតមួយនេះគឺចាញ់ធ្លាក់ចេញតែម្ដង ដែលខុសពីការប្រកួតផ្សេងៗគឺមានការប្រកួតវិលជុំចុះឡើងៗច្រើនលើកទម្រាំដឹងថាធ្លាក់ ឬទៅវគ្គបន្ត។ យ៉ាងណាមិញ លោកថាការប្រកួតនៅក្នុងព្រឹត្តិការណ៍មួយនេះ ក៏អាចមិនប្រាកដថាអ្នកខ្លាំងសុទ្ធតែបានឡើងទាំងអស់នោះដែរ ជាពិសេសប្រសិនបើការប្រកួតមួយនោះភ្លាត់ស្នៀតនៅពេលវាយសម្រុកដែលបណ្ដាលអោយបាក់ជំហរ។ លោកចាត់ទុកថាជ័យជម្នះលើកីឡាករ ឯម វិចិត្រ ជារឿងសំណាងច្រើនជាងបច្ចេកទេស ខណៈដែលលោកបានអះអាងថាត្រូវការប្រើពេលប្រឹងប្រែងច្រើនទៀតប្រសិនបើចង់បន្តឡើងទៅកាន់វគ្គ៤នាក់ចុងក្រោយ ដើម្បីដណ្ដើមយកពានជើងឯក និងប្រាក់លានចុងក្រោយ។
សម្រាប់មួយគូទៀត កីឡាករសំអាង ឌុន មកពីក្លិបខេមរភូមិន្ទ បានវាយទម្លាក់កីឡាករជើងខ្លាំង ខុន ស៊ីចាន់ មកពីក្លិបអប់រំកាយកីឡាស្រុកអន្លង់វែងខេត្តឧត្តមានជ័យដោយពិន្ទុក្រោយបញ្ចប់ការប្រកួតដែលកំណត់ត្រឹមតែ៣ទឹក។ ការប្រកួតមួយគូនេះក៏ស្វិតស្វាញណាស់ដែរ បើទោះជាមើលទៅកីឡាករខុន ស៊ីចាន់ គឺចាញ់ប្រៀបតាំងពីដើមទី ដោយសារតែភាពខ្លាំងរបស់សំអាង ឌុន ដែលជាជើងខ្លាំងម្នាក់។ ឆ្លងកាត់ការប្រកួតក្នុងសប្ដាហ៍ទី៣នេះ កីឡាករ២រូបគឺរិទ្ធី មុន្នី និង សំអាង ឌុន បានឡើងបន្ត ហើយកីឡាករ២រូបគឺ ឯម វិចិត្រ និង ខុន ស៊ីចាន់ បានធ្លាក់ចេញយ៉ាងអាម៉ាសនៅលើសង្វៀន៕