សាលាឧទ្ធរណ៍នៅព្រឹកថ្ងៃព្រហស្បតិ៍នេះ បានបដិសេធសំណើសុំនៅក្រៅឃុំរបស់សកម្មជនដីធ្លីបឹងកក់ អ្នកស្រី ទេព វន្នី ដោយមិនអនុញ្ញាតឲ្យអ្នកស្រីនៅក្រៅឃុំ ដោយសំអាងថាបារម្ភខ្លាចសកម្មជនរូបនោះបង្កអសន្តិសុខដល់ប្រទេសជាតិ។
កាលពីថ្ងៃទី៨ ខែកញ្ញា ឆ្នាំ២០១៦ សាលាដំបូងរាជធានីភ្នំពេញសម្រេចបន្តឃុំខ្លួនសកម្មជនដីធ្លីបឹងកក់ អ្នកស្រី ទេព វន្នី នៅពន្ធនាគារព្រៃស ពាក់ព័ន្ធនឹងសំណុំរឿងហិង្សាក្បែរផ្ទះលោកនាយករដ្ឋមន្ត្រីកាលពីឆ្នាំ២០១៣។
នៅក្នុងបន្ទប់សវនាការនាព្រឹកនេះ មិនមានមេធាវីដែលការពារក្ដីឲ្យអ្នកស្រី ទេព វន្នី ចូលរួមទេ គឺមានតែចៅក្រមចំនួន៣រូបនិងអ្នកស្រី ទេព វន្នី។
បន្ទាប់ពីសវនាការជិត២ម៉ោង ប្រធានចៅក្រមជំនុំជម្រះនៃសាលាឧទ្ធរណ៍ លោក ងួន រតនា បានសម្រេចបន្តឃុំខ្លួនអ្នកស្រី ទេព វន្នី នៅពន្ធនាគារព្រៃសដដែល។ ការសម្រេចឃុំខ្លួននេះ ដោយសំអាងថា ប្រសិនបើឲ្យនៅក្រៅឃុំ អាចបង្កឲ្យចលាចលនៅក្នុងសង្គម។
បន្ទាប់ចេញពីបន្ទប់សវនាការ អ្នកស្រី ទេព វន្នី បានថ្លែងប្រាប់អ្នកសារព័ត៌មានថា ការសម្រេចបន្តឃុំខ្លួនអ្នកស្រីដដែលនេះគឺធ្វើឡើងដោយអយុត្តិធម៌។
អ្នកស្រីបន្តថា ការដែលតុលាការនៅបន្តឃុំនេះ ដោយសាររឿងនយោបាយច្រើនជាង ចំពោះករណីប្រសិនបើគ្មានអន្តរាគមន៍ពីលោកនាយករដ្ឋមន្ត្រីទេ អ្នកស្រីមិនអាចរួចខ្លួនវិញឡើយ។
តុលាការបានចោទប្រកាន់ អ្នកស្រី ទេព វន្នី ដោយភ្ជាប់ករណីដែលគាត់ដឹកនាំសកម្មជនដីធ្លីតវ៉ានៅជិតផ្ទះលោក ហ៊ុន សែន កាលពីឆ្នាំ២០១៣។ ប៉ុន្តែការចោទប្រកាន់នេះ ត្រូវបានសកម្មជនបឹងកក់ទាមទារឲ្យរដ្ឋាភិបាលបញ្ចេញវីឌីអូឃ្លីបនៅក្នុងកាមេរ៉ាផ្ទះលោកនាយករដ្ឋមន្ត្រីដោយថា ដើម្បីបង្ហាញពីតម្លាភាព ករណីតុលាការចោទប្រកាន់អ្នកស្រី ទេព វន្នី៕
