ទីភ្នាក់ងារព័ត៌មាន AFP បានរាយការណ៍ថា យ៉ាងហោចណាស់បុគ្គលិកផ្ដល់ជំនួយមនុស្សធម៌ និងជនស៊ីវិលចំនួន ៥២នាក់ ត្រូវបានគេសម្លាប់កាលពីថ្ងៃម្សិលមិញនេះ នៅពេលយន្តហោះចម្បាំងមួយគ្រឿង បានទម្លាក់គ្រាប់បែកដោយភាន់ច្រឡំទៅលើជំរុំជនភៀសខ្លួនមួយ ស្ថិតនៅភាគឦសានប្រទេសនីហ្សេរីយ៉ា ដោយស្មានថា ជាក្រុមបះបោរបូកូហារ៉ាម។
AFP បានបន្តថា ការវាយប្រហារនេះ បានកើតឡើងនៅម៉ោងប្រហែល ៩ព្រឹកម៉ោងនៅក្នុងស្រុក ឬត្រូវនឹងម៉ោង ៥ម៉ោងនៅកម្ពុជា។ ការវាយប្រហារនោះ បានកើតឡើងនៅរដ្ឋ Borno ដែលជាតំបន់របស់ពួកឧទ្ទាម ខណៈដែលក្រុមផ្ដល់ជំនួយមនុស្សធម៌កំពុងចែកចាយស្បៀងអាហារដល់ជនភៀសខ្លួន។
រហូតមកដល់ពេលនេះ ពុំទាន់មានតួលេខផ្លូវការពីពួកយោធាទាក់ទងនឹងចំនួនអ្នកស្លាប់នោះឡើយ ប៉ុន្តែ បានបន្ទោសថា នេះជាភាពស្រពិចស្រពិលនៅក្នុងសង្គ្រាម។ ប៉ុន្តែ គ្មានមេបញ្ជាការយោធាជាន់ខ្ពស់ណាម្នាក់ចាត់ទុកគ្រោះថ្នាក់ជាមហន្តរាយធំធេងនោះឡើយ។
អ្នកស្រុកម្នាក់បានប្រាប់ AFP ថា យ៉ាងហោចណាស់មនុស្ស ២៥នាក់ ត្រូវបានគេសម្លាប់ ហើយជាច្រើននាក់ទៀតរងរបួស៕
