រដ្ឋាភិបាលអូស្ត្រាលីបានថ្លែងនៅថ្ងៃនេះថា ខ្លួនមិនទាន់សម្រេចអំពីការស្វែងរកយន្តហោះម៉ាឡេស៊ីបាត់ខ្លួន MH370 នៅមហាសមុទ្រ នាពេលអនាគតនោះឡើយ ប៉ុន្តែ បានបន្ថែមថា បច្ចុប្បន្ននេះ ពុំមានភស្តុតាងរឹងមាំសម្រាប់ធានាការស្វែងរកបន្តទៀតនោះឡើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
មួយថ្ងៃក្រោយពីប្រទេសអូស្ត្រាលី ម៉ាឡេស៊ី និងចិន ប្រកាសបញ្ឈប់ការស្វែងរកយន្តហោះនៅមហាសមុទ្រឥណ្ឌារួចមក រដ្ឋមន្ត្រីដឹកជញ្ជូនអូស្ត្រាលី លោក Darren Chester បានប្រាប់ក្រុមអ្នកយកព័ត៌មាននៅទីក្រុងមែលប៊នថា លោកមិនសម្រេចអំពីការស្វែងរកនៅមហាសមុទ្រនាពេលអនាគតនោះឡើយ។
គ្រួសារអ្នកដំណើរនៅលើយន្តហោះ MH370 ដែលបានបាត់ខ្លួនអំឡុងពេលហោះហើរពីទីក្រុងគួឡាឡំពួទៅទីក្រុងប៉េកាំងនោះ បានរិះគន់ការសម្រេចចិត្តចំពោះការបញ្ឈប់ការស្វែងរកនេះ។
លោក Chester បាននិយាយថា ការចាប់ផ្ដើមស្វែងរកឡើងវិញ នឹងតម្រូវឲ្យមានព័ត៌មានថ្មីគួរជាទីទុកចិត្ត ដែលអាចនាំទៅរកការកំណត់ទីតាំងជាក់លាក់៕
