រដ្ឋមន្ត្រីការបរទេសអាមេរិក លោក Rex Tillerson បាននិយាយកាលពីថ្ងៃម្សិលមិញថា វិធានការយោធារបស់អាមេរិកប្រឆាំងនឹងកូរ៉េខាងជើងដែលមានអាវុធនុយក្លេអ៊ែរនោះ គឺជាជម្រើសមួយស្ថិតនៅលើតុ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលផ្សាយថា ប្រមុខការទូតអាមេរិក បានថ្លែងដូច្នេះ បន្ទាប់ពីលោកថ្លែងព្រមានថា គោលនយោបាយអត់ធ្មត់ជាមួយក្រុងព្យុងយ៉ាង បានហួសពេលអស់ទៅហើយ។
ក្នុងសេចក្ដីថ្លែងការណ៍ដ៏ខ្លាំង ដែលហាក់ជាសញ្ញាបង្ហាញពីការផ្លាស់ប្ដូរផ្នែកគោលនយោបាយអាមេរិកចំពោះប្រទេសឯកោមួយនេះនោះ ប្រមុខកាទូតអាមេរិករូបនេះ បាននិយាយថា កម្មវិធីផលិតគ្រាប់មីស៊ីល និងនុយក្លេអ៊ែររបស់កូរ៉េខាងជើង ត្រូវតែបញ្ឈប់។
លោកថ្លែងទៅកាន់អ្នកសារព័ត៌មាននៅទីក្រុងសេអ៊ូលថា ប្រាកដណាស់ថា អាមេរិកមិនចង់ធ្វើទេនូវរឿងរ៉ាវនាំឲ្យមានជម្លោះយោធានោះ ប៉ុន្តែ ប្រសិនបើអាមេរិកយល់ថា ការគំរាមកំហែងដោយកម្មវិធីផលិតអាវុធរបស់គេដល់កម្រិតមួយដែលតម្រូវឲ្យមានវិធានការ ជម្រើសមួយនោះ ស្ថិតនៅលើរបៀបវារៈរួចទៅហើយ៕
